Read Chang Naga 2 THESALONIKA 1 Bible Online

2 THESALONIKA 1 - Chang Naga bible

2 THESALONIKA 1

¹Ho le, Paul, Silvana hoba Timoti ka, seneibü Bou Mühghaü hoba Bunyubou Jisu Khristaeibü Thesalonika lashong jungto.

²Bou Mühghaü hoba Bunyubou Jisu Khrista ka kan jungto onou hoba hakso yingshi.

³Jaisinasi shuong, künei kan shanga Mühghaü la nyensang kubü athakjan. Ho mujemukei, aieilausi kaneibü mailem chingda hoba kan jenabou si jenabou sanouyobü haada.

⁴Hibü kan shieikoe hoba khonsak pendou, laobou kanei aman apda, khübünei kaneibü mailem hoba natenbü shanga Mühghaü lashong pendoua künei kün lolo kan shangabü yaangenda.

⁵Hobaje Mühghaü Sangle laobou shanga khonsakda kho Sangle shanga kan mubü weeilabü kan khonsak kho Mühghaü ngühmai matjembü tang khitbü amaaphilabü ki.

⁶Maimaitham kan khonkutibü dan la khonku kungeilabü; honei Mühghaü ngühmai ki,

⁷hoba Bunyubou Jisu wanlüha hao hau kibü haoeibü khuthük hangangbü yoa khuthük ka tang khitjinei, kan khonsak hapbü shuong la, kün yoa hakso kukho.

⁸Mühghaü angebü shuong la, hoba seneibü Bunyubou Jisu Ngühlang Maibü ngüha alebü shuong la phoklam kulabü;

⁹hoba haoeneibü kayang thon akibü leilubü hoba Bunyubou jungka hoba haoeibü thükenbü soneikangbü ka mauan apbü kilabü.

¹⁰Kho chaloua ladang hao haoeibü saopobü shuong ka nyenhang hapla hoba hao to mailembü shuong ka soumo hapla shanga loulalje kheijinei kho haüthüklabü. Khünei kankei yoakei, aieilausi künei kan jungto sungbabü aukabü to kanei mailembei.

¹¹Khoei, seneibü Mühghaüei kan haoei ngabü muko weeitila künei ponpendou kan shanga welaukuda. Kanei maibü hoba penbüsoubü shanga maangdakbü hoba mailem ka longbü kaneibü kümsilei pendou hao seiei haüthüktiashi dogo künei welauda.

¹²Seneibü Bunyubou Jisu nyen kan yoa soneikanglabü hoba kan haoeibü yingbü shanga kankei soneikanglabü dogo künei welauda. Seneibü Mühghaü hoba Bunyubou Jisu Khristaei kho onouei loushadtiashi.