Read Chang Naga JOSHUA 18 Bible Online

JOSHUA 18 - Chang Naga bible

JOSHUA 18

¹Kheijinei Israel shousi pendou liko Shiloa kamshaian Lemshang Neichem dangkei, hoba kaonyek kho shian apbei.

²Hobaje Israel shousi yoa phang nyet toukei kaophei ajanletko kikei.

³Hobaje Joshuaei Israel shousi shuong to laukei, “Kaneibü pisibou Mühghaü BUNYUBOUei kubü kaonyek to atan kho lela shanga kan lalokche nyibutham kila?

⁴Kan chung weko ka müt sembang pienashi; ngei haoen hautilabü hoba haoen meimeijung kaonyek shuchühko haulabü hoba haoeneibü phet shanga kaonyek chühletnyu pholabü hoba haoen kü jungto loulabü.

⁵Hobaje haoenei kho phejan la yeiko janlabü; Jihuda chaangbou aenei haoeibü leilanga kilabü hoba Josef chemdang chanep aephei haoeneibü leilanga kilabü.

⁶Kanei kho phejan nyetla janlabü hoba kho janyinbü kho kü jungto hato sungbalabü; hoba BUNYUBOU seneibü Mühghaü thedanga kan shanga ngei hanei phaang paklabü.

⁷Aishanga kan yoa Levi chemdangje phejan aki, aishanga BUNYUBOU shanga ungshed kümsilei haoeneibü phet ki; hoba Gad, Reuben, hoba Manasse chemdang janbü chaangbou Jordan danan BUNYUBOU khangenbou Mosaei haoen la kubü phet haoenei sungletda.”

⁸Hobaje mütshuong meimeijung haukei, hoba Joshuaei kaonyek shuchühla haubü to ho ngühkhüm kuko laukei, “Pheian chühko paiashi hoba kü jungto sepeinyu ngühlang sungba hoba Shiloa BUNYUBOU thedanga ngei kan shanga phaang paklabü.”

⁹Hobaje mütshuong haukei hoba kaonyek kho shuchühko haukei hoba kho tulai chenei sangnyu phejan nyetla janbü thüng dokei hoba haoenei kho Shiloa shaishang to Joshua jungto jungan ngaikei.

¹⁰Hobaje Shiloa BUNYUBOU thedanga Joshuaei haoen shanga phaang pakkei, hoba haoenei janbü to chühan Joshuaei Israel shousi la kaonyek kho jankukei.

¹¹Hobaje Benjamineibü shousi chemdang haoen chemdang thüng janletkei hoba haoeneibü phejan leilang Jihudaeibü shousi shuong si Josefeibü shousi shuong haosi kanglanga kikei.

¹²Hobaje yungkük ae haoeneibü leilang Jordan ka kikei, hoba kho yungkük aephei Jerikho aeto angan chanep ae shongh kaodak danjung haukei, hoba khüka haubü Beth-Aven yama thonan kikei.

¹³Hobaje leilang kho ka haubü chaangbou aephei Luz naphei (kho Bethel) sühko kikei, hoba Beth Horon Sangthon chaangbou aephei kibü shongh nyangko Atarothadar sühko leilang yanan kikei.

¹⁴Hobaje yungthang kaonyek ka jenshuokan chaangbou aephei sepeinyu leian chaangbou aephei Beth Horon thedanga kibü shongh ka Jihudabü shuong sangnyu che Kiriath Baal (Kiriath Jearim) a thonan kikei; kho chanep aephei kaonyek phejan kikei.

¹⁵Hobaje yungthang aephei kaonyek phejan Kiriath Jearim thonbü ka kikei, chanep aeto haubü Neftoa deikük sühko leilang kikei.

¹⁶Hobaje chanep ae Refaim pholia kibü Ben Hinnomeibü pholi thedanga shongh thonbü sühko leilang yanan kikei, hoba kho Hinnom pholi to yanan chaangbou phei Jebusbü ae thona En Rogel sühko yankei.

¹⁷Hobaje kho athakko chanep aephei Enshemesh to hauan Adummim youa kibü Gelilot sühko haukei hoba Reubeneibü shou Bohan Laang sühko yankei.

¹⁸Hobaje kho chanep aephei Araba ae danjung hauan Araba sühko yanan kikei.

¹⁹Hobaje chanep aephei Beth Hogla ae danjung leilang haukei hoba Jordan chaang aephei thonbüa chanep phei Jemdei Yungnyu yungkoa leilang thonan kikei; chaangbou aephei kaonyek leilang ho ki.

²⁰Chaangbou kaonyek leilang Jordan kikei. Khübü kaijembo leilang ho haoeneibü chemdang thüng hapbü Benjamineibü shousi shuongeibü phet kikei.

²¹Haoen chemdang thüng kubü Benjamineibü shousi shuongeibü sangnyu habü ki; Jerikho, Beth Hogla hoba Emek-Keziz;

²²Beth Araba, Zemaraim, hoba Bethel,

²³Avvim, Para, hoba Ofra;

²⁴Chefar Ammoni, Ofni, hoba Geba, haoeneibü sang yoan sangnyu anthüknyi;

²⁵Gibeon, Rama, hoba Beerot;

²⁶Mizpa, Chefra, hoba Moza

²⁷Rekem, Irpeel, hoba Taralah,

²⁸Zela, Haelef, hoba Jebus (kho Jerusalem), Gibeat, hoba Kiriath, haoeneibü sangnyu anthüklei. Ho Benjamineibü shousi shuong haoen chemdang thüng hapbü phet ki.