Read Chang Naga FILEMON 1 Bible Online

FILEMON 1 - Chang Naga bible

FILEMON 1

¹Ho le Paul, Khrista Jisu shanga ao tou thüngdanga ki, hoba seneibü jaisina Timoti ka senei sanoubü thangbou hoba liko khangenbou Filemon,

²seneibü nousina Apfia, seneibü jenabou sepai Arkhipa hoba Filemon chema kambü lashong jungto.

³Seneibü Jisu Khrista ka kan jungto onoubü hoba hakso yingshi.

⁴Ngei tegütham nyi Bunyubou Jisu to hoba Mühghaü mütshuong pendou to lai sanouda hoba maanglemda kho ditan ngei ponpendou ngeibü welaua no damenda, hoba kü Mühghaü nyen sangla ladangkei amaada.

⁶Nyi mü to kaibü mailem janyojinei sen pendouei khei Khristaeibü phaisembü shuong tegü sen latetche keiko haükubü dan ki kho senei aei aei penkosouko ditenlabü shanga ngei welauda.

⁷Sanoubü jaisina, ladang ngei kaibü sanouei Mühghaü mütshuong maangpon haksotibü shangabü ditkei ngo yaang olintikei hoba maang nyemtikei.

⁸Hibü khei Khrista himjam soloa yingasikei, ai janbü ki kho kümla shanga ngei kan la ngühkhüm kuda.

⁹Ngei kaibü sanou shanga bouje sudajada. Haü, lubü ayingko ngo Paul, Khrista Bunyuboueibü lambubou, tou hao shanga thüngbou che yingasikei,

¹⁰kü shou Onesima, ao, ngo thüngan phaia kü shou la yeikei, hao shanga ka to sudajada.

¹¹Onesima kho cheje ka shanga lejim akitei, lausikei touje maimaitham seti ham shanga lejim kia.

¹²Kü maangpon tegü ong dambo ngei hao ka jungto ngaitikuda.

¹³Ngühlangmaibü shanga ngo thüngbou kijinei ngei hao ka jeila kü to thuila kü yoa phokhoulabü,

¹⁴lausikei ngei kaibü maangangbü ayokoje aikei kümmang asüh. Tukosekko asanoutilabü, lausikei ka maang letilabü.

¹⁵Aingenyu nyi hao aao che tegü aying lausikei kü to khaibou sanoubü jaisina che tegü ponpen thon akiko lengailabü lele hao ka jungka longche shanga kukkei yingkei. Kongnyuleko hao kü to khei ki. Müt hoba likobü khristan tegü ka to bouje latetche aei yingla.

¹⁷Khei nyi ngo mailema thangjambou che tegü sungletda longa haokei nyi ngo sungletbü hima sungletashi.

¹⁸Haoei ka to denche shedbü küman kialonga ayingsi ka la denche thean kisije, kho kü la wejinkuashi.

¹⁹Hanei kü ikei aukabü dokuda: ngo Paulei shemlabü. Maimaitham nyi kü la ka langkei shemla kibü khoje ngei alenouda.

²⁰Jaisina, kho daman chühshi! Külaje khristan lama ong shemngaitimang sühda. Khristan jenabou cheei thükbü thüng ngo olintiashi.

²¹Ngei ho doasikei, ngei ngekei, nyi ngei phebü to limankei kümlabü.

²²Khüto yoko sanoudaman kü shanga yepchem che lamlekuashi, aishanga ngei maanglemda, kaneibü welau jongaibüa kan pean chühla Mühghaüei kü to thuilabü.

²³Epafra, Khrista Jisu shanga thangbou kü jambouei ka la salem küntida,

²⁴hoba tokei kü yoa khüpjambü Mark, Aristakha, Dema hoba Luk ka kei jeteibü küntida.

²⁵Bunyubou Jisu Khrista onou kan pendou yoa kishi.