Read Chang Naga 2 THESALONIKA 2 Bible Online

2 THESALONIKA 2 - Chang Naga bible

2 THESALONIKA 2

¹Jaisinasi shuong, Bunyubou Jisu Khrista loulabü hoba sen chela takshatlabü shangabü,

²Bunyubou Chalou tou yingkei dogo tetenbü ngühei yingasikei, ngühei yingasikei, kün ka yingkei dogo lauko leei yingasikei, kaneibü maangpon phühde anyaakeitila ayingsi maang amaula shanga künei kan to sudajada.

³Aineikei aolakei kan tehuonetti; aishanga shangla Khüpyobou yaangbou kho alou shongko, hoba shabü müt, kho mangsenlabü shou, tang akhitti shongko ho akilabü.

⁴Mühghaü nyen phongbü hoba lembüsabü ai ong ki haoei khulimlabü hoba hao lolo thükkabou to tonenan Mühghaü lembüchema setan, jembü lolo hao Mühghaü dogo laulabü.

⁵Ngo kan yoa kijinei ngei kan la ho lenko kikei dogo kanei adamenda lo?

⁶Hobaje hao jembü jihaphaia tang khitla shanga, hao to aiei senetda, kho kanei ngeakei.

⁷Aishanga ngühkhüm attibouei huphanga touje kümsilei kümkhanga; lausikei aoei senetda hao angailang shongko ong kho tang akhittien.

⁸Hobaje ngühkhüm dubou kho khoyam tang khitan aplabü. Kheijinei Bunyubou Jisu haoeibü soneikangbü pendoua loulabü; hoba haoei hao thükto hakei metlabü hoba hao haitilabü hoba haoei sei pendou langkulabü.

⁹Ngühkhüm dubou loubü kho Satan sei danko tang khitlabü hoba khonei amlangbü seikümseilei, amaaphilabü hoba maang- panglabü thonan kilabü.

¹⁰Khübü maulabü mütshuong kho amaiko khüpettilabü aieilausi haoenei haoen khümenlabü ngühlang olinko asunglet.

¹¹Khoei Mühghaüei haoen la khüpbülangbü hautikukei hoba haoenei amlangbü to tükde dogo mailemda,

¹²hibü khoei aoyou ngühmai to mailembo amaibüa olinyoda, khübü pendou matjem phangto lotlabü.

¹³Lausikei Bunyubouei sanoubü jaisinasi shuong, kan shanga künei Mühghaü la nyensang kula ponpen janbü ki, aishanga Soushouei saüenbü hoba ngühmai mailembüa khümenbü shanga Mühghaüei khangbü ka thama kan pienkei.

¹⁴Bunyubou Jisu Khrista soneikangbü janyola shanga haoei künei sungbabü Ngühlang Maibü danko kan ngakei.

¹⁵Hibü jaisinasi shuong, kaangkhühtham loashi, hoba küneibü lea yingasikei, ngühei yingasikei, kan to ai ngüh lenkei kho kangkhühtham hatlepashi.

¹⁶Tou hao seneibü Bunyubou Jisu Khrista, hoba seneibü Bou Mühghaü, aoei sen to sanoukei, hoba sen la onou danko ponpen thon akibü hakso hoba maanglem maibü kukei,

¹⁷haoei kan maang- pon haksotiashi, hoba kümsilei hoba ngüh maibü pendoua kan kaangtiashi.