Read Chang Naga JOSHUA 8 Bible Online

JOSHUA 8 - Chang Naga bible

JOSHUA 8

¹Tou BUNYUBOUei Joshua to laukei, “Tehüt, ayingsi maang tekou, wapyobü mütshuong pendou kayoa leian meimeiashi, Ai to angashi, chühashi, ngei kaibü ik to Ai Choba, hao mütshuong hoba haoeibü sangnyu, hoba haoeibü kaonyek kua.

²Hobaje nyi Jerikho hoba khoeibü Choba to jungeibü phatko nyi Ai hoba khoeibü Choba tokei kümlabü; khünei sangshibü peisilei hoba samkeisamuk kho ong kanei soletbü peisilei tegü künlabü, sangnyu kho khulimbo kho phainei khünei huan kiteishi.”

³Hibü Joshua hoba wapyobü müt pendou Ai to haula meimeikei, hoba Joshuaei lakjaibü müt hajar khujin pienan haoen kho nangnak hautikei.

⁴Hobaje haoen la sakkuko laukei, “Chühashi, sangnyu kho khulimbo kanei la tholabü, sangnyu phai aenei khünei sangnyu kho ka saako tohau, lausikei kan pendou lamlean kishi.

⁵Kheijinei ngo hoba kü yoa kibü müt pendou sangnyu nyangko anglabü, hoba ladang haoen kün khulimbo loulaje, shaangla tegütham künei haoen thedang ka satkulabü.

⁶Hobaje kün haoeneibü sangnyu ka bangjung asat shongko sangnyu khüka haoen kün khulimbo longlabü, aishanga haoenei laulabü, ‘Shaangla tegütham haoen sen thedang ka satda,’ kho tegü künei haoen thedang ka satlabü.

⁷Hobaje kanei la thoshang ka longlabü hoba sangnyu kho leashi, aishanga BUNYUBOU kaneibü Mühghaüei kaneibü ika kho khümbo kulabü.

⁸Hobaje ladang kanei sangnyu kho shian aplaje, BUNYUBOUei laubü tegü kanei kümlabü lele khei sangnyu khünei kanei wan sapbulabü; chühashi, ngei kan la sakkua.”

⁹Hobaje Joshuaei haoen hautikei hoba haoen la thola haukei hoba Ai chanep ae Ai si Bethel kanglanga kikei, lausikei khüyou kho Joshua mütshuong yoa kikei.

¹⁰Hobaje Joshua ngeyang enyu pikei, hoba mütshuong huishaikei hoba hao hoba Israelbü jaishou shuong Aibü thedang to angkei.

¹¹Hobaje müt pendou khei hao yoa kibü wapyobü mütshuong yoan angkei hoba nyangko yoshaikei hoba sangnyu thedang to loukei, hoba Ai chanep phei aenei shaikei hoba khünei hao si Ai haosi kanglanga yomang che kikei.

¹²Hobaje haoei müt hajar ngao thüng pienkei hoba Ai si Bethel kanglanga sangnyu chanep aenei haoen la thokei.

¹³Kho tegü haoenei müt shuong kho khei sangnyu chanep pheia kibü tan khokei yoan meimeitikei hoba Joshuaei khüyou khünei otkei.

¹⁴Hobaje ladang Ai Chobaei kho hapbei, haoenei la pangan tongde pikei hoba sangnyua kibü mütshuong hao hoba haoeibü müt shuong pendou Araba thedanga janenbü jih tükdea Israelbü khulimbo lason to haukei, lausikei sangnyu napheinei tan che hao khulimbo la thokei dogo haoei ange.

¹⁵Hobaje Joshua hoba Israelbü pendouei athükbü tegü haoen thedanga lenkei, hoba yam aeto satkei.

¹⁶Hobaje haoen shijung haula sangnyua kibü pendou huishaikei, hoba haoenei Joshua shijung haukei hoba haoen sangnyu ka bangjung loukei.

¹⁷Hobaje Israelbü phai ohaubü müt che ongkei Ai si Bethela jouan akitei, hoba haoenei sangnyu kho alombo kaijembo apyoan Israelbü shuong kho shijung haukei.

¹⁸Hobaje BUNYUBOUei Joshua to laukei, “Kaibü ika kibü aubu kho Ai aeto attiashi, aishanga ho ngei ka la kua;” hoba Joshuaei haoeibü ika kibü aubu kho sangnyu aeto attikei.

¹⁹Hobaje la thoan kibü dan kho tongde hauan kishang ka longkei, hoba haoei ik kho sengbüyam haoen laangjung longkei, hoba sangnyu khüto atan kho shian apbei hoba haoenei panteiko sangnyua wan sapbukei.

²⁰Hobaje ladang Aibü shuongei phai chühngaikei haoenei hapbei, hoba chühashi, sangnyu ka longbü wankhük kho müh sühko angkei hoba haoen hito, thito lae aeto satla huon ühüp, hoba yam to linjung satbü mütshuongei sepeinyu haoen shijung haukei.

²¹Hobaje ladang Joshua hoba Israelbü pendouei huan kibü tan khoei sangnyu kho lebü hoba sangnyu ka longbü wankhük hapbei, kheijineitham haoenei nyibou sepeikei hoba Aibü mütshuong kho haitikei.

²²Hobaje lubü shuong kho sangnyu ka haoen khulimbo longkei, haoen jijineikei Israelbü kanglanga kikei; at hinei hoba at thinei hoba haoenei haoen kho aokei ajoutiko hoba asattiko haitikei.

²³Hobaje haoenei Aibü Choba kho lang lapan hao kho Joshua jungto leibakei.

²⁴Hobaje ladang Israelbüei yama haoeneibü labou shieikei hoba haoen pendou ashem shongko inei tuongtikei, kheijinei Aia kibü pendou thonleko haitikei, hoba Israelbü pendou Ai to longeikei hoba kho inei shemtikei.

²⁵Hobaje khünyet tuongbü müt khei Aibü pendouei bousu yaksa yoan hajar anthüknyi kikei.

²⁶Aishanga Aia kibü müt leimailela amautishongko Joshuaei aubu litibü ik asepei.

²⁷BUNYUBOUei Joshua la sakkubü ngüh tegü Israelbüei shatsinam hoba peisilei haoen shanga sangnyu makletbü nyaksinam tegü künlangkei.

²⁸Hibü Joshuaei Ai jikan apbukei hoba ponpen shanga kho kaoen ontolou che la ong yeitikei, tat sühko kho maubü sangnyu che ong ki.

²⁹Hibü haoei Aibü Choba chasem sühko bunyu chenei saükei hoba chanyu neplamto Joshuaei ngühkhüm kukei hoba haoenei bunyu ka haoeibü mang sungletkei hoba kho sangnyu bakhün to atshanga phokei hoba tat sühko laangshaang yaangbü che shaangan kia.

³⁰Kheijinei Joshuaei Ebal shongha Israel Mühghaü BUNYUBOU shanga lemshang che kümbei.

³¹BUNYUBOU khangenbou Mosaei Israel shousi shuong la sakkubü tegü hoba Mosa Ngühkhüm lea doan kibü tegü laangei lemshang che kümbei laobou thüka aoeikei namshem che ongkei ajungei hoba khünei haoenei BUNYUBOU la juokbü lembü hoba sangmei lembü kukei.

³²Hobaje haoei laang thüka haoei dobü Mosaeibü Ngühkhüm chühletan, Israel shousi shuong thedanga dokei.

³³Hobaje Israelbü pendou hoba haoeneibü leiyeibü shuong hoba songdak jaishou shuong hoba haoeneibü matjembü shuong, ngühkhüm busen jiaepheinei phokei, hoba naphei chenei Levi ungshedbou thedanga BUNYUBOUeibü Ngühkhüm Busen jungbou hoba sangbüshou hoba yenbou pendou haoen jamde Gerazim thedangto hoba jamde Ebal shongh thedanga lokei, aishanga BUNYUBOU khangenbou Mosaei sakkubü tegü Israelbü shaang haükujan.

³⁴Hobaje longche haoei ngühkhüm le pendoua doan kibü tegü haülabü hoba shedsikhau ngühkhüm pendou wean chühkei.

³⁵Mosaei sakkubü ngüh pendou che ongkei üpbo Joshuaei Israelbü tan pendou, yaksa shuong, nashou hanbü shuong, hoba haoen yoa yenla lean kibü pendou kaman kian wekei.