Read Chang Naga 1 TIMOTI 6 Bible Online

1 TIMOTI 6 - Chang Naga bible

1 TIMOTI 6

¹Aoyou buleng phanga aao la yeian ki haoenei haoeneibü bunyu to soumo kula mubü dogo weeiashi. Haoenei khei ajungeilonga Mühghaü nyen si seneibü Khristan lenbü ham kho shalabü.

²Sambü shuong aoyoueibü bunyu shuong mailembü ki, haoen jaisinasi la yeibü shanga dogoje soumo akuko akijan. Haoenei haoen aei maibou khangenjan, aieilausi aoyouei haoenei khangenbü ka pailetda khübü kho haoen to sanoubü himjam Khristan shuong ki. Habü ngüh nyi lenjan hoba thungeijangeijan.

³Müt atei lenbü phangcheei lenalonga hoba seneibü Bunyubou Jisu Khrista hoba saopobü lenbüa hehoat akilonga,

⁴hao khoje yonglamliliei khuilepa hoba ai angekei. Hao kho shatshang nyatshang. Haoei theshoubü, oyophetyo, nyikubü, maang alemenbü amaibü, hoba ihinseibü sensimaang longtibou tokyopekyobü

⁵hoba lemen khanglabü ngühang ong mangsühda. Khübü pendou kho haiyep leilubü hoba ngühmai akibü mütshuongei jungeida. Haoenei songle kho keila yaanglabü hangsilam dogo damda.

⁶Lausikei senei kibüei maang haialonga maimaitham songle kho ku yaang ki.

⁷Aishanga senei ho kaodak to ai akünba, hoba haka ai künlangla athüklabü.

⁸Senei shausiyung si neisimei kialonga khoei sen maang haijan.

⁹Aoyou keimang sühda haoen takteibüa atetda hoba ngoualouabü hoba nyekdüh maangdüh sunga minda; khübüei mütshuong leilubü hoba maubüa nyemtida.

¹⁰Aishanga nam to sanoubü kho amaibü phang pendou yemtibou li ki; hoba kho shieijinei müt atje mailem ka ayinglam to leilangan, ngangbü juongnyuei jembü lolo paiko sepbei.

¹¹Lausikei no Mühghaü müt ki hoba khübü pendou ka satenashi. Nyi ka maangpon saopobü, Mühghaü ngebü, mailem, sanou, natenbü hoba eaaoabüa phoashi.

¹²Mailem lason maibü wapyoashi. Ponpen thon akibü langkei, laobou shanga Mühghaüei no ngakei, hoba aukabü juongnyu thedanga kaibü mailem aukabü theletkei, kho langkei hatlepashi.

¹³Pendou la langkei kubou thedanga hoba Pontia Pilat thedanga aukabü ngüh maibü theletbü Khrista Jisu thedanga,

¹⁴nyi seneibü Bunyubou Jisu Khrista alou shongko, ngühkhüm nali atheko hoba anyikuko phola ngei ka la sakkuda.

¹⁵Hao loubü kho haoeibü jihsiphaia, Mühghaü, ao Haübou hoba Bunyubou Che ong, choba shuong thüka Choba, bunyu shuong thüka Bunyubou,

¹⁶hao ong ühaibou; aokei anyangenbü ngesakbüa hao kida. Aoeikei hao hapan achühkei hoba aoeikei hao hapla athük. Hao to nyenhang hoba ponpen athonbü seisihau yingshi. Amen.

¹⁷Aoyou ho kaodak salanga keibü ki, haoen asungenla ayingsi chongachingbü nyaksinama haoeneibü maanglem apholabü, lausikei Mühghaü, aoei sen pendou la ajanjan pendou souko lela kuda, hao to maanglemla sakkuashi.

¹⁸Haoenei maibü kümlabü, kümsilei maibüa keibü yingla hoba janyola lamlean kila hoba maiyola maangnyu angko kila lenashi.

¹⁹Hibü, haoenei shangashatbü langkei hatlepenlabü lele, haoeneibü nyakei namei loulabü shanga denshang kaangbü chemshang che tegü loulabü shanga thanlabü lele haoen la ngühkhüm kuko lenashi.

²⁰Timoti, ka la nongkubü lomashi. Ho kaodak Mühghaü angebü ngühsidei hoba toket khipetbü songsido laobou to amlang “Hapbüngebü” dogo lauda, khübü ka no lolo satenashi.

²¹Atei ho hapbüngebü theleda hoba mailem ka ayinglamto satan apa. Kan pendou yoa onou kishi.