Read Chang Naga JOSHUA 3 Bible Online

JOSHUA 3 - Chang Naga bible

JOSHUA 3

¹Nyibounyet ngeyang enyu Joshua pikei, hoba hao hoba Israel shousi pendou Shittim ka meimeijung Jordan to loukei hoba shumang danjung ohautoua haoen khünei shaikei.

²Hobaje semnyet kian phaia leiyeibü shuong kho shaishang danthetjung haukei.

³Hobaje haoenei noknyüh la ngühkhüm kuko laukei, “Ngühkhüm Busen kho Levi phang ungshedbou shuongei ladang lengan hauko haplaje, kheijinei kanei jembü kishang ka kuklabü hoba kho phaito haushi.

⁴Lausi dogokei kan si kho kanglanga iknop hajar nyi thüng kilabü, kan laobou lam to haujan kho ngelabü lele kho nyangko kan ohoujan; aieilausi kanei kho lam to hauan achühkei.”

⁵Kheijinei Joshuaei mütshuong to laukei, “Kan lolo saüenan kishi, aishanga ngiet BUNYUBOUei kan shanga seikümseilei kümlabü.”

⁶Hobaje Joshuaei ungshedbou shuong to laukei, “Ngühkhüm Busen kho lengan mütshuong thedang to danashi,” hoba haoenei Ngühkhüm Busen kho lengkei hoba mütshuong thedang khüto haukei.

⁷Hobaje BUNYUBOUei Joshua to laukei, “Tat Israelbü pendouei hapbo no yangentila khangda, hibü Mosa yoa ngo yoan kibü tegü ka yoa kei ngo yobü haoenei ngelabü.

⁸Hobaje nyi Ngühkhüm Busen jungbü shuongla sakkuko laushi, ‘Ladang kanei Jordan yungkou to loulaje, kanei Jordana ngüh üangko loshi.’”

⁹Kheijinei Joshuaei mütshuong to laukei, “Hato kaiya hoba BUNYUBOU kaneibü Mühghaü ngüha leashi.”

¹⁰Hobaje Joshuaei laukei, “Hoei ponpen thon akibü Mühghaü kan yoa kia dogo kanei ngelabü hoba Kananbü, Hitbü, hoba Hivbü, Perizbü, Girgasbü, Amorbü, hoba Jebusbü pendou kho haoei kan ka lepde maimai shian aplabü.

¹¹Chühashi, kaodak pendou thüka BUNYUBOU thebülanbü Ngühkhüm Busen kan yoa Jordan danko hauda.

¹²Hibü Israelbü phang weko müt anthüknyi, phang wekoka müt che che pienashi.

¹³Hobaje ho haüthüklabü, kaodak pendou thüka BUNYUBOU Mühghaü, BUNYUBOU thebülanbü Ngühkhüm Busen lengbü ungshedbou shuong khoei ladang Jordan deia you naksühlaje, thükae ka loukoubü Jordan dei kho janyinlabü hoba ontou chela ong yeian kiteilabü.”

¹⁴Hobaje ladang mütshuongei Jordan danla jembü neichem ka kukkei, hoba Ngühkhüm Busen lengbü ungshedbou shuong haoen thedanga haukei,

¹⁵hoba ladang Ngühkhüm Busen lengbü shuong Jordan to loukei, hoba Ngühkhüm Busen lengbü ungshedbou shuong you yungkoa naksühkei, (aishanga youlat jih pendoua Jordan yungko pendou kho deiei danglepan kida).

¹⁶Kheijinei thükae ka loukoubü dei shuong kho Zaretan nyangko Adam sangnyu ka lounyu nangan on che ong yeian dangshatkei, hoba Araba yungnyu ka angbü Jemdei Yungnyu ham khümbo janyinkei hoba mütshuongei danjung hauan Jerikho thedanga sühkei.

¹⁷Hobaje BUNYUBOUeibü thebülanbü Ngühkhüm Busen lengbü ungshedbü shuongei Jordan jenyu kao ulangbü thüka kaangkhühtham lokei, hoba phang khümbo lemailela adankhüm shongko Israelbü pendou kao ulangbü thüka danjung haukei.