Read Chang Naga JOSHUA 17 Bible Online

JOSHUA 17 - Chang Naga bible

JOSHUA 17

¹Manasse chemdang shanga ho janletkei, aieilausi hao Josefeibü shou jaishoubou kikei. Manaseeibü shou jaishoubou Makir, Gileadeibü bou, haoei Gilead si Bashan lekei, aieilausi hao lakjaibü che kikei.

²Hobaje haoen chemdang thüng joubü Manasseeibü shousi shuong shanga Abizer shousi shuong shanga, Helekeibü shousi shuong shanga, Asriel shousi shuong shanga, Shekhem shousi shuong shanga, Hefer shousi shuong shanga, Shenida shousi shuong shanga phet janletkei, jembü chemdang thüng habü ho Josefeibü shou Manasseeibü bousu shousi ki.

³Lausikei Makireibü shou, Gileadeibü shou, Hefereibü shou, Zelofahadeibü bousushou aki, yaksa ong kikei, hoba haoeneibü nyen shuong habü ho ki, Mala, Noa, Hogla, Milka hoba Tirzaa.

⁴Hobaje haoenei Eleazar ungshedbou hoba Naneibü shou Joshua hoba bunyubou shuong thedangto louan laukei, “Küneibü jaisina yoa liko kün la phet kula BUNYUBOUei Mosa la sakkua.” Hibü BUNYUBOUei sakkubü tegü haoeneibü bou jaisina yoa haoei haoen la phet kukei.

⁵Hobaje Jordan danjung hauan kibü Bashan hoba Gilead kaonyek to limbo phejan Manasse jungto haukei.

⁶Aieilausi Manaseeibü shousi yoa haoeibü yaksa shousi shuong phet che kikei, hoba Gilead kaodak kho joubü Manasse shousi shuong shanga yeikei.

⁷Hobaje Manasse leilang Asher ka Shekhem thedang Mikmetal hoba khoeibü napheito hauan En-Tappuabü kishang sühko kikei.

⁸Tappua kaonyek Manasse shangabü lausikei Manasse leilanga kibü Tappua Efraim shousi shuong shanga kikei.

⁹Hobaje kho leilang Kana shumang chaangbou aephei sühko yanan kikei; Manasse sangnyua habü sangnyu Efraim shangabü kikei, hoba Manasse leilang shumang chanep aephei kikei, hoba kho yungnyua yoan kikei.

¹⁰Chaangbou aephei Efraim shangabü chanep aephei Manasse shangabü kikei hoba yungnyu kho haoeneibü hoba chanep phei Asher hoba chaangbou Issakhar onko hauan kikei.

¹¹Hobaje Isaakhara Beth Shan hoba kho sang shuong Endorbü hoba khoeibü sang shuong Taanakbü hoba khoeibü sang shuong hoba Megidobü hoba khoeibü sang shuong tokei shongh khu sem yoan Manasse shangabü.

¹²Lausi dogokei Manasse shousi shuongei khübü sangnyua kibü shian asattien, lausikei Kananbü kho kaonyeka kikei.

¹³Hobaje ladang Israelbü hau kiko yeikei haoenei Kananbü kümsilei kaangbüsekbü kümbü shuong la yeitikei hoba haoen lemailela shian üp.

¹⁴Hobaje Josefeibü shousi shuongei Joshua to laukei, “BUNYUBOUei haükubü tegü kün mütshang juong yingan phet- phanla shanga aila nyi janletbü che hoba phejan che ong kün la kukei?”

¹⁵Hobaje Joshuaei haoen to laukei, “Kan müt juong yingalonga shongh khüto angashi, hoba khünei kan shanga Perizbü hoba Refaimbü kaonyek kho wapenashi, aishanga Efraim shongh kaodak khoje kan shanga kaang ayen.”

¹⁶Hobaje Josefeibü shousi shuongei laukei, “Shongh kaodak kho kün shanga soubü aying, hoba Beth Shan hoba kho sangnyu shuong hoba Jezreel pholi kaodak hama kibü Kananbü nameibü tongjin kia.”

¹⁷Hobaje Joshuaei Josefeibü chemdang Efraim si Manasse chemdang to laukei, “Kan müt juong hoba hau yaangbü ki, kan phejan che ong akilabü;

¹⁸lausikei shongh kaodak shanga kilabü, aishanga kho yam kiasikei kanei kho imlabü hoba kho thon sühko kan shangabü kilabü, aishanga haoen hau kiasikei hoba nameibü tongjin kiasikei kanei Kananbü shian aplabü.”