Read Chang Naga JOSHUA 4 Bible Online

JOSHUA 4 - Chang Naga bible

JOSHUA 4

¹Ladang phang pendouei Jordan kho lepde dankei, BUNYUBOUei Joshua to laukei,

²“Nyi mütli yoka anthüknyi phang weko ka che che pienashi,

³hoba haoen la hai sakkuashi: Kanei Jordan jenyu lan ungshedbou shuong you kaangkhühtham lokei, khüka laang anthüknyi sungenashi, hoba khübü kho kan yoa künan hauan tao kan lan shailaje khünei phoshi.”

⁴Hibü Joshuaei müt anthüknyi aoyou haoei Israelbü phang weko ka che che pienkei, haoen ngakei.

⁵Hobaje Joshuaei haoen to laukei, “Kanei BUNYUBOU kaneibü Mühghaüeibü Ngühkhüm Busen kho danjung hauan Jordan jenyu khüto atashi, hoba loulabü chaloua kaneibü shisishousiei, ‘Habü laang anthüknyi tetlabü ai?’ dogo phea longa, ho kan yoa tetsida che kilabü lele,

⁶Israel shousi chung damenla tegü kan mütpem wekoei lulueibü ika laang che che tonashi.

⁷Aishanga kheijinei kanei haoen to, Jordan shumang kho BUNYUBOUeibü theyolanyobü Ngühkhüm Busen thedanga janyinkei dogo lenlabü. Ladang kho Jordan danthetko dankei, Jordan deishuong kho janyinkei, hoba khübü laang ho Israel shousi shuong shanga thon akibü nyenshou nyenyaang kilabü.”

⁸Hobaje Israel shousi shuongei Joshuaei sakkubü tegü, Israel shousi shuong phang to chühan haoenei Jordan shumang jenyu ka laang anthüknyi sungenkei hoba haoen yoa khübü kho shaishang to sungjung hauan phokei.

⁹Hobaje lan theyolanyobü Ngühkhüm Busen lengan ungshedbou shuong lokei, khünei Joshuaei laang anthüknyi kho kean phokei, hoba tou sühko khübü kho khünei kia.

¹⁰Aieilausi Mosaei Joshua la sengkubü tegü BUNYUBOUei Joshua la mütshuong to lenla sengkubü awan shongko Ngühkhüm Busen lengan ungshedbou shuong kho Jordan jenyua loan kiteikei; hoba mütshuongei panteiko danjung haukei.

¹¹Hobaje ladang mütshuongei danjung haukei, BUNYUBOUeibü Ngühkhüm Busen hoba ungshedbou shuong kho noknyüh thedang to danjung loukei.

¹²Hobaje Mosaei haoen to lenbü tegü Reubeneibü shousi shuong, Gadeibü shousi shuong, hoba Manasseeibü chung jamde in si aubu jungan Israel shousi thedang to haukei.

¹³Wapyola lamlebü mütshuong hajar saonyi thüng BUNYUBOU thedang khüto danjung lason to Jerikho pholi to haukei.

¹⁴Khünyet BUNYUBOUei Joshua Israelbü thea yaangentikei hoba haoenei Mosa to souhatbü tegü haoeibü langkei sünga haoenei soumo hatkei.

¹⁵Hobaje BUNYUBOUei Joshua to laukei,

¹⁶“Thebülanbü Ngühkhüm Busen lengbü ungshedbou shuong Jordan ka longla ngühkhüm kushi.”

¹⁷Kheijinei Joshuaei ungshedbou shuong la ngühkhüm sengkuko laukei, “Kan Jordan ka kaiyang.”

¹⁸Hobaje ladang BUNYUBOUeibü theyolanyobü Ngühkhüm Busen lengbü ungshedbou shuong Jordan shumang ka longkei, hoba ungshedbou shuongeibü you kao ulangbü to yaüenkei, Jordan dei kho haoen nyishou tegü lulu kaoen to sepeijung ngaikei, hoba shaangla tegü yungko pendou kho sopbo koukei.

¹⁹Hobaje shaangboubü lit chalou anbounyet mütshuong kho Jordan ka longkei hoba Jerikho chaangbou leilang Gilgala shaikei.

²⁰Hobaje Jordan ka sungenbü khübü laang anthüknyi kho Joshuaei Gilgala kean phokei.

²¹Hobaje haoei Israel shousi shuong to laukei, “Habü laang tetlabü ai? dogo loulabü metena kaneibü shieishouei haoeneibü nyusibou to phesi,

²²Israelbü kao ulangbüa ho Jordan danko loukei dogo ngetiashi.

²³Aishanga kaodaka kibü müt pendouei BUNYUBOUeibü ik kho hau yaangbü dogo ngelabü lele hoba kaneibü Mühghaü to thon akiko soumo hatlabü lele,

²⁴BUNYUBOU kaneibü Mühghaüei Saklangbü Yungnyu to kümbü tegü adankhüm shongko sen thedanga dei hapan apbukei, kho tegü BUNYUBOU kaneibü Mühghaüei kan adankhüm shongko Jordan dei kan thedanga ulangtham phokukei.”