Read Chang Naga JOSHUA 24 Bible Online

JOSHUA 24 - Chang Naga bible

JOSHUA 24

¹Kheijinei Joshuaei Israel phang pendou Shekhem to yoshaitikei, hoba Israel jaishou shuong hoba haoeneibü lamleibü shuong hoba haoeneibü matjembü shuong hoba haoeneibü yaangbü ikjaibü shuong ngakei, hoba haoen Mühghaü jungto loukei.

²Hobaje Joshuaei mütshuong pendou to laukei, “Israel Mühghaü BUNYUBOUei hai lauda, shangied kaneibü pisibou Abraham hoba Nahoreibü bou Tera haoen shumang aian thinei kikei, hoba haoenei lubü mühghaü khangenkei.

³Hobaje ngei kaneibü bou Abraham shumang aian thiae ka leijung louan hao Kanan kaodak pendou danko leikei, hoba haoeibü lilabü kaonyu shenko hautikei, hoba ngei hao la Isak kukei.

⁴Hobaje ngei Isak la Jakob si Esau kukei hoba ngei Esau la Seir shongh lela kukei, hoba Jakob hoba haoeibü shousi shuong Ijep kaodak to yankei.

⁵Hobaje ngei Mosa si Aron hautikei, hoba ngei khünei kümbü tegü ngei Ijep limeilangei shieikoekei; hoba phaila ngei haoen leiyenkei.

⁶Hobaje ngei kaneibü pisibou Ijep ka leiyenkei, hoba kan yungnyu to loukei, hoba Ijepbüei kailong hoba kolia setan saklangbü yungnyu sühko kaneibü pisibou shijung loukei.

⁷Hobaje ladang haoenei BUNYUBOU to ngekkei haoei kan si Ijepbü kanglanga nakthühtham yeitikei, hoba haoen thükto yungsen koutikuan haoen deiei nyembei hoba ngei Ijepa ai kümbei kho kaneibü nyekei hapa; hoba chalou juong kan yama kikei.

⁸Hobaje Jordan danan kibü Amorbü kaodak to ngei kan leian loukei hoba haoenei kan to wapyokei, hoba ngei haoen kaneibü ik to kukei, hoba kanei haoeneibü kaonyek lekei, hoba kan thedanga ngei haoen mautikei.

⁹Kheijinei Moabbü Choba Zipporeibü shou Balakei Israel khulimbo meimeikei hoba wapyokei, hoba haoei Beoreibü shou Balaam ngaan kan to khüklauokla hautikei;

¹⁰lausikei ngei Balaam to ngüha ale hibü haoei sepeian kan haükukei; kho tegü ngei haoeibü ik ka kan leiyenkei.

¹¹Hobaje kanei Jordan danjung hauan Jerikho to loukei, hoba Jerikhobü mütshuong, Amorbü, hoba Perizbü, hoba Kananbü, hoba Hitbü, hoba Girgasbü hoba Hivbü hoba Jebusbü mütshuongei kan khulimbo wap- yokei; hoba ngei haoen kaneibü ik to khümbo kukei.

¹²Hobaje kaneibü laujin ayingsi kaneibü in ajungeiko ong kan thedang ka Amorbü Choba müt nyi yoan haoen shian apbei; ngei kan thedangto naoyang hautikei.

¹³Hobaje kaonyek che laoboua kan ühü, laobou sangnyu shuong kanei ayaü hoba lanei kanei semlüh hoba onang bu akeaong, kanei shauda, ngei kan la kho kukei hoba khünei kan kida.

¹⁴“Hibü tou kanei BUNYUBOU to hatashi hoba ngühmai hoba maimaithamei hao khangenashi hoba Ijepa hoba shumang danan kaneibü pisibouei khangenbü mühghaü shuong sungan apashi hoba BUNYUBOU khangenashi.

¹⁵Hobaje BUNYUBOU khangenla kanei shabü tegü chühenalonga, kanei ao khangenla tattham pienashi; shumang danan kaneibü pisibouei khangenbü mühghaü shuong ayingsi Amorbü mühghaü shuong aoyoueibü kaonyeka kan kida; lausikei ngo hoba kün chemdangeije künei BUNYUBOU khangenlabü.”

¹⁶Hobaje noknyühei laukei, “Künei BUNYUBOU inletan lubü Mühghaü khangenlabü kho kün ka Mühghaüei shiletshi.

¹⁷Aishanga aoei kün leian loukei, hoba küneibü pisibou Ijep kaodak aaochem ka leiyenkei, aoei habü tetsida yaangbü kümbei, hoba kün haubü lamnyu pendoua hoba künei danjung haubü müt pendou ka khümenan phokei, hao küneibü Mühghaü BUNYUBOU ki.

¹⁸Hobaje BUNYUBOUei müt pendou khei kho kaodaka kibü Amorbü kün thedang ka shian apbei, hibü küneikei BUNYUBOU khangenlabü, aishanga hao Mühghaü ki.”

¹⁹Hobaje Joshuaei mütshuong to laukei, “Kanei BUNYUBOU khangenla athük, aishanga hao saopobü Mühghaü hoba nyekto shatbü Mühghaü ki; haoei kaneibü shedbü hoba shabü üpbulabü.

²⁰Kanei BUNYUBOU inletan küksithang mühghaü khangenalonga, kheijinei haoei sepeian haoei kan to maibü küman phaia kan to amaibü kümlabü hoba kan mautilabü.”

²¹Hobaje mütshuongei Joshua to laukei, “Aying, künei BUNYUBOU khangenlabü.”

²²Hobaje Joshuaei mütshuong to laukei, “Kanei hao khangenla BUNYUBOU pienbü kho kan khulimbo aukabü ki,” hoba haoenei laukei, “Haü, kün aukabü ki.”

²³Hibü haoei laukei, “Tou kan yoa kibü küksithang mühghaü sungan apashi, hoba kaneibü maangpon sepeiashi.”

²⁴Hobaje mütshuongei Joshua to laukei, “Künei BUNYUBOU küneibü Mühghaü khangenlabü hoba künei haoeibü ngüh ditlabü.”

²⁵Hibü khünyet kho Joshuaei mütshuong yoa theyolanyobü che kümbei, hoba haoen la Shekhema ngühkhüm hoba songle ngühkhüm kukei.

²⁶Hobaje Joshuaei Mühghaüeibü ngühkhüm lea habü ngüh dokei, hoba haoei laang yaangbü che sungbakei hoba BUNYUBOU lemshang chem nyangko yembulong chungthema kho khünkei.

²⁷Hobaje Joshuaei mütshuong pendou to laukei, “Chüh- ashi, ho laang ho sen shanga aukabü che kilabü, aishanga hoei kan to joyobü BUNYUBOUeibü ngüh pendou dida, hibü kanei kaneibü Mühghaü athekulonga ho kan shanga aukabü che kilabü.”

²⁸Hibü Joshuaei mütshuong haoen mütpem weko haoen jembü phetphan kaodak to ngaitikei.

²⁹Hobaje khübü chalou danan phaia ho loushedkei, Naneibü shou BUNYUBOU khangenbou Joshua po saongaoto an kian haikei.

³⁰Hobaje Gaash shongh chaaenei Efraim shongh kaodaka kibü haoeneibü phetphan leilang Timnat Seraa haoenei hao khünkei.

³¹Hobaje Joshuaeibü jihsiphai pendoua hoba Joshua phaia kibü jaishou shuong jihsiphai pendoua Israelei BUNYUBOU khangenkei; hoba haoei Israel shanga kümbü kümsilei pendou ngean kikei.

³²Hobaje Israel shousi shuongei Ijep ka sungbabü Josefeibü lo Shekhemeibü bou Hamoreibü shousi shuong ka Jakobei nam saongaoei jekbü kao hanbüshou Shekhema khünkei, hoba khübü kho Josefeibü shisi shoueibü phet la yeikei.

³³Hobaje Aroneibü shou Eleazar haikei, hoba haoeibü shou Finehas la kubü Efraim shongh kaodak Gibeaa khünkei.