Read Chang Naga JOSHUA 14 Bible Online

JOSHUA 14 - Chang Naga bible

JOSHUA 14

¹Hobaje Eleazar ungshedbou hoba Naneibü shou Joshua hoba Israel shousi shuong phang yoa chempen jaishou shuongei Kanan kaodaka Israel shousi shuong la jankubü phet shuong,

²BUNYUBOUei Mosaeibü ik danko phaang pakbüei phang gü tho shanga sakkubü tegü haoen habü ho kia.

³Aieilausi phang penyi thoeibüje Mosaei Jordan danjung hauan kua; lausikei haoen yoa Levi phang laje phetphanla aku.

⁴Aieilausi Josefeibü shousi shuong phang nyi kikei. Manasse hoba Efraim; hoba haoeneibü shatsinam lamshaushang hoba haoeneibü shausiyung kao yoan haoen kila sangnyu shuong to limbo haoei kaonyeka Levi phang la phejan aku.

⁵BUNYUBOUei Mosa la sakkubü tegü Israel shousi shuongei kümbei, hoba haoenei kaonyek kho jankei.

⁶Kheijinei Gilgala Jihudabü shousi shuong Joshua jungto loukei, hoba Kanezbü Jefuneibü shou Kalebei hao to laukei, “Kadesh Barneaa no hoba kü shanga BUNYUBOUei Mühghaü müt Mosa to joyobü nyi ngeakei.

⁷BUNYUBOU khangenbou Mosaei kaonyek shuchühla hautijinei ngo po saonyi jai kiteikei, hoba ngeibü maangpona kibü tegü hao la ngühlang künan longeikukei.

⁸Khei yingasikei kü yoa haubü shuongei mütshuong maang ka ngaitikei, lausikei BUNYUBOU ngeibü Mühghaü phai ngo khümbo kuan sembei.

⁹Hobaje khünyet Mosaei theyolanyoko laukei, ‘Maimaitham kaibü you yaüatlangshang kaonyek kho no hoba kaibü shousi shuong shanga ponpen phet kilabü, aieilausi BUNYUBOU ngeibü Mühghaü phai khümbo kuan no sembei.’

¹⁰Hobaje tou chühashi, Israel yamlamanga paijinei BUNYUBOUei Mosa to ho ngüh laubü jih ka haoei joyobü tegü BUNYUBOUei khübü po saonyito ngao langkei phokukei, hoba chühashi, tat ngo po saoleito ngao jai lea.

¹¹Lausikei Mosaei ngo hautibü chaloua tegü tat sühko ngo sekoktham kia, shangied kibü hau tegü wapyola hoba hau longei dogo lela hau kia.

¹²Hibü BUNYUBOUei kho chaloua laubü tegü ho shongh kaodak ho kü la labü, aieilausi khünei Anakimbü hoba sangnyu yaangbü shuong kümthangei balepan lai kikei, kho nyi khünyet chalou ka dida. BUNYUBOUei joyobü tegü kü yoa yolabü hoba ngei haoen shian apla thükakei.”

¹³Hobaje Joshuaei hao haükukei hoba Jefuneeibü shou Kaleb la Hebron phetphanla kukei.

¹⁴Hibü tat sühko Hebron Kenizbü Jefuneeibü phetla yeikei; aieilausi haoei Israel Mühghaü BUNYUBOU phai khümbomeiko sembei.

¹⁵Tou Arba Anakimbü yoa müt yaangboutham yingbü ka shangied Hebron nyen kho Kiriath-Arba kikei, hoba kaonyek kho wapyo ka solo hapbei.