Read Chang Naga TITA 1 Bible Online

TITA 1 - Chang Naga bible

TITA 1

¹Ho le ho Mühghaü khangenbou hoba Jisu Khrista youkoikjai Paul ka. Mühghaüei pienbü mütshuongeibü mailem ongenkula hoba seneibü songle ngühmai,

²laobouei thon akibü langkei maanglem chüheida kho lenla ngo hautikei. Ho büngbü jihsiphai thedangto Mühghaüei thekubü ki hoba haoei hao ngüh jungeida.

³Haoei jembü jihsiphaia, sen Khümenbou Mühghaüei haoeibü ngühlang tang khittikei hoba kho phinthonlabü kho kü la nongkuko ngühkhüm kukei.

⁴Ngeibü ngühmai shou Tita, sen janyobü mailema ngei ho ka to doda. Bou Mühghaü hoba sen Khümenbou Khrista Jisu ka kato onou hoba hakso yingshi.

⁵Nangbü pendou yenei yenko kümsemla shanga ngei no Kretaa apyoda. Ngei ka to lenbü kho nyi sang wekoa jaishou shuong pienashi.

⁶Khübü kho nali athebü thechüh mütshuong yingjan; haoen kho yak che ong phoan, haoen shousi shuong mailembü, thechüha amaibü achühenbü hoba songsido maian jungeibü yingjan.

⁷Lombou kho Mühghaü chemdang shanga chühbou ki. Haokei thechüha nali athebü müt che yingjan; hao kho jembüei maang angbü ong jungeibou ayingsi khauangla sobü müt ayingjan; hao kho ihjakbü aying, ayingsi ikok simbü aying, ayingsi nyaksinam to khaubü ayingjan.

⁸Lausikei hao yenmaang shikbü hoba maibü pendou sanoubü yingjan. Hao kho jembü lolo thepetbü, lanbü, saopobü hoba damanchühbü yingjan.

⁹Hao kho seneibü lenbü to jibü hoba mailemlabü ngühmai ngüh kaangkhühtham jungenbü müt che yingjan. Khoei ong haoei lenlo maibü danko thungeijangeibü kuenlabü hoba dangbü shuongeibü ngühkei thükenlabü.

¹⁰Aishanga, kongnyuleko Jihudabü songlebü yoa lejim akibü ngüh laubü juongnyu kia, hoba haoen danko kipjim longtida.

¹¹Haoen sembung küpjemtijan, aishanga haoenei nyaksinam shanga himou akakko shedbü lenko chemdang pendou khüpeitida.

¹²Haoen san yo kabü thuseibü dogo laubü müt cheei hai laukei, “Kretabü ponpendou amlangbü, amaibü meisiau, haulo haushed shaumang yungmang.”

¹³Kho ngühmai ki. Hibü haoen mailema sa angko kientila shanga nyi haoen to kaang hakashi

¹⁴hoba touje Jihudabü ngühli hoba ngühmai atheletbü mütshuongeibü lenbüa maang teku.

¹⁵Aoyou hinseibü ki haoen shanga pendou hinseibü hoba aoyou maialembü dan ki, haoen shangaje aikei hinseibü aki; haoeneibü maangpon si haoeneibü sensimaang ham shatia.

¹⁶Haoenei Mühghaü ngeakei dogo theletda lausikei haoeneibü kümsileiei hao asungletda. Haoen kho maibü ailakei lejim akiko mangsenlabü hoba ngüha alebü shuong ki.