Read Chang Naga IBRI 2 Bible Online

IBRI 2 - Chang Naga bible

IBRI 2

¹Hibü khübü ka sen soujung asatlabü lele, senei ditbü ngüha aei maang kujan.

²Senei ngeakei, khuthük hangangbü shuong danko laubü Ngühkhüm ngüh kho yongko kaangsije, ho lulimbü ayingsi ngüha alebüje atheko shieinangeikei.

³Kholonga, Mühghaüei Bunyubou danko shaang ngetibü khümenbü khütetche inletalonga sen lai satenla? Aoyouei hao ka ditkei haoenei sen la chongchingtikukei,

⁴hoba Mühghaü jembü lolo amaaphilabü, maangpanglabü hoba seikümseilei danko hoba haoei luluei mubü thüng Soushou Saopobü jongsak shombuko haoeibü aukabü kukei.

⁵Künei loulabü kaodak shangabü lauyoda, kho kaodak haoei khuthük hangangbü la kukei aying.

⁶Atei Laishiba ata lauda, “Nyi hao damenlabü lele müt kho ai? Nyi hao shanga dambulabü lele Müteibü Shou kho ai?

⁷Nyi hao khuthük hangangbü to hanshoei ong hanshangbou kümbei, nyi soneikangbü hoba nyenhangei khun hankukei,

⁸hoba nyi ajanjan pendou hao you phangto sungbakei.” Aishanga ajanjan pendou hao phanga phokusije, haoei phanga aphokubü ai ai üpyo. Lausikei tou sühkokei ajanjan pendou hao phanga phokubü senei ühüpda.

⁹Lausikei senei hapbü kho Jisu ki, ao khuthük hangangbü to hanshoei hanbou kümbei lausikei haoei haibüa sühko natenbü ka touje hao soneikangbü hoba nyenhangei khun hanakei. Müt pendou shanga Jisu nahaikula shanga Mühghaüei haoeibü onoua kho pendou kümbei.

¹⁰Aishanga Mühghaü, aoei jembü nyekchüh shanga haoei ajanjan pendou kümbei, haoei soneikangbü to shousi juongnyu leibajinei khonsak danko haoen khümenbü to leibü penbüsoubü yeitilabü hao shanga janbü yingan kiteikei.

¹¹Aishanga haoen shabü ka saüenkubou si haoei saüenkubü shuong ham kho pendou Bou che ka ki. Khoei ong haoen to jaisinasi shuong dogo ngala hao ihimouda.

¹²Haoei lauda, “Ngei ka nyen ngeibü jaisinasi shuong to phinthonlabü. Kambüa ka nyen chia laubüa ngo yolabü.”

¹³Toukei haoei lauda, “Ngei Mühghaü to maanglemlabü.” Hobaje toukei haoei lauda, “Mühghaüei kü la kubü shousishuong yoa ngo hanei kia.”

¹⁴Touje shousi shuong sii si phe yembü shuong yingsije, Bunyuboueikei müteibü haang jeteibüa phejan lekei. Haoeibü nyekchüh kho, haibü thüka hau kibou Satan mautila shanga,

¹⁵hoba haila hatbü danko salang sünga aaola lebü shuong senglitila shanga kiteikei.

¹⁶Aishanga maimaitham hao khuthük hangangbü to thuila louda ji, lausikei haoei Abraham thensilen to thuida.

¹⁷Khoei thükkabou ungshedbou che tegü üeisanou si maanglemenbüa haoei Mühghaü khangenlabü lele hoba kho tegü mütshuongeibü shabü thonglangla shanga hangsilam pendoua haoeibü jaisinasi shuong phatlabü lele yeikei.

¹⁸Aishanga haokei khonsakei takteisije aoyou to jeteibü khonsaka takteida, haoei khübü to thuila thükda.