Read Chang Naga JOSHUA 9 Bible Online

JOSHUA 9 - Chang Naga bible

JOSHUA 9

¹Ladang Jordan napheinei kibü shongh kaodak hoba pholi kaodaka kibü hoba Lebanon thedanga Yungnyu Yaangbü yungkoa kibü Hitbü, Amorbü, Perizbü, Hivbü hoba Jebusbü Choba pendouei kho ditkei,

²haoenei Joshua hoba Israelbü to wapyola maangpon chela lean liko yoshaikei.

³Lausikei ladang Gibeona kibü mütshuongei Joshuaei Jerikho hoba Ai to ai kümbei kho ditkei,

⁴haoenei lepbolangko kümbei hoba haoen ngühthonbü shuong tegü yeikei, hoba haoenei nyingkou hangbü hoba jephot hangbülangbü lühei khühetbü haoeneibü gadu taaka künkei.

⁵Hobaje ngok hangbü shibülebü haoeneibü youa yukkei hoba neisimei hangbü haoenei lekei, hoba haoeneibü shausiyung wentek pendou kho linbü hoba monpungan apan kikei.

⁶Hobaje haoen Joshua jungto Gilgala shaishang to haukei hoba hao hoba Israel mütshuong to laukei, “Kün kaonyek saabü ka loukei, hibü tou kanei kün to yenshik che kümashi.”

⁷Hobaje Israel mütshuongei Hivbü to laukei, “Aingenyu kan kün yoa kibü müt nyangbükei yinglabü, lai küman kan to yenshik che kümla?”

⁸Hobaje haoenei Joshua to laukei, “Kün kaneibü sambü ki” hoba Joshuaei haoen to laukei, “Kan aoyou? hoba kan lae ka loukei?”

⁹Hobaje haoenei hao to laukei, “BUNYUBOU kaibü Mühghaü nyen phongko kaibü sambü shuong kaonyek saabü ka loukei; aishanga künei hao shanga hoba haoei Ijep kaodaka kümbü pendou

¹⁰hoba Jordan danjung hauan kibü Amorbü Choba müt nyi to kümbü pendou, Heshonbü Choba Sihon to hoba Ashtarota kibü Bashanbü Choba to kümbü dida.

¹¹Hobaje küneibü jaishou shuong hoba kün kaodaka kibü pendouei kün to laukei, ‘Lam shanga shausiyung kaneibü ika jungashi hoba haoen shuokla hauashi, hoba haoen to lenshi: ‘Kün kaneibü sambü, hibü kanei tou kün to yenshik che leashi.’

¹²Kan jungto loulabü chaloua ho wentek küneibü shausiyung shanga chem ka lematham jungan loukei, lausikei tou chühashi kho lina, hoba monpunga;

¹³hoba künei takbü ih shongmok haanbü kikei, lausikei chühashi, khübü kho paknyina hoba kün lama lounyu paibüei küneibü neisimei hoba ngok hanga.”

¹⁴Hobaje BUNYUBOU ka apheko Israel mütshuongei shausiyung sungletkei.

¹⁵Hobaje Joshuaei haoen to yenshik kümbei, hoba haoen lang kitila theyolanyobü che kümbei, hoba shuong yoa leiyeibü shuongei haoen to ngüh linyokei.

¹⁶Hobaje haoenei haoen yoa sangmai küman chalou semnyet kian phaia haoen kho jembü lepsang hoba haoen yoa kida dogo ditkei.

¹⁷Hobaje Israel shousi shuong wakou haukei, hoba sembounyet haoen sangnyu shuong to loukei. Haoeneibü sangnyu Gibeon Kefira, Beerot hoba Keriatjearim kikei.

¹⁸Hobaje Israel shousi shuongei haoen to awap, aishanga shuong yoa bunyu shuongei Israel Mühghaü BUNYUBOU nyena haoen to thealana hoba shuong pendouei bunyu shuong to nyamnyambei.

¹⁹Lausikei bunyu shuongei shuong to laukei, “Israel Mühghaü BUNYUBOU nyena künei haoen to thealana, hibü senei haoen to meitila athük.

²⁰Kho tegü senei kümlabü hoba haoen lang kitilabü, kho khei ayinglonga senei haoen to thebülanbü laüa Mühghaüeibü khauang sen thükto lotlabü.”

²¹Hobaje bunyu shuong khoei haoen to laukei, “Hao lang kitiashi, hoba bunyu shuongei haoen to lenbü tegü tan pendou shanga haoen pendou bushenbü hoba deikhubü la yeikei.”

²²Hobaje Joshuaei haoen ngakei, hoba haoei haoen to laukei, “Kan kün yoa kian, ‘Kün kan ka lounyu hauan kia,’ dogo aila lepettida?

²³Hibü tou kan shedsikhau la yeia hoba ngeibü Mühghaü phang shanga deikhubü hoba bushenbü la yeian aaothu ka ladangkei abanglabü.”

²⁴Hobaje haoenei Joshua to laukei, “BUNYUBOU kaibü Mühghaüei hao khangenbou Mosa to kan la kao pendou kulabü, hoba ho kaodaka kibü pendou kan thedang ka mautilabü dogo sakkubü kho kaibü sambü shuong to shangashatko lenkei, khoei künei lulueibü langkei shanga kün aeibou hatan apbei, hoba ho kümsilei kümbei.

²⁵Hobaje tou chühashi, kün kaibü ika kia, hoba nyi kün to kümlabü ai tükde hoba maiakei dogo chühenda kho kümshi.”

²⁶Hobaje haoei haoen to kho tegü jungeikei hoba Israel shousi shuong ik ka leiyenkei hoba haoenei haoen ühaiti.

²⁷Hobaje tat sühko haoen kho shuong shanga hoba haoei pienbü shanga bushenbü hoba deikhubü shanga Joshuaei khünyet khangenkukei.