Read Chang Naga 2 TIMOTI 4 Bible Online

2 TIMOTI 4 - Chang Naga bible

2 TIMOTI 4

¹Mühghaü thedanga hoba langkeibü si haibü ham mat jemla kibou Khrista Jisu thedanga, hoba Khrista nyibou loulabü hoba hao songdakla loulabü dogo damenan, ngei ka la ho ngühkhüm sakkuda:

²nyi Ngüh kho songlenashi, jihsiphai hoba jihsiphai ayingbüa maangdakashi; ka ngüh ditbü shuong to lounyu natenbüei hakashi, haoen tangtikuashi, haoen thungeijangeiashi hoba haoen to athakko lenashi.

³Aishanga haoenei lenbü maibü to aditkulabü jihsiphai che loulabü. Khüpeinyu, nouto takbü- hitbü dan la yeiko, nyekdüh kühshuoktila shanga haoenei ditmang sühbü lentila shanga lenbou shuong uon uona pholabü.

⁴Haoenei ngühmai ka haoeneibü noukhün sepeijung ngühli ae ayinglamto satkulabü.

⁵Lausikei noje, pendoua damanchühbü kishi. No khonsakla lamlean kijan. Nyi songlendolen kümsilei kümjan. Nyi kaibü janletbü kümsilei khümtijan.

⁶Aishanga yunglabü lembü tegü ngo touje jonda, hoba ngo banglabü jihsiphai khama nyanga.

⁷Ngei wapyo maibü kho wapyoa, ngei kaopheitet sühko laanga, ngei mailem kho jungena.

⁸Touje kü shanga saopobü khun, laobou Bunyubou saopobü matjembouei kho Chaloua kü la kulabü ki, kho phokuakei; hoba kü la ong aying, lausikei aoyouei hao loulabü sanouko chüheida, haoen lakei pendou la kho kulabü.

⁹Kü jungto tongde loula nyi haujemashi.

¹⁰Aishanga Demaei ngo apyoa. Haoei ho kaodak to aei sanoukei hoba hao Thesalonika to satan apa. Kresken Galatia to hoba Tita Dalmatia to haua;

¹¹kü yoa Luk mütpem kia. Mark leiashi hoba hao ka yoa leiba; aieilausi khangenbü kümsileia hao kü shanga thuibü yaang yingakei.

¹²Ngei Tikhika Efesia to hautia.

¹³No ladang loulaje, ngei Troaa Karpa yoa apyobü mangyuk, hoba le shuong, kongnyuleko khoneibü tulai kho sungba.

¹⁴Alexander, chinam yaübouei kü to aeibou amaiko jungeikei. Haoeibü kümsilei thüng Bunyubouei hao la shemmailabü.

¹⁵Hao khulimbo no maangsangashi, aishanga haoei küneibü ngühlang aeibou khulimbei.

¹⁶Ngei shaangla ngo satenshang lamjineije aoeikei kü to athui, lausikei pendouei ngo inletkei. Kho haoen khulimbo naoteyingkuma.

¹⁷Lausikei Bunyubou kü junga lokei hoba kü la hau kukei; hoba Küksithang pendouei ngühlang kho ditlabü lele phinthonla ngei thükan kikei; hoba ngokei molosaonyu haken ka püetkei.

¹⁸Bunyubouei amaibü kümsilei pendou ka ngo khümenlabü hoba haoeibü khuthükbü Sangle to ngo leibalabü. Hao to soneikangbü ponpen yingshi.

¹⁹Priska si Aquila hoba Onesfora chemdang to salem ngetishi.

²⁰Erasta Korinta kingaia. Ngei Trofima shatko Melitaa phoyokei.

²¹Puang üangjinei lousühla nyi haujemashi. Eubula, Puden, Linu, Klaudia hoba jaisinasi shuong pendouei ka la haoeneibü salem küntida.

²²Bunyubou ka soushou yoa kishi. Kan pendou yoa onou kishi.