Read Chang Naga 2 THESALONIKA 3 Bible Online

2 THESALONIKA 3 - Chang Naga bible

2 THESALONIKA 3

¹Thon leko, jaisinasi shuong, ailai kanei Bunyubou ngüh yeililanglia aatida, kho tegü künei kila shanga,

²hoba daman achühbü hoba amaibü mütshuong ka kün püetlabü lele kün shanga welaukuashi; aieilausi pendoueije mailembei aying.

³Lausikei Bunyubou maanglemenbü ki; haoei kan hau kingaitilabü hoba amaibou ka kan lomatlabü.

⁴Hobaje künei kan la kubü ngühkhüm kanei kümda, hoba tokei kümlabü dogo kan shanga Bunyuboua künei mailem ki.

⁵Hobaje Bunyubouei kaneibü maangpon Mühghaü sanou jungto hoba Khrista natenbü jungto leiashi.

⁶Jaisinasi shuong, kün ka ditletbü tegü apaiko hauloko shoongaibü jaisina tan ka sukngailangashi dogo seneibü Bunyubou Jisu Khrista nyena künei kan la sakkuda.

⁷Aishanga ailai kanei kün chühletjan kanei kan lolo ngekei. Aishanga kün kan yoa kijinei ohaulo.

⁸Kün la oknyinbü pendou shanga künei mu kukei. Kan dan ao shangakei onat ayingtila shanga künei chalou nangnak haujembo hoba hüshuokko kümbeileikei.

⁹Kho kün kanei pangtei onoujan ayingbü ka ji, lausikei kanei kün chühlettila shanga, kün lolo kan to tetsida lenkei.

¹⁰Aishanga kün kan yoa kijinei künei kan la hai sakkukei: müt atei akümalei longa, haoei ashau ayunglabü.

¹¹Aishanga kan yoa atei haulo haushedko akümaleiko kümsilei hansho ongkei akümda, lausikei jim akibüa shoongaida dogo künei ditda.

¹²Tou takshatbüa haoenei kümsilei kümashi, hoba haoenei jembü shausiyung shauashi dogo, kheibü tan to Bunyubou Jisu Khristaa künei ngühkhüm kuda hoba thungeida.

¹³Lausikei jaisinasi shuong, kümsilei maibü kümbüa obünongbü tekima.

¹⁴Hobaje müt atei ho lea künei dobü ngüha alelonga, kho müt tetdangan phoashi, hoba hao himoutila shanga kanei hao to teyang.

¹⁵Khei yingasikei hao dangbou tegü tejungei, lausikei jaisina tegü thungeiashi.

¹⁶Tou haksotibou Bunyubouei haoei lolo kümsilei pendoua pendou aenei kan la hakso kushi. Bunyubou kan pendou yoa kishi.

¹⁷Ngeibü salem ngüh ngo, Paulei jembü ikei doda; kho kü le pendoua amaaphilabü ki; ngei khei doda.

¹⁸Seneibü Bunyubou Jisu Khrista onou kan pendou yoa kishi.