Read Chang Naga JOSHUA 5 Bible Online

JOSHUA 5 - Chang Naga bible

JOSHUA 5

¹Ladang Jordan danan chanep aenei kibü Amorbü Choba pendouei hoba yungnyu nyangko kibü Kananbü Choba pendouei BUNYUBOUei Israel shousi shuong thedanga laobou Jordan dei kho haoen adankhüm shongko ulangtham aptibü shanga ditkei, haoeneibü maangpon yuian apbei hoba Israelbü to hatbüei haoen to touje soushou akiko apbei.

²Kho jihsiphaia BUNYUBOUei Joshua to laukei, “Nyi inshou akbü lamleashi, hoba Israel shousi shuong kho nyibou kipngaiashi.”

³Hobaje Joshuaei inshou ukei, hoba Israel shousi shuong kho Gibeat-aralot shongha kipan apbukei.

⁴Hobaje Joshuaei aila kipbukei kho aukabü ho; Ijep kaodak ka loubü eikshuong yoa bousu pendou, khei Ijep kaodak ka longan phaia yama lam loma wapyobü pendou haian apbei.

⁵Aishanga longbü müt pendou kipbei, lausikei Ijep kaodak ka longjinei yama lamoua bukbü müt pendou akip.

⁶Aieilausi haoenei BUNYUBOUeibü ngüha alebü haangshong phang pendou khei Ijep kaodak ka longbü wapyobü müt yoan amau shongko, Israel shousi shuong yama po saonyi nongaikei; aieilausi haoei haoen la kulabü dogo haoeneibü pisibou la thekubü sendei si naodei koubü kaodak kho ühüptila BUNYUBOUei theyolanyokei.

⁷Hobaje haoeneibü shisishousi aoyouei haoen saüenkei Joshuaei haoen kipbei; haoen kho lama akipsije haoen kho tokei akipbo kikei.

⁸Hobaje ladang phang khümbo kipbei, haoen mou amai shongko shaishanga lulu chema kikei.

⁹Hobaje BUNYUBOUei Joshua to laukei, “Tat ngei ka ka Ijepbü shieikoe thonglangtida. Hibü kho kaodak kho to tat sühko Gilgal dogo lauda.”

¹⁰Hobaje Israel shousi shuong Gilgala shaikei hoba Jerikho pholia kho lit anthük leiboubü kho Püetbü Lem chasem noukei.

¹¹Hobaje Püetbü lem lian phainyet kho, kho kaodak ka longbü tokai ajinbü wentek hoba ulangbü khünyet shaukei.

¹²Hobaje haoenei kaonyek ka longbü kho shauan phaia ngiet kho mana khüman apbei, hoba Israel shousi shuongei touje mana ühüp; lausikei khüpoje haoenei Kanan kaodak kabü buhek deihek shaukei.

¹³Hobaje ladang Joshua Jerikho nyangko loukei, haoei haoeibü nyek ipbei hoba tangküng to chühkei hoba khünei müt che haoeibü ika in jungan hao khulimbo lokei hoba Joshuaei hao jungto hauan laukei, “No kün shanga si küneibü dangbou shanga?”

¹⁴Hobaje haoei laukei, “Aying, lausikei, lakjaibou BUNYUBOUeibü lajamleibou tegü ngo louda.” Joshuaei haoeibü thenyek kao ae khüpetan lembei, hoba hao to laukei, “Ngeibü bunyuei hao khangenbou to ai laulabü ki?”

¹⁵Hobaje BUNYUBOUeibü lajamleibouei Joshua to laukei, “Kaibü you ka kaibü ngok hangletashi, aieilausi no loshang kao kho saopobü ki.” Hobaje Joshuaei kho tegü kümbei.