Read Chang Naga 2 TIMOTI 2 Bible Online

2 TIMOTI 2 - Chang Naga bible

2 TIMOTI 2

¹Hibü, kü shou, Khrista Jisu to thangjambü ka loubü onou danko no hau kiashi.

²Ngei aukabü juongnyu thedanga ai lenkei nyi dida. Kho lenbü kho toukei heebü to lenla thüklabü hoba maanglemenbü mütshuong lakei nongngaikuashi.

³Khrista Bunyuboueibü sepai maibü che tegü nyikei kün yoa khonsak natashi.

⁴Sepai kümsileia kijinei, aoei hao sepai la lela hekei, hao maang haitila shanga aoeikei ho langkei kümsileia atotyoda.

⁵Hobaje louyojayobü aoeikei, haoei ngühkhüm hangeilamei ajungeilonga haoei thükbü khun hanla athük.

⁶Langlebü aoei kümdaleida haoei shaangbou mai kho janletjan.

⁷Ngei ai lauda kho damanchühshi; aishanga Bunyubouei ka la kho khümbomeiko ditentilabü.

⁸Jisu Khrista haibü ka langngaibü hoba Dawid ka thenbü damenashi. Kho ngei songlenbü Ngühlang Maibü ki.

⁹Kho shangabü ong kokbü yepeibü tegü ngo khühbüa ki. Lausikei Mühghaü ngüh kho khühan aki.

¹⁰Hibü, pienbü danei Khrista Jisu to kibü hoba ponpen thon akibü soneikangbü hapla shanga, ngei haoen shanga pendou natenda.

¹¹Ho maanglemenlabü ngüh: “Sen hao yoa haialonga, senkei hao yoa lang kilabü.

¹²Senei natenalonga, seneikei hao yoa songdaklabü. Senei hao atheletlonga, haoeikei sen atheletlabü.

¹³Sen maanglemenko akisikei, haoje maanglemenko kida, aishanga haoei jembü lolo atheletko akien.”

¹⁴Habü ho nyi haoen la damentiashi: ngüh shangabüa aoaphetyolabü shanga Bunyubou thedanga haoen la ngühkhüm sakkuashi. Aieilausi khoei apailetda; hoba ditbü shuong ong leilutida.

¹⁵Ihimoulabü lele, kümbouleibou che yeiko hoba ngühmai ngüh tükde jungenko, Mühghaüei sungletenlabü lele no hautaknepashi.

¹⁶Asaopobü ngüh lauko sembung pekpekbü ka satenashi; aieilausi khübünei yobü dan yongbou amaibou la yeilabü.

¹⁷Haoeneibü lenbü khoei imei tegü künlabü; haoen yoa Himenia si Fileta yoakei;

¹⁸haoen ngühmai ka mashikan sada. Haoenei sen langngaibü dana lauda hoba müt ateibü mailem lusakkuda.

¹⁹Lausikei mailem denshang kho kaangkhühtham loakei. Ho Mühghaüei kekei hoba honei hai doakei: “Bunyubouei haoeibü shuong ngeakei. Aoei Bunyubou nyen phongda hao amaibü ka bangenashi.”

²⁰Chem yaangbü chenei hon si chandinam peisilei ong ki aying, lausikei bu hoba thameibü peisileikei ki. Hobaje khübü ka shaangbou kho namton peisilei hoba nyiboubü kho tagübü ki.

²¹Hibü aoei jembü lolo nyiboubü khoka saüenan kilaje hao namton peisilei, Mühghaü shanga saüenbü haoeibü chembubou shanga lejim kibü hoba kümsilei maibü pendou shanga lamlean kilabü.

²²Nyi heshoudangabü dühbü ka satenashi, hoba hinseibü maang- ponei Bunyubou to ngabü dan yoa saopobü mailem, sanou hoba hakso shiashi.

²³Ngoubü hoba ngoualouabü wetyo pekyobü apyoashi; aieilausi khübüei oyo- phetyo longtida dogo nyi ngekei.

²⁴Bunyubou khangenbüei aoyojan; hao kho, pendou to sanoubü, lenlo maibou, natenbou,

²⁵hoba eaaoabüei haoeibü dangbou jakshaikubou müt che yingjan. Aingenyu haoen kho shabü mühghaüei thamtham langsenan, haoeibü sunga mintian, haoei mangsühbü pendou haoen la kümtiko kila thükkei. Lausikei haoen sinngaian hao jungka satenlabü lele, Mühghaüei haoen maangpon sepeila hoba ngühmai ngetila thuilakei thükkei.