Read Chang Naga IBRI 11 Bible Online

IBRI 11 - Chang Naga bible

IBRI 11

¹Sen to mailem kialonga seneibü maanglem kho tükdebü ki; ühüpbü peisilei shuong kho tükde kia dogo senei ngeda.

²Aishanga mailem danko seneibü pisibousi shuongei Mühghaüei haoen la aukabü kubü hapbei.

³Kaodak shuong Mühghaü ngühei yaükei dogo mailemei senei ditenda; khoei senei ai hapda kho senei hapla athükbü ka kümbei.

⁴Mailemei Abelei Mühghaü to Kain to yaangbouei lembei; hoba haoeibü mailem danko haoeibü jongsak sungletbü aukabü kukei hoba kho tegü hao kho saopobü müt dogo weeikei. Hao haiasikei haoeibü mailem danko athakko joyoda.

⁵Mailemei Enok lang langkei. Laishibaei lauda, “Hao ühüplabü ong kikei aishanga Mühghaüei hao langkei.” Hao haoeibü mailemei dogo senei ngeakei, aishanga toukei Laishibaei lauda, haoei “Mühghaü maang haitikei.”

⁶Mailem ayoko Mühghaü maang haitila athük, aishanga aoyou Mühghaü jungto louda, haoenei Mühghaü kia hoba hao lambü dan la haoei jongsak kuda dogo mailemjan.

⁷Mailemei Noaei loulabüa haüthükla kibü shuong shanga Mühghaü ka maangsanglabü ngüh hapbei. Haoei Mühghaüei lenbü ngüh to nouanepbo ditkei hoba hao chemdang püetla shanga longchem kümbei. Hao ngüh kho kaodaka matjembü che kiteikei. Ho danko mailem ka longbü saopobü phetphanbü yeikei.

⁸Mailemei Abrahamei, Mühghaüei chalou chenei hao la phetphanlabü kula kibü kaonyek che to meimeila shanga Mühghaüei ngabü ngüha lekei. Hao lae haudaje angeko haoei chem apyokei.

⁹Mailemei hao Mühghaüei thekubü kaoa Küksithang yen che tegü satenkei. Khünei hao Mühghaü ka jeteibü thekubü hapbou Isak si Jakob tegü neichema kikei.

¹⁰Aishanga Abraham, Mühghaüei huongbü hoba dangbü tükdebü denshang kibü sangyaang che shanga haiteiko kikei.

¹¹Mailemei Saraei saoeibü salang sünga shousi akiteibü yingasikei shia na künlabü hau hapbei. Mühghaüei thekubü hoba saoei hao kho maanglemenlabü dogo ngekei.

¹²Hibü haibü himabü müt che ka mühkabü khanshoulitshou lühbak hoba aweenbü yungko kabü phetsen juche thensilen haakei.

¹³Mailema khübü mütshuong pendou haikhümbei. Haoenei Mühghaüei thekubü ühüp, lausikei haoenei kaoen heebüa khübü hapbei hoba olinko sungletkei. Haoenei haoen kaodaka Küksithang hoba yenshuong ki dogo tangshaitham lenan apbei.

¹⁴Ladang mütshuongei kheibü ngüh angda, haoenei jembü kaodak lameida dogo tang khittida.

¹⁵Haoenei phainei apyobü kaonyek kho shanga dambo ki tegüje, haoen khüto ngaila jihsiphai maibü hapbhoulabü,

¹⁶lausikei haoenei khuthükbü kaonyek maibou che kho sühda. Khoei ong haoeneibü bou dogo laula Mühghaüei ihimou. Haoei haoen shanga sangnyu che lamlekuakei.

¹⁷Ladang takteikei, mailemei Abrahamei Isak lembei. Haoei Mühghaüei thekubü hapasikei, hoba Isak ka haoeibü thensilen haalabü dogo lenan kiasikei, haoei hao shou jayangshou lemla lamlean kikei.

¹⁹Aishanga Mühghaüei haibü kakei langngaitila thüklabü dogo haoei maang lemetnyu kikei; hoba loulabüa haoei maimaitham hao shou haikhün ka hapmaikei.

²⁰Mailemei Isakei Jakob si Esau haükukei; aishanga haoeibü haülabüei loulabü shanga dambei.

²¹Mailemei Jakobei hailamto Josef shousi mütpem weko haükukei; haoei haoeibü jua nongetan Mühghaü lembei.

²²Mailemei Josef, ladang hao hailabü jih sühkei, haoei Israelbü Ijep ka satlabü shangabü laueikei hoba haoeibü losilak jungeilabü hangsilam lenkei.

²³Mailemei Mosaeibü nyusibouei hao bukan phaia lit sem sühko hukei. Haoenei hao kho aeibou hemaibü shou dogo chühenkei hoba Choba Ngühkhüm dula ühüt.

²⁴Mailemei Mosaei, ladang hao inthonkei, Farao Choba nouyangshoueibü shou dogo nyenla athelet.

²⁵Haoei longche shanga shabü olinbüa olinkhoulabü khantoje Mühghaü mütshuong yoa khonsakmang sühkei;

²⁶aishanga haoei Ijep nyaksinam toje Mühghaüeibü Messia shanga nyikuko khonsakbü nyaksinam kho yaangbou dogo haoei dambei. Haoeibü nyek kho Mühghaüei hao la kulabü jongsak to thean phokei.

²⁷Mailemei haoei Ijep apyokei hoba Choba khauang to ühüt; nyekei ühüpbü Mühghaü to chühbü ka haoei haoeibü nyekthe asepei.

²⁸Mailemei haoei püetbü lem likei hoba Shemtibou khuthük hangangbüei Israelbü shaangbou shou to ameioutila shanga kouyema sii lakkei.

²⁹Mailemei haoenei kaomaia tegü saklangbü yungnyu dankei. Ladang Ijepbüei danla haujembei, haoen shemetkei.

³⁰Mailemei Israelbüei haoen kaijembo nyetnyet kaian phaia Jerikho laangshong ba tuongkei.

³¹Mailem danko Rahab suonlamnyuei kokpheibü shuong olinko pangteibü shanga maialembü shuong shembua ayo.

³²Ngei hato liman ai lenla khamda? Aishanga Gideon, Barak, Samson, Jeftha, Dawid, Samuel hoba thuseibü shuong shangabü lenla kü la jih akilabü.

³³Mailemei haoenei sangle shuong shian apbei, saopobü kümsilei khangenkei hoba Mühghaüei thekubü shuong tükde hapenkei. Mailemei haoenei molosaonyu sembung khinkukei,

³⁴sekbülakbü wanlong nyettikei, hoba inlouei haila kibü ka satenkei. Haoen hau akibü yingasikei mailemei haoen hau kitikei. Haoen hau kibü lakoubü shuong la yeikei hoba küksithang shuong shian apbei.

³⁵Yaksa shuongei jembü shou haibü ka nyibou lang hapngaikei. At danshuongei haibü khonku hapbei. Haoen langkei maiboua langngaimang sühla haoenei litibü amangsüh.

³⁶Atei nyikubü, lühei sembü, yangmenei phenbü hoba thüngdang khonsak lekei.

³⁷Haoen laangei sonettikei, bulatei penyi la latthetkei hoba inlouei haitikei. Haoen san si loneibü khon homan paikei, shale jongle, shieinangei hoba khonsak thua kikei.

³⁸Kaodak kho haoen shanga amuko kikei. Haoen sangliphang kaoen hoba shongha laangpob si kaomok khüna kiko paikei.

³⁹Haoen pendouei haoeneibü mailem shanga Mühghaü aukabü hapbei, lausikei haoenei haoei theletbü ühüpou.

⁴⁰Mühghaüei sen shanga maangpona denche maibou phokukei. Haoen kho sen yoa ong pentisoutilabü lele haoeibü lamthen kiteikei.