Read Chang Naga 1 TIMOTI 3 Bible Online

1 TIMOTI 3 - Chang Naga bible

1 TIMOTI 3

¹“Atei lashong lombü kümsilei mangsühalonga, haoei kümsilei maibüa maangdakda.” Ho mubü ngüh ki.

²Aishanga lashong lombou che kho shedbü akibü, yak cheeibü lao, eaaoabü, thepetbü, hoba tedtangbü langkei yingjan. Hao yenmangshikbü hoba lenlo maibou yingjan.

³Hao ih to khambü müt ayingjan. Hao sekbülakbü aying lausikei semet- ametbü hoba themai maangmai yingjan. Hao nam to khaubü müt ayingjan.

⁴Haoei hao chemdang maisho song takenbü hoba jembü shousi shuong soumo phanga küpletthako thepetenbü müt yingjan.

⁵(Müt cheei hao chemdang songdak ajungen longa haoei lai küman Mühghaü lashong che thounoula?)

⁶Yonglam khuian shabü mühghaü che atetbü tegü jeteibü matjema atetsi amaibula hao kho tou nyangko songlela lotbü müt ayingjan.

⁷Khüto liman hao nyikubü ühüplabü hoba shabü mühghaü sunga aminlabü shanga, tangkabü shuong ka hao aukabü maibü hapjan.

⁸Dikon shuongkei damanchühbü yingjan. Haoen liphekbü ayingsi ih to khaubü ayingjan. Haoen nyaksinama tedtangbü yingjan,

⁹hoba sensimaang hinseibüa seneibü mailem huphang ngüh hatlepenbü müt yingyan.

¹⁰Shaangla haoen takteijan, hoba haoen to shedbü akisije, haoen dikon la leashi.

¹¹Haoeneibü yaksi shuongkei haüko damanchühbü yingjan; haoen sembung pek- pekbü aying lausikei eaaoabü hoba khümbomeiko maang lemenbü yingjan.

¹²Dikonei yak che ong kijan, hoba shousi si chemdang ham song takenjan.

¹³Aishanga aoyouei dikon kümsilei maian küma, haoen jembü lolo kümsilei maibü hoba Khrista Jisu to mailema aei maangkhaibü pailetda.

¹⁴Ngo ka jungto tongde loula maanglemda, lausikei ngo phaiko khüpsije, ngühmai thaonyu hoba keshang,

¹⁵laobou Mühghaü chem, khei langkei Mühghaü lashonga mütei lai jungeijan kho nyi ngela shanga, ngei habü ngüh doda.

¹⁶Maanga shulabü akiko seneibü songle huphang ngüh kho latetche yaangkei: “Hao phea tang khitkei, hao Soushoua janbü hapbei. Hao khuthük hangangbü shuongei hapbei, hao phangshuong yoa phinthonkei. Hao kaodak pendoua mailembei, hao soneikangbüa anlangkei.”