Read Chang Naga IBRI 10 Bible Online

IBRI 10 - Chang Naga bible

IBRI 10

¹Ngühkhüm kho tükdebü phatbü thamje aying. Hoei loula kibü haülabü shuong yeme koutida. Po weko jeteibü lembüsabü danko hoei lembou shuong ladangkei penbüsoubü yeitila athük.

²Khoei souda laubü tegüje khüae lembhoulabü, aieilausi lembou shuongei pendou shanga hoba che ong saüenan kikhoulabü.

³Lausikei khüpeinyu haüthükda. khübú lembüsabü shuongei po weko mütshuong la haoeneibü shabü damentida,

⁴aishanga masu pongsu hoba loneibü siiei ladangkei shabü sunglangla athük.

⁵Khoei, Khrista kaodak to loula kümjinei haoei Mühghaü to laukei, “Lembüsabü hoba lembü nyi amangsüh; lausikei nyi kü shanga mang che lamlekei.

⁶Pemtolo juokbü lembü hoba shabü shanga lembü to no aolin.

⁷Kheijinei ngei laukei, ‘Ngühkhüm lea Laishibaei kü shangabü doan kibü tegü, nyi kü la kümtimang sühbü kümla lamlean ngo hanei kia, O Mühghaü.’ ”

⁸Shaangboua haoei laukei, “Lembüsabü hoba lembü hoba pemtolo juokbü lembü hoba shabü shanga lembü nyi amangsüh ayingsi no aolin.” Haü, khübü khokei Ngühkhüma sakkubü tegü ong lembei.

⁹Kheijinei haoei laukei, “Nyi mangsühbü kümla lamlean ngo hanei kia, O Mühghaü!” Hibü, Jisu Khristaei nyiboubü, jembü lolo khümbo lembü kho khangenla shanga shaangbou, meisiau lembü kho sungngaida.

¹⁰Aishanga haoei Mühghaüei hao la kümtimang sühbü kümbei hoba haoeibü mang pendou shanga che lembei, khoei sen sakena hoba khangenla pienakei.

¹¹Jihudabü ungshedbü weko chalou angbou khangenko loda hoba ladangkei shabü sunglangla athükbü jeteibü lembü kho ong lemdang leda.

¹²Lausikei kho ungshedboueije ponpendou shanga shabü shanga lembü che kukei, hoba Laishibaei laubü tegü hao Mühghaü maenei setakei.

¹³Khünyet ka jaüan Mühghaüei haoeibü dangbou shuong hao younakshang la ayeiti shongko haiyeida.

¹⁴Aishanga haoei lembü cheei ong haoei saüenkubü shuong pentisoutikei hoba hao khangenbü pienan phoda.

¹⁵Soushou Saopobüeikei sen la chongchingbü kuda. Shaangboua haoei lauda,

¹⁶“Aishanga Bunyubouei lauda, khübü chalou danan phaia, haoen yoa ngei ho thebülanbü kümlabü: haoeneibü maangponlanga ngei kü ngühkhüm jinkulabü, hoba habü ho ngei haoeneibü maangpona dolabü.”

¹⁷Tokei haoei lauda, “Haoeneibü shabü hoba haoeneibü shedbü ngei touje adamenlabü.”

¹⁸Lanei ong khübü amai apbua, khonei touje shabü shanga lembü aikei akhamda.

¹⁹Hibü jaisinasi shuong, senei touje ai ashuko ong thangtet danko saoposhang to atla thükakei. Jisu sen shanga haikua,

²⁰hoba haoeibü jembü mang danko Mühghaü jungto haulabü thangtet hoba langkeibü lamnyu kho ipbua.

²¹Senei Mühghaü chema ungshedbou yaangbü che kia,

²²hibü senei amaibü sensimaang ka seneibü maangpon saüenan hoba hinseibü deia seneibü mang sakenan lanbü maangpon si kaangbü mailemei Mühghaü jungto nyangko haukho.

²³Seneibü theletbü mailem kaangkhühtham hatlepakho hoba kho ka ladangkei tesepeikho. Mühghaüei thekua hoba hao to maanglemlabü ki.

²⁴Sanou hoba maibü kümla maangdakla sen cheei che shanga dambuyojan.

²⁵Hobaje atei kümbü tegü sen chela takshatyola tüpyokho; kongnyuleko Chalou lai khama nyangbou hapda, khütetche aei senei jenabou si jenabou thungeijangeiyokho.

²⁶Aishanga ngühmai ngebü sungletan phaia, senei shenshen ngenge shabü shonalonga seneibü shabü shanga lembü touje jouan aki.

²⁷Lausikei hatlabü matjembü hoba hao khulimbü shuong suila longan kibü Mühghaü khauang wanlong kho haiteilabü ong jouakei.

²⁸Jihudabü aoei Mosa Ngühkhüm lulimlaje hao khulimbo aukabü nyi si sem kialonga ai onou akiko haitia.

²⁹Kholonga, aoei Mühghaü Shou nakeila leda, khei hao sakenkulabou si thebülanbü sii mu akiko jungeida, hoba Mühghaü onoubü Soushou nyikuda, kho müt shangaje kayang latetche kaangbou yingla damanchühashi.

³⁰“Phoklambü kho ngeibü; ngei shemmailabü,” hoba toukei, “Bunyubouei hao mütshuong matjemlabü,” dogo aoei laukei kho senei ngeakei.

³¹Langkeibü Mühghaü ikmang to atetlabü kho latetche hatlabü ki.

³²Kanei Mühghaü ngesakbü sungletan phaia danbü jihsiphaia ai haüthükkei damenashi. Kaangbüsekbü hoba khonku wapyo yingasikei, kan kaangkhühtham lokei.

³³Kan pühdaka nyikukei, hoba shieinangeikei hoba amaiko jungeikei lausikei shenshen ngenge kho tegü jungeibü yoa thujamla kanei maang angenkei.

³⁴Kan thüngdanga kibü shuong yoa liko khonsakyokei hoba kanei kibü nyaksinam aaklangjinei olinangko natenkei. Kanei kaneibü nyaksinam maibou, thabou che kia dogo ngeakei.

³⁵Hibü kaneibü maangkhai tekan tüp. Hoei jongsak yaang sungbada.

³⁶Aishanga Mühghaüei maangangbü küman phaia, kanei thekubü hapla shanga kaneibü natenbü kümsilei. Aishanga,

³⁷“Ao louada hao tuisho kanglanga louan aplabü. Hao aphailabü.

³⁸Mailemei ngeibü saopobü kho lang kilabü; lausikei hao sukngaialonga ngei hao to maang ühailabü.”

³⁹Sukngailangan shembü yoa sen ayokei. Lausikei sen to mailem kia hoba Mühghaüei sen khümenlabü.