Read Chang Naga 2 TIMOTI 1 Bible Online

2 TIMOTI 1 - Chang Naga bible

2 TIMOTI 1

¹Ho le, Khrista Bunyuboueibü youkoikjai yingla hoba Khrista Jisu thangjambüa thekubü langkei phinthonla shanga Mühghaü maangangbou Paul ka, haoei sanoubü shou Timoti jungto.

²Bou Mühghaü hoba seneibü Khrista Jisu ka onou, üeisanou hoba hakso yingshi.

³Ngei change nangnak ngeibü welaua ponpendou no damenjinei, ngeibü pisibou shuong ka thama sensimaang hinseibüa laobou Mühghaü to ngei khangenda, hao nyen sangda.

⁴Ka nyeksi damenko, ngo olinbüei shenlabü lele, no nyibou haüyola shanga aeibou waangda.

⁵Ngei kaibü mailem kaangbü damenda. Kapinyu Lois hoba kanyu Yunis maangpona kibü mailem kho ka maangponakei thüngan kilabü dogo ngei damda.

⁶Hibü, kü ik shangetbü danko Mühghaü jongsak laobou ka to ki, kho wanlong longtila ngei ka la damentida.

⁷Aishanga Mühghaüei sen la hattembü soushou aying, lausikei sei hoba sanou hoba thepetbü soushou kukei.

⁸Hibü seneibü Bunyubou shanga aukabü kula hoba hao shanga thüngbou kü shangabü tehimouma. Mühghaü sei to sou nongashi hoba Ngühlang Maibü laüa khonsak natashi.

⁹Mühghaüei sen khümenkei hoba hao mütshuong la lela ngaankei, khei seneibü kümeileiei ji, lausikei kho haoeibü onou nyekchüh kiteikei. Jihsiphai mokhangjineithama sen Jisu Khrista to thangjam danko onou sen la kuan kiteikei,

¹⁰lausikei ho sen khümenbou Khrista Jisu tang khitbü danko sungbakei. Haoei habü mautiko, Ngühlang Maibü danko hoba ühaibü ngesakbü kho sungbakei;

¹¹hoba kho Ngühlang Maibü shanga ngo songlendolenbou, hoba youkoikjai hoba lenbou yingla pienkei.

¹²Khoei ngo ho kümbo khonsakda. Lausikei ngo ihimouda, aishanga ngei Che, aoto mailemda, ngei hao ngekei, hoba ngei hao ika kho Chalou shanga ai ong nongkukei, kho haoei lombo kila thükakei, kho ngei chongchingko mailemda.

¹³Khrista Jisu kho seneibü thangjama kibü mailem hoba sanoua nyi ai lenbü kü ka hapbei, kho tetsida kaangkhühtham hatlepashi.

¹⁴Jongsak maibü laobou ka la nongkukei, kho nyi sen to thüngbou Soushou Saopobü danko lombo kishi.

¹⁵Figela si Hermogeni yoan Asiaa kibü pendou kü ka sepeijung sada.

¹⁶Quesfora chemdang to Bunyubouei üeisanoushi. Haoei ngo hanghangleko haksotikei, hoba ngeibü yangmen shanga hao ihimou.

¹⁷Hao Roma sühbü- yam haoei ngo ühüpshongko lameikei.

¹⁸Haoei Efesiaa ai kümsilei latetche kümbei kho nyi ngeakei. Kho Chalou khünei Bunyubouei hao la Bunyuboueibü jembü onou nahaüku.