Read Chang Naga TITA 3 Bible Online

TITA 3 - Chang Naga bible

TITA 3

¹Songdakbü shuong si songdak hau phanga kila nyi ka mütshuong la damentiashi; haoenei haoen to ngüha lejan hoba kümsilei maibü pendou shanga lamlean kijan.

²Haoenei ao nyenkei ashajan ayingsi aoaphet- yojan lausikei müt pendou to eaaoabü yingjan.

³Jih chenei sen asangadobü hoba lenbü aditbü kiteikei. Senei seneibü haang mautikei hoba sen maangdühbü hoba olin kungkhenbü ajanjan phang pendoueibü aao la lean kiteikei. Sen seneibü langkei khüjinbü hoba theshoubüa, cheei che to mangsenyoko dantikei.

⁴Lausikei ladang sen Khümenbou Mühghaüei haoeibü üei hoba sanou mütshuong shanga tang khitkei,

⁵haoei sen khümenkei. Ho sen lolo kümbü saopobü kümsileiei aying lausikei hao onoubü yingbü danko ki. Soushou Saopobüei haansang yeitibü ka bukngaibü dei danko sen nyiboula bukkei.

⁶Aishanga sen Khümenbou Jisu Khrista Mühghaüei sen la Soushou Saopobü apsileko khokan jinkukei.

⁷Hibü haoeibü onouei sen Mühghaü yoa haoei mat maitikei hoba sen la thon akibü langkei phetphan chongchingbü maanglem kukei.

⁸Kho pendou ngühmai ki, hoba Mühghaü to mailembü danei kümsilei maibüa jungyoan maangsangko kila shanga ngei habü kümsilei shangabü nyi nouanepbo lentimang sühda. Ho mütshuongei lelabü thungeibü maibü ki.

⁹Lausikei ngouabü wetyo lauyobü, thenbülenbü ngühli phanyobü, oyophetyo, hoba Ngühkhüm aoa lemenbü khübü ka bangenashi, aishanga khübü kho lejim akibü hoba amlangbü.

¹⁰Janyintibou to nyi nyinei to liman tühak. Kho phaiaje hao to ai kümla aki.

¹¹Nyi ngelabü, kheibü müt kho ayinglama ki. Haoei shedbü kümda hoba haoei kho ngeakei.

¹²Ngei ka jungto Artema ayingsi Tikhika hautisilengko: Nikopolia kü jungto loula haujemshi, aieilausi ngo puang sünga khünei dantila jantheda.

¹³Ngühkhüm ngebou Zena si Apolo wakou shangabü nyi maibouthamei thuiashi, hoba haosi khambü pendou chühkuashi.

¹⁴Hobaje sen jembü mütshuongeikei haoeneibü kümsilei maibü kho theshuok khambüa jungeienla ditletjan. Haoen haang alongko akijan.

¹⁵Kü yoa kibü pendouei ka la salem kutida. Mailema sen thangbou shuong la salem kushi. Kan pendou yoa onoubü yingshi.