Read Chang Naga JOSHUA 7 Bible Online

JOSHUA 7 - Chang Naga bible

JOSHUA 7

¹Lausikei Israel shousi shuongei asakkubü peisilei aenei maang alanbü shanga Jihuda phang Zeraeibü shou Zabdiereibü shou Karmieibü shou Akhanei asakkubü peisilei künkei, hibü Israel shousi khulimbo BUNYUBOU khau angkei.

²Hobaje Joshuaei Jerikho ka Bethaven nyangko Bethel chaangbou aenei kibü Ai to mütshuong hautikei, hoba haoen to laukei, “Angashi hoba kaonyek shuchüh- ashi,” hoba mütshuong angkei hoba Ai shuchühkei.

³Hobaje haoen Joshua jungto sepeijung longeian laukei, “Mütshuong pendouje tüangti, müt hajar nyi ayingsi sem ong angtishi, hoba Ai kho shiashi, müt pendou hauan hüla manglabü tehuongei, aishanga haoen shijo ong ki.”

⁴Hibü khito hajar sem thüng ong angkei, hoba haoen Aibü thedang ka satkei.

⁵Hobaje Aibüei haoen khujin to lak thüng haitikei, hoba haoen bakhün ka Shebarim sühko shijung louan haoen yanko kijinei haitikei hoba mütshuongeibü maang tühnyinkei hoba deila yeikei.

⁶Hobaje Joshuaei haoeibü nei jitnyinkei, hoba BUNYUBOUeibü Ngühkhüm Busen thedanga kaoa haoeibü the khüman hao hoba Israelbü jaishou shuongei chasem sühko khüpetkei, hoba haoenei haoeneibü khua tham mokan jinkei.

⁷hoba Joshuaei laukei, “Ügütü! O BUNYUBOU Mühghaü, kün Amorbü ika khümbo kuan kün maula shanga nyi aila habü mütshuong Jordan danko leian loukei? Kün Jordan thidang to hauan kibü maibou yingkhoulabü:

⁸O BUNYUBOU, Israelbü touje haoeneibü dangbou ka satjung louda; ngei ai laula!

⁹Aishanga Kananbüei hoba kaonyeka kibü pendouei ho ditlabü hoba kün kaileplabü hoba küneibü nyen kaodak ka wapan aplabü, hoba kaibü yaangenbü nyen shanga nyi ai kümla?”

¹⁰Hobaje BUNYUBOUei Joshua to laukei, “No piashi, ailaibü kho tegü kaibü thenyek kao ae khü- petan kida?

¹¹Israelei shedbü shona haü, ngei haoen la sakkubü thebülanbü haoenei leilua; tokei haoenei khümbo kubü peisileikei küna, haoenei koka hoba haoenei huan phokei hoba haoenei kho haoeneibü peisilei yoa phoa.

¹²Hibü Israel shousi shuongei haoeneibü dangbou thedanga aloen, haoen dangbou shuong thedangka satda, aieilausi haoen shedsikhau baukei. Kanei khümbo kubü peisilei kho kan ka amautilonga; touje ngo kan yoa yola athük.

¹³Pienashi hoba mütshuong saüenashi, aieilausi Israel Mühghaü BUNYUBOUei hai laukei, ‘Kan yoa khümbo kubü peisilei kia.’ O Israelbü kanei khümbo kubü peisilei kho kan yoka asungen shongko kanei kaneibü dangbou thedanga aloenlabü.

¹⁴Hibü ngeyang kan phang phang hoba BUNYUBOUei pienbü chempen chempen hoba BUNYUBOUei pienbü chemdang chemdang hoba BUNYUBOUei pienbü mütpem mütpem leian louashi.

¹⁵Hobaje aoei khümbo kubü peisilei kho jungkei hao hoba haoei kibü pendou wanei juokettilabü, aieilausi haoei BUNYUBOUeibü thebülanbü kho leilukei hoba Israelbü la yaütang nyenshed sungbakei.”

¹⁶Hibü Joshua ngeyang enyu pikei, hoba Israelbü kho phang phang nyangko leian loukei, hoba Jihuda phang kho pienkei.

¹⁷Hobaje Jihuda phang hao jungto nyangko leibakei hoba Zerabü phang pienkei hoba Zera chempen mütpem che che loutikei, hoba Zabdi pienkei.

¹⁸Hobaje haoei haoen chempen mütpem che che nyangyoko leian loukei, hoba Jihuda phang Zera shou Zabdi shou Karmi shou Akhan pienkei.

¹⁹Hobaje Joshuaei Akhan to laukei, “Kü shou; Israel Mühghaü BUNYUBOU la nyen kuashi, hoba hao to shedbü thekuashi dogo ngei ka to sudajada; hoba nyi ai kümbei kho kü ka huan aphoko kü la tou lenashi.”

²⁰Hobaje Akhanei Joshua to laukei, “Maimaitham Israel Mühghaü khulimbo ngei shabü shona hoba ngei ho tegü kümbei,

²¹ladang sangshibü peisilei yoa Shinarbüei danga yukbü mangsho che, chandinam shekel sao an hoba hon ontou che yaüan chühbüa shekel anjinsem ngei hapbei, kheijinei khübü kho ngei dühkei, hoba khübü kho ngei lekei hoba chühashi, ngeibü neichem maang- a chandinam kho phang lean ngei khübü kho kaoa khünan phoakei.”

²²Hibu Joshuaei hangangbü shuong hautikei, hoba haoen neichem khüto laangjung loukei hoba chühashi, chandinam kho phang lean, kho haoeneibü neichema khünan kikei.

²³Hobaje haoenei khübü kho neichem mangka sungenkei hoba haoenei khübü kho BUNYUBOU thedanga phokei.

²⁴Hobaje Joshua hoba hao yoa kibü Israelbü pendouei Zeraeibü shou Akhan hoba chandinam hoba mangsho hoba hon ontou hoba haoeibü shousi shuong hoba haoeibü yaksa shousi shuong hoba haoeibü masu hoba haoeibü gadu hoba haoeibü sanlon, haoeibü nei- chem hoba haoei kibü pendou hian haoenei khübü pendou Akhor pholi to jungan loukei.

²⁵Joshuaei laukei, “Aila nyi kün khonkutikei? BUNYUBOUei no tat khonkutilabü.” Hobaje Israelbü pendouei hao to laangei tetkei, hoba haoenei khübü kho laangei tetettikei hoba juokan apbei.

²⁶Hobaje haoenei hao thüka laangshaang yangbü che shaangkei, kho tat sühko kia, hoba BUNYUBOUei hao hatlamoklabü khau lotbü ka sepeikei. Khoei tat sühko kho kaonyek to Akhor pholi dogo lauda.