Read Chang Naga 1 TIMOTI 4 Bible Online

1 TIMOTI 4 - Chang Naga bible

1 TIMOTI 4

¹Soushou Saopobüei chong- chingko lauda, thonbü chaloua müt atei haoen ayinglamto leibü soushou hoba shabü mühghaü ka loubü lenbü to maang kulabü hoba haoen mailem ka atetlabü.

²Amlangbü lenbou shuong, aoyoueibü maangpon shabü mühghaüeibü amaaphilabüei shangjinan ki, haoenei huonkoyouko

³chemkanbü shiletlabü. Haoenei toukei, ngühmai ngebü mailembü shuongei hao la nyensangbü kuko sunglettila shanga Mühghaüei laobou kümbei khübü shausiyungkei atje ashautila thangetlabü.

⁴Mühghaüei kümbü pendou maibü ong ki. Asungletenlabü ai aki, lausikei ho nyensang kuko sungletjan,

⁵aishanga ho Mühghaü ngüh hoba welauei saüentida.

⁶Nyi khübü ngüh jaisinasi shuong maangpona thüngtialonga no Khrista Bunyuboueibü sambü maibü che yinglabü, hoba nyi lenbü mailem hoba nyi jungeienbü maibü songlenei no lolo soushoua chingentila thuilabü.

⁷Asaopobü hoba shangiedbü pisibou ngühli tesunglet. No lolo saopobü langkeia lenenashi.

⁸Mangsisau nongeisaebü hokei hanshoje ku, lausikei saopobü nongeisae khoje khümbo lejim kibü, aieilausi hoei toubü si loulabü langkei ham shangabü thebülanbü hatlepakei.

⁹Ho ngüh mailemlabü hoba pendouei sungletla mukei.

¹⁰Ho shangabü künei kümsilei kümda hoba haujemda, aishanga künei langkei Mühghaü, ao müt pendou hoba kongnyuleko mailembü shuong khümenbou ki, hao to küneibü maanglem phoda.

¹¹Nyi habü sakkuashi hoba lenashi.

¹²No heshou langkei yingbü shanga aolakei aweasüngko tejungeiti, lausikei kaibü ngühlau, kaibü sanou, mailem hoba hinseibüa mailembü shuong thedanga tetsida che yingtishi.

¹³Ngo aloushongko nyi Lai webü, songlenbü hoba lenbüa maangkuashi.

¹⁴Jaishou shuongei ikei shangetjinei, tetenbü thusei ngüh loushedbüei ka la kubü laobou jongsak ka to ki, kho tewailet.

¹⁵Habünei haujemashi; müt pendouei no haabüyaangbü shenlabü, no lolo haoen la khümbo kuan apashi.

¹⁶Ka langkei hoba kaibü lenbüa maangsangashi. Khei jungeiashi, aishanga khei kümbü danko no hoba ka ngüh ditbü shuong ham khümenlabü.