Read Chang Naga JOSHUA 22 Bible Online

JOSHUA 22 - Chang Naga bible

JOSHUA 22

¹Kheijinei Joshuaei Rebuenbü hoba Gadbü hoba Manasse chung jamde ngaan haoen to laukei,

²“BUNYUBOU khangenbou Mosaei kan la sakkubü pendou kanei jungeikei hoba ngei kanla sakkubü pendoua kanei ngeibü ngüh ditkei.

³Tat sühko khübü chalou juong ka BUNYUBOU kaneibü Mühghaü ngühkhüm kümboleiko kanei kaneibü jaisina üpyo.

⁴Hobaje tou haoei haoen to joyolauyobü tegü, BUNYUBOU kaneibü Mühghaüei kaneibü jaisina la hakso kua; hibü Jordan danan BUNYUBOU khangenbou Mosaei kan la kubü jembü kaodak to kaneibü neichem to sepeiashi.

⁵Kaneibü maangpon pendouei, kaneibü soushou pendouei hao khangenla, hao to khapyoan kila, haoeibü ngühkhüm jungeila, haoeibü lamnyu pendoua paila, hoba BUNYUBOU kaneibü Mühghaü sanoua BUNYUBOU khangenbou Mosaei kan la sakkubü ngühkhüm maangkuko jungeiashi.”

⁶Kho tegü Joshuaei haoen haükukei hoba haoen hautikei hoba haoen lulueibü neichem to ngaikei.

⁷Tou Manasse phang jamde la Mosaei Bashana phet- phanla kukei, lausikei lubü jamde la Joshuaei haoeneibü jaisina yoa Jordan danan chanep aenei kukei. Kho to limbo Joshuaei haoen neichem to ngaitijinei haoei haoen haükukei;

⁸hoba haoen to laukei, “Nyaksinam juong, shatsinam juong, hon, chandinam, chinam, namkung hoba neisimei juong yoa kan lulueibü neichem to sepeinyu ngaiashi hoba kaneibü dangbou ka hapbü nyaksinam kaneibü jaisina yoa janyoashi.”

⁹Hobaje Reubeneibü shousi shuong hoba Gadeibü shousi shuong hoba Manasse phang jamde sepeinyu longeian Mosa danko BUNYUBOUei sakkubü tegü, Kanan kaodaka kibü Shilo ka longan Israel shousi shuong yo ka bangkei hoba haoenei lelabü kaonyek Gilead to haukei.

¹⁰Hobaje ladang haoen Kanan kaodaka kibü Jordan kaijembo kibü kaonyek to loukei, Reuben shousi shuong hoba Gad shousi shuong hoba Manasse phang jamdeei Jordan nyangko lemshang che dangkei, chühla kho lemshang yaangbü che kikei.

¹¹Hobaje Israel shousi shuongei ngühlang che hai ditkei, “Chühashi, Israel shousi shuong shangabü yeila Jordan kaijembo kabü kaonyeka Kanan kaodak thedanga Reuben shousi shuong hoba Gad shousi shuong hoba Manasse phang jamdeei lemshang che danga.”

¹²Hobaje ladang Israel shousi shuongei kho ditkei, Israel shousi shuong tan khümbo haoen khulimbo wapyola haula Shiloa kamshaikei.

¹³Kheijinei Israel shousi shu- ongei Eleazar ungshedboueibü shou Finehas hoba hao yoa bunyu an Israel phang pendou shanga boueibü chung ka bunyu che;

¹⁴Reuben shousi shuong hoba Gad shousi shuong, Manasse phang jamde jungto Gilead kaodak to hautikei; hoba haoen kho mütpem weko Israelbü hajar yoa bou chung thüka boujai kikei.

¹⁵Hobaje haoenei Reuben shousi shuong hoba Gad shousi shuong hoba Manasse phang jamde jungto Gilead kaodak to louan haoenei haoen to joyoko laukei,

¹⁶“BUNYUBOUeibü tan khümboei hai lauda, ‘Tat BUNYUBOU khulimbo lola kanei lemshang che kümbüei BUNYUBOU phai to sembü ka sepeila aila shedbü ho Israel Mühghaü khulimbo shonda?

¹⁷Peora shabü laobou ka BUNYUBOUeibü tan thüka lim louasikei tat sühko sen asaopoenko kia, kho sen shanga yongko hanbü sai?

¹⁸Hobaje tat kan BUNYUBOU phai sembü ka sepeida sai? hoba ho kilabü, tat kanei BUNYUBOU khulimbo lobü hapan ngiet haoei Israelbü tan khümbo to ong khauanglabü.

¹⁹Lausi dogokei kaneibü phejan kaonyek asaopoko kialonga khei yingsije BUNYUBOUeibü phejan kaonyek lanei BUNYUBOUeibü lemshang neichem ki khüto kaiya hoba kün yoa kiashi, lausikei BUNYUBOU seneibü Mühghaü lemshang to limbo lubü lemshang che dangbüei kanei BUNYUBOU khulimbo, ayingsi kün khulimbo temeimei.

²⁰Zeraeibü shou Akhanei khümbo kubü peisileia shed shonbü danko Israelbü shuong phang pendou thükto shieikoe lotkei aying lo? hoba haoeibü shedbü shanga kho müt kho ong amau.’ ”

²¹Kheijinei Reubeneibü shousi shuong hoba Gadeibü shousi shuong hoba Manasse phang jamdeei Israelbü hajar thüka lei- yeibü to laukei,

²²“Yaangenbou, Mühghaü, BUNYUBOU! Yaangenbou, Mühghaü, BUNYUBOU! Haoei ngekei! hoba Israelei ngeashi! Ho khulimbo meimeibü kümsilei yingalonga, hoba BUNYUBOU khulimbo shed shonalonga tat kün tejouti.

²³BUNYUBOU phai sembü ka sepeila, ayingsi khünei juokbü lembüei lemla, ayingsi shausi- yung lembü ayingsi kho thüka sangmai lembü che lemla künei lemshang che dangko kialonga kho BUNYUBOUei haoei lolo phok lamashi.

²⁴Lausikei phaia kaneibü shousi shuongei küneibü shousi shuong to ‘Israel Mühghaü BUNYUBOU yoa kaneibü phejan ai ki?’ dogo laubula künei ho kümbei.

²⁵Aishanga kan Reuben shousi shuong hoba Gad shousi shuong kan si kün kanglanga BUNYUBOUei Jordan leilang kümbei hoba BUNYUBOUa kan phejan aki, kho tegü kaneibü shousi shuongei küneibü shousi shuong BUNYUBOU to hatbü ka thaktilabü.

²⁶Hibü künei laukei, ‘Kaiya, senei lemshang che lamlekho, juokbü lembü ayingsi haitibü lembü shanga aying.’

²⁷Lausikei ho kün si kan kanglanga sen phaiabü meten shuong kanglanga aukabü che kilabü, hoba sen hao junga juokbü lembüei hoba haitibü lembüei hoba sangmai lembüei BUNYUBOU khangenlabü, hoba loulabü jihsiphaia kaneibü shousi shuongei küneibü shousi shuong to, ‘Kan BUNYUBOUa phejan aki,’ dogo alaulabü.

²⁸Hibü künei laukei, ‘Ladang haoenei kün to ayingsi loulabü jihsiphaia küneibü meten shuong to laulaje ho hai kilabü: Seneibü pisibousi shuongei kümbü lemshang tetsida chüh- ashi, ho you che lemla shanga ayingsi haitibü lembü shanga aying, lausikei kün si kan kanglanga aukabü che ki.’

²⁹Haoeibü lembü neichem thedanga BUNYUBOU seneibü Mühghaü lemshang to limbo BUNYUBOU khulimbo awap- yolabü ayingsi tat ka BUNYUBOU phai sembü ka sepeila juokbü lembü shanga, shausiyung lembü shanga ayingsi haitibü lembü shanga lemshang akümla Mühghaüei shiletashi.”

³⁰Hobaje ladang ungshedbou Finehas, mütshang thüka bunyu shuong, hoba hao yoa kibü Israelbü hajar thüka kongnyu shuongei Reubeneibü shousi hoba Gadeibü shousi shuong hoba Manasse shousi shuongei lenyo lauyobü ditkei haoen to maang haikei.

³¹Hobaje Eleazar ungshedboueibü shou Finehasei Reubeneibü shousi shuong, Gadeibü shousi shuong hoba Manasseeibü shousi shuong to laukei, “Senei ngekei, tat sen yoa BUNYUBOU kia, aieilausi kanei BUNYUBOU khulimbo ho shed ashon; tou BUNYUBOUeibü ik ka Israel shousi shuong kanei leiyena.”

³²Hobaje Eleazer ungshedboueibü shou Finehas hoba bunyu shuongei Reuben shousi ka hoba Gad shousi shuong ka Gilead kaodak ka longan Israel shousi shuong jungto Kanan kaodak to ngaikei, hoba haoen jungto nyibou sepeinyu ngühlang sungbakei.

³³Hobaje kho kümsilei khoei Israel shousi shuongei Mühghaü nyen sangkei, hoba Reuben shousi shuong Gad shousi shuong kibü kaodak leilukula hoba haoen khulimbo wapyola haula touje alou.

³⁴Hobaje Reuben si Gad shousi shuongei lemshon kho “Aukabü” dogo nyenkukei, aieilausi haoenei laukei, “Ho sen kanglanga BUNYUBOU Mühghaü aukabü ki.”