Read Chang Naga JOSHUA 2 Bible Online

JOSHUA 2 - Chang Naga bible

JOSHUA 2

¹Kheijinei Naneibü shou Joshuaei müt nyi kokpheibü tegü huphanga Shittim ka hautiko laukei, “Hauashi, Jerikho hoba kaonyek kho shuichühashi.” Hobaje haoen hauan asangalan sao che nyenei Rahabeibü chem to atkei hoba khünei otkei.

²Hobaje Jerikhobü Choba to hai lenkei, “Chühashi, tao hato Israel shousi shuong kaodak pean chühla louakei.”

³Hobaje Jerikhobü Chobaei Rahab jungto hautiko laukei. “Ka jungto louan kaibü chem to lotbü mütshuong kho leiba; aishanga haoen kaonyek pendou pheian chühla louda.”

⁴Lausikei yaksanyu khoei müt nyi kho leiyetan kho huan phokei, hoba saoei laukei, “Haü mütshuong kho kü chem to loukei, lausikei haoen laka loukei ngei angekei.

⁵Hobaje bakhün khinbü jih nangnakjinei mütshuong kho satan apbei, haoen lai to haukei ngei angekei; tongde shijung hauashi, aishanga kanei haoen shijung hausije kanei haoen leioulabü.”

⁶Lausikei saoei, haoen kho chemdak to leian angkei hoba haoen kho saoei yenei yenko chemdaka phobü hanthep yoa huan phokei.

⁷Hobaje mütshuongei Jordan deiko sühko haoen shijung haukei, haoen kho haubüyam bakhün kho khinkei.

⁸Hobaje haoen tou ayepbo kijinei, sao haoen jungto chemdak to angkei;

⁹hoba saoei müt shuong to laukei, “BUNYUBOUei kan la kaonyek kho kua, hoba kan to hatbü kün thük to lotakei hoba ho kaodaka kibü pendou kan thedanga tühnyinda dogo ngei ngekei.

¹⁰Aishanga kan Ijep ka longjinei BUNYUBOUei Saklangbü Yungnyu kan thedanga lai ulangtham aptikei, hoba Jordan danjung hauan kibü Amorbü Choba müt nyi Sihon hoba Og, aoyou kanei lemailela mautikei, khübü to kanei ai kümbei künei dida.

¹¹Hobaje künei ho ditjinei kan to hatbü ka küneibü maangpon tühnyinkei; touje kün aotokei maang kaangbü soushou ajoukei; aishanga BUNYUBOU kaneibü Mühghaü kho thükaenei müh hoba phangaenei kaodaka kibü Mühghaü ki.

¹²Hibü tou ngei kan to sanouko jungeibü tegütham kanei kü bou chemdang to sanoubü jungeila, hoba kü la ngühmai tetsida che kula BUNYUBOU nyena kü to thealanashi dogo ngei kan to sudajada.

¹³Hobaje kanei kübou hoba künyu hoba ngeibü jaisina hoba ngeibü nousina langkei, hoba haoen kibü pendou küneibü langkei haibü ka püetkaima:”

¹⁴Hobaje mütshuongei sao to laukei, “Küneibü langkei ka shanga yingshi, khei künei kümbü kümsilei ho nyi alenlonga, ladang BUNYUBOUei kün la kaonyek kho kulaje, künei ka to sanou hoba ngühmai jungeilabü.”

¹⁵Kheijinei saoei haoen kho koulom danko janglühei yantikei, aishanga saoeibü chem kho sangnyu kümthang ba thüka kikei hoba sao kümthang thüka kikei.

¹⁶Hobaje saoei haoen to laukei, “Shongh khüto angashi, khei ayinglonga kan shibü shuongei kan leiatlabü; hoba kan shibü shuong sepeinyu angai shongko khünei chalou semnyet huan kishi; kho phaia kanei jembü lam to haula thükkei.”

¹⁷Hobaje mütshuongei sao to laukei, “Künla theyolanyotibü kaibü thebülanbü shanga kün ai shedbü akilabü.

¹⁸Chühashi, künei kaonyek kho lela loujinei ho saklangbü lüh laobouei nyi kün sattikei ho koulom khünei khühjan, hoba kabou, kanyu, kaibü jaisina hoba kaboueibü chempen pendou kaibü chem to ngashaishi.

¹⁹Hobaje ho haüthüklabü, aoyouei kaibü chem koukhün ka longan khong to satlaje haoeibü sii kho haoeibü khua kilabü.

²⁰Lausikei küneibü kümsilei shanga nyi kaibü sembungei jukeisaia longa kheijinei nyi kün to theyolanyoko theletbü shanga kün shedbü akilabü.”

²¹Hobaje saoei laukei, “Kaneibü ngüh tegü kitishi,” hoba saoei haoen hautikei hoba haoen meimeijung haukei, hoba saoei saklangbü lüh kho kouloma phentian phokei.

²²Hobaje haoen hauan shongh aeto loukei, hoba haoen shieibü shuong kho sepeijung angai shongko khünei chalou semnyet kikei hoba shibü shuong khoei haoen lam pendoua lambei, lausikei haoenei ühüp.

²³Kheijinei müt nyi kho sepeijung longeikei, hoba shongh ka louyenkei, hoba kho danko Naneibü shou Joshua jungto loukei hoba haoen to ai kühshuokkei pendou hao la lenkei.

²⁴Hobaje haoenei Joshua to laukei, “Tükde BUNYUBOUei kaonyek pendou kho sen ik to khümbo kua; tokei kho to limbo kaonyeka kibü pendou sen thedanga tühnyinda.”