Read Chang Naga IBRI 13 Bible Online

IBRI 13 - Chang Naga bible

IBRI 13

¹Khrista himjama sanouyobü ladangkei tenang.

²Yensiau to maila tema, aishanga khei kümjinei ateije angeko khuthük hangangbü leiyetkei.

³Nokei khühla yobü tegü thüngdanga kibü shuong damenashi.

⁴Pendouei chemkanbü atsheitham sungletashi hoba theletlanletbü yepshang hinseitham phojan. Aishanga Mühghaüei asangalanbü si peja- pelabü mat jemlabü.

⁵Nam to dühbü ka kaneibü langkei bangenashi hoba kanei ai ki khoei maanghaiashi; aishanga Mühghaüei lauakei, “Ngei kan ladangkei üpyolabü, ayingsi ainletlabü.”

⁶Khoei ong senei maanglembo hai laula thükkei, “Bunyubou kho kü thuibou, ngo ladangkei ühütlabü. Mütei kü la ai kümbula?”

⁷Kaneibü leiyeibü dan aoyouei kan la Mühghaü ngühlang sungbakei haoen damenashi. Haoen haangbü langkei daman chühashi hoba haoeneibü mailem chühletashi.

⁸Jisu Khrista miet, tat hoba ponpen jetei.

⁹Lenbü haanbü phang phang la kan teleilangti. Haoen aokei apailettibü shausiyung shangabü ngühkhüm phai sembüei aying, lausikei Mühghaü onouei sen soushou hau kitikei.

¹⁰Laobou lemshon ka neichema khangenbü shuongei shaujan aying kheibü lemshon che künei ki.

¹¹Ungshedbü shuongei meisiaueibü sii lemshang to shabü shanga lemla sungbada, lausikei khübüei mang khoje sühshang khonga juokda.

¹²Khoei Jisukei, haoei hao siiei mütshuong sao- poentila shanga bakou aian haikukei.

¹³Hibü senei batak aiko angkho hoba haoei künbü nyenshed janyokho.

¹⁴Aishanga hanei seneibü lole sangnyu aki; lausikei loula kibü sangnyu che senei chüheida.

¹⁵Hibü senei hao nyen theletbü sembung ka angbü nyensang Jisu danko Mühghaü la nyensangbü athakko kukho.

¹⁶Maibü kümla si mü to janyola tema. Khübü kho Mühghaü maanghailabü lembü ki.

¹⁷Kaneibü leiyeibü shuong to ngüha leashi hoba haoenei lenbü kümashi. Change nangnak haoenei kaneibü soushou lomda, aieilausi kan shanga haoen Mühghaü thedanga jongailabü ki. Kho haoen shanga onat ayingko olinlabü yingtiashi. Lem asebüei khangenalonga kan shanga ku aki.

¹⁸Kün shanga athakko welaukuashi. Aishanga künei ajanjan pendoua janbü kümbo soumo kakko kila shanga küneibü sensimaang tangshaitham kia dogo künei mailemda.

¹⁹Mühghaüei ngo kan jungto enyu leibangaitilabü lele welautila ngei kan aei thungeida.

²⁰Haksotibou Mühghaü, aoei thon akibü thesilan siiei seneibü Bunyubou Jisu Khrista haibü ka nyibou langngaitikei hoba hao sanlombou yaangbou yeitikei,

²¹haoei kan, hao maangangbü kümtilabü lele maibü pendouei pentisoutiashi. Haoei sen to Jisu Khrista danko hao maangshikbü kümtiashi, hoba hao to ponpen thon akiko soneikangbü yingshi; Amen.

²²Jaisinasi shuong, thungeijangeibü ngüh ho natenashi dogo ngei sudajada; aieilausi ngei kan to le tuisho ong doakei.

²³Seneibü jaisina Timoti litia dogo ngei kan la ngetimang sühda; hao jiha- phaia lousühalonga ngo kan to haüyola loujinei ngei hao kü yoa leibalabü.

²⁴Kaneibü leiyeibü shuong hoba Mühghaü mütshuong pendou la ngeibü salem kuashi. Seneibü Itali jenabou shuong pendouei ka la haoeneibü salem küntida.

²⁵Kan pendou yoa onoubü kishi.