Read Chang Naga JOSHUA 6 Bible Online

JOSHUA 6 - Chang Naga bible

JOSHUA 6

¹Tou Israel shousi shuong to hatbüei Jerikho sangnyu kho kaangkhühtham khinkei; aokei tangto üang ayingsi aokei alot.

²Hobaje BUNYUBOUei Joshua to laukei, “Chühashi, Jerikho hoba khünei kibü Choba hoba sekbülakbü maang kaangbü mütshuong kho kaibü ika kuda.

³Hobaje wapyobü müt pendouei sangnyu kaiko che haulabü hoba kanei sangnyu kho kailabü; kho tegü ong kanei chalou lak kümlabü.

⁴Hobaje ungshedbou nyetei sanlon laangei kümbü teklaang nyet Ngühkhüm Busen thedanga junglabü; hoba nyetbounyet kanei sangnyu kho nyetnei kailabü hoba ungshedbou shuongei teklaang kho metlabü.

⁵Hobaje ladang haoenei sanlon laangeibü teklaang ngüh kho ditlaje kheijinei müt pendouei ngüh yaangbüei ngeklabü, hoba sangnyu kümthang kho shimde tuonglabü, hoba müt pendou lulu tangbou tangshaitham haulabü.”

⁶Hibü Naneibü shou Joshuaei ungshedbou shuong ngakei hoba haoen to laukei, “Ngühkhüm Busen kho lengashi hoba BUNYUBOUeibü Ngühkhüm Busen thedanga ungshedbou müt nyet la sanloneibü laang teklaang pem nyet jungtiashi.”

⁷Hobaje haoenei mütshuong to laukei, “Meimeiashi, hoba sangnyu kho kaiashi hoba in si aubu jungbü mütshuong kho BUNYUBOUeibü Ngühkhüm Busen thedang to hautiashi.”

⁸Hobaje ladang Joshuaei mütshuong to joyokei, ungshedbou müt nyet khoei sanloneibü laang teklaang kho metkei hoba BUNYUBOUeibü thebülanbü Ngühkhüm Busen kho haoen yoto phai sembei.

⁹Hobaje insiaubu jungbü mütshuong kho teklaang metbü ungshedbou thedang to haukei, hoba phaibou tan kho Ngühkhüm Busen phaito sembei, hoba haoen haujinei ungshedbou shuongei teklaang metko haukei.

¹⁰Hobaje Joshuaei mütshuong la ngühkhüm kuko laukei, “Kan to ngekashi dogo sengkubü chalou asühshongko kanei angeklabü, ayingsi kanei ngühlang kho teditti, ayingsi ngüh che ongkei kaneibü sembung ka telongti, hoba kho phaia ong kanei ngeklabü.”

¹¹Kho tegü BUNYUBOUeibü Ngühkhüm Busen kho la sangnyu kho che kaijembo haoei hautikei, hoba haoen shaishang khüto haukei hoba khünei otkei.

¹²Hobaje Joshua ngeyang enyu pikei hoba ungshedbou shuongei BUNYUBOUeibü Ngühkhüm Busen kho lengkei.

¹³Hobaje sanloneibü laang teklaang nyet jungbü ungshedbou nyet kho BUNYUBOUeibü Ngühkhüm Busen thedang to athakko haukei, hoba teklaang kho metkei, hoba in si aubu jungbü mütshuong kho haoen thedang to haukei hoba thonbü tan kho BUNYUBOUeibü Ngühkhüm Busen phaito loukei; haoen hauko kian ungshedbou shuongei teklaang metko haukei.

¹⁴Hobaje nyibounyet haoenei sangnyu kho che kaikei, hoba shaishang to sepeijung longaikei; kho tegü haoenei chalou laknyet kümbei.

¹⁵Hobaje nyetbounyet haoenei ngeyang enyu ushen ngeko pikei hoba shaangbou tegü sangnyu kümthang kho nyetnei kaikei.

¹⁶Hobaje nyetboubüa ho longkei, ladang ungshedbou shuongei teklaang kho metkei, Joshuaei mütshuong to laukei, “Ngekashi, aishanga BUNYUBOUei kan la sangnyu kho kua.

¹⁷Hobaje sangnyu hoba khünei kibü pendou BUNYUBOU la leilula khümbo kulabü; asangalan sao Rahab sao hoba saoeibü chema kibü shuong ong lang kilabü, aieilausi senei hautibü ngühlang künbü shuong saoei huan phokei.

¹⁸Lausi dogokei kan shangaje khübü leilula khümbo kubü peisilei ka kan lulu bangan kishi, khei ayinglonga kanei ho khümbo kujinei, kanei khümbo kubü peisilei lean, khoei kanei Israelbü shaishang to shetsikhau sungbalabü hoba khonkutilabü.

¹⁹Lausikei hon, chadinam pendou, hoba chinam hoba nameibü thung shuong kho BUNYUBOU thedanga saopobü ki, khübü kho BUNYUBOU thanshang lamjung sungbajan.”

²⁰Hibü mütshuongei ngekkei hoba ungshedbou shuongei teklaang kho metkei; hoba ladang teklaang ngühlang kho ditkei noknyühei kaang ngekkei, hoba kümthang kho shimde tuongkei; hibü müt pendou lulu thedang to tangshaitham sangnyu khüto atkei, hoba haoenei sangnyu kho lekei.

²¹Hobaje haoenei sangnyua kibü bousu hoba yaksa, nashou hoba chingbü, masu pongsu hoba sanlon hoba gadu pendou inei shemtikei.

²²Hobaje Joshuaei kaonyek shuchühbü müt nyi kho to laukei, “Asangalan sao chem to atashi hoba kanei sao to theyolanyobü tegü yaksanyu hoba saoei kibü khüka sungba.”

²³Hobaje shu- chühbü heshou shuong kho atkei, hoba Rahab hoba saoeibü bou hoba nyu, saoeibü jaisinasi shuong, hoba saoei kibü pendou leian longkei. Haosi hamei saoeibü chempen pendou yoan leian longkei, hoba Israelbü shaishang napheinei haoen phokei.

²⁴Hobaje haoenei sangnyu hoba khünei kibü pendou wanei jikan apbukei hoba hon si chandinam hoba chinam hoba namei kümbü peisilei shuong haoenei BUNYUBOUeibü thanshang chema phokei.

²⁵Lausikei asangalan sao Rahab, hoba boueibü chempen hoba saoei kibü Joshuaei langkei khümenkei, hoba sao Israelbü yoa tat sühko kia, aieilausi saoei Joshuaei Jerikho pheian chühla hautibü ngühlang künbü shuong huan phokei.

²⁶Hobaje kho jiha Joshuaei haoen to nyen phongko laukei, “Aoei ho Jerikho sangnyu dangngaila thungeijangeilaje, kho müt kho BUNYUBOU thedanga shedsikhau yingshi. Haoeibü shou jaishouboueibü langkeiei haoei sangnyu chemshang kho ten khanglabü, hoba haoeibü shou napeibou langkeiei bakhün yaüngailabü.”

²⁷Kho tegü Joshua yoa BUNYUBOU yoan kikei, hoba haoeibü nyen kaonyek pendoua kikei.