Read Chang Naga 2 TIMOTI 3 Bible Online

2 TIMOTI 3 - Chang Naga bible

2 TIMOTI 3

¹Lausikei thonbü chalou shuonga sen thükto sekbülakbü jihsiphai lousühlabü dogo ngei kan la ngetimang sühda.

²Mütshuongei jembü nam ong sanoulabü; haoen lilisese, yonglam shamle hoba nyikubü yinglabü; haoenei nyusibou to soumo akulabü, nyen asanglabü, asaopolabü,

³hoba sanou hangsilam akilabü; haoen aonoubü, aweasüngbü, athepetenbü hoba sekbülakbü yinglabü. Haoenei maibü mangsenlabü.

⁴Haoen huonetyouetbü, jembü maangleko jungeibü hoba müleng angbü yinglabü. Haoenei Mühghaü toje jembü olin ong sanoulabü.

⁵Tangaje haoenei saopobü hangsilam jungeilabü, lausikei haoenei langkeiaje hoeibü tükdebü hau atheletlabü. Khübü mütshuong ka satenashi.

⁶Aishanga haoenei at chemto atan, shabüei sangetan dühbü phang phangei leiyeiko,

⁷ponpendou ditla haujemda lausikei ngühmai ngebü to ladangkei alouenbü, hau akibü yaksa shuong lapda.

⁸Jani si Jambriei ailai Mosa khulimbei, kho tegü khübü mütei ngühmai khulimda. Haoen maangpon lusakbü hoba mailema amubü shuong ki.

⁹Lausikei haoen lalok ohaulabü, aishanga müt pendouei haoen asangadobü haplabü. Jani si Jambri tokei khei haüthükkei.

¹⁰Lausikei noje khei aying. Aishanga nyi ngeibü lenbü, kü langkei hangsilam hoba ngeibü nyekchüh phai sembei. Nyi ngeibü mailem, natenbü hoba sanou ngekei.

¹¹Ngei Antiok, Ikonia hoba Lustraa shieikoe hoba khonsak künbü nyi ngekei. Khübü shieikoe latetche hatlabü kiteikei! Yingasikei khübü shieikoe pendou ka Bunyubouei ngo püetkei.

¹²Khristan che tegü saopobü langkei kimang sühbü pendou shieikoelabü;

¹³lausikei amaibü mütshuong si huonet youettibou shuong aei aei amaibou yeilabü. Haoenei lubü shuong khüpettilabü hoba haoen lolokei khüpettilabü.

¹⁴Lausikei noje ka la lenbü hoba nyi khümboei sungletbü ngühmai to maanglanko kiashi, aieilausi kaibü lenbou shuong aoyou yingkeije nyi ngeakei.

¹⁵Laobou Saopobü Laishibaei Khrista Jisu to mailembü danko khümenbü shanga no hapbüngebü yeitila thükda, kho nyi nashoudanga thama ngeakei.

¹⁶Mühghaü hak metan jinkubü Lai weko lenla shanga, hakla shanga, mashikbü tangtikula shanga hoba saopobü langkei kila lenla shanga mubü hoba penbüsoubü ki.

¹⁷Haoei kho ngüha lealonga, Mühghaü müt kho kümsilei maibü pendou shanga mubü hoba penbüsoubü yinglabü.