Read Chang Naga IBRI 12 Bible Online

IBRI 12 - Chang Naga bible

IBRI 12

¹Hibü sen shangabü lai? Sangmai yaangbü tegü aukabü juongnyuei sen kaijemsije, senei toket khipetbü pendou hoba khapyoan kibü shabü apyoakho, hoba sen thedanga kibü laangyobüa natenbüei laangakho.

²Senei mailem to leibou hoba mailem loushadtibou Jisu to seneibü nyek thejan. Hao thedanga kibü olinbü laüa haoei peisei natenkei hoba kho himou shanga ai adam. Touje hao Mühghaü Choba setshang maenei setakei.

³Jisu, aoei shabü mütshuongei hao khulimbo dangbü natenkei, kho shanga daman chühashi. Khei yingsije kan amangetlabü hoba maang akoulabü.

⁴Shabü khulimbo wapyobüa, kanei haibüa sühkoje mokühshuokkei.

⁵Laishibaei kan thungeijangeiko kan to shousi to tegü hai lenbü kho kanei maan apa lo? “Kü shou, Bunyubouei thepetbü songoktham tedam, haoei ka to hakjinei maangpon tekou.

⁶Aishanga Bunyubouei haoei sanoubü weko thepetda, haoei sungletbü shousi weko to haoei semda.”

⁷Thepetbü laüa kanei natenjan. Mühghaüei kan to shousi tegü jungeida. Haobouei athepetbü shousi at kia sai?

⁸Shousi weko thepetbü khünei kan ayolonga kan shoumai aying, lausikei khongshou ki.

⁹Khüto liman senei sen thepetbou kaodak bousi shuong kikei, hoba senei haoen soumo kuko jungeikei. Kholonga senei aeiche seneibü soushoueibü bou la khümbo kuan apan langkei pailetla maangangko akilep lo?

¹⁰Seneibü kaodak bousi shuongei jih tuisho shanga ong haoenei ai janbü dogo dambei, khoei sen thepetkei; lausikei Mühghaüei sen hao saopobüa janlettila shanga sen maila yaangla thepetda.

¹¹Thepetbü jihsiphaiaje ladangkei olinlabü ayingda; phaitoje aoyou kho thepetbü phanga chingenda, haoenei sao- pobü langkei hakso jongsak latda.

¹²Hibü, kaneibü ngekjung koubü ik phonenashi hoba kaneibü pheihaibü youkük shingashi;

¹³kaneibü youlam tangshaitham yaüashi. Khei yingsije sokebü ka kaneibü you ashukthetlabü; lausikei kho maibouje maian aplabü.

¹⁴Mütpem weko to sangmaia kila nyekchüh phoashi. Saopobü lamashi, khüto liman aoeikei Bunyubou ühüpoulabü.

¹⁵Mühghaü onou ka aokei üatetla shanga maangsangashi. Khauekbü li atan pendoueibü langkei leiluko khonsaktisi amaibula maangsangashi.

¹⁶Nyakphau che lu jembü jaishou phejan yaakshaubü Esau phatbü asangalan hoba asaopobü müt to maangsangshi.

¹⁷Aishanga phaito haoei nyeksi angko kho haülabü lambei, lausikei hao asunglet dogo kanei ngeakei. Haoei ai küman apbei kho aküm laulabü hangsilam ai alongku.

¹⁸Kan shangiedbü Israelbü shuong tegü aying; aishanga meiyoula thükbü Sinai Shongh wanlüh wanlong, sangmei nakthüh hoba yeithu yeinak,

¹⁹langh langbü teklaang si ngühlang kushang kaoen tegübü to kan alou. Khübü ditbü danei haoen la khüae dittishi dogo sukeijakei.

²⁰Aieilausi “meisiau cheei ongkei kho shongh to meiyoualonga kho laangei sonettilabü,” dogo laubü ngühkhüm haoenei anaten.

²¹Hibü haptibü kho hatlabü che yingsije Mosaei laukei, “Ngo hatbü ka lühda.”

²²Lausikei Zion shongh langkeibü Mühghaü saangyang, Haanbü Jerusalem hoba lakjaibü khuthük hangangbü shuong yoto kan loukei. Kan olinbü shuong thangyen

²³hoba khuthüka nyen doan kibü Mühghaü shaangbou shou lashong yoa ki. Kan müt pendou matjembou Mühghaü hoba penbüsoubü la yeibü müt maibü soushou shuong thedanga loakei.

²⁴Kan haanbü thesilan autoatbou Jisu jungto louakei. Abel siiei ngekbü toje haoeibü sii phinbüei aei onoubou sen to jopyoda.

²⁵Hibü Bunyubouei kan to joyobü asungletko üpla maangsangashi. Kaodaka Mühghaüei Mosa danko joyojinei asungletbü shuong asaten. Kholonga, khuthük to athakko joyoko kibou la senei takphai yeikualonga sen ainei satenshang ki?

²⁶Shangied haoeibü langhei kao nyaakkei, lausikei tou haoei thekua, “Ngei toukei che kaodak ong ayingko khuthükkei nyaakeitilabü.”

²⁷“Toukei che” laubü ngühtet kho - yaübü kaodaka kibü peisilei shuong khümbo huklangtilabü hoba uhuklanglabü peisilei ong jouletlabü.

²⁸Hibü senei anyaakeibü sangle sungletda yingsije, senei hao to olinkho, soumo kukho hoba haoei sungletenlabü lele lembho;

²⁹aishanga seneibü Mühghaü kho maimaitham lonbou wan ki.