Read Chang Naga IBRI 3 Bible Online

IBRI 3 - Chang Naga bible

IBRI 3

¹Hibü Mühghaüei hao shanga pienan phobü hoba khuthükbü langkei janyola ngaanbü ngeibü jaisinasi shuong, Jisu shangabü daman chühshi. Hao sen mailemeibü thükkabou ungshedbou ki,

²hoba Mühghaü chemdang khümboa Mosa ailai maanglemenbou kikei kho tegü ong haokei hao pienbü Mühghaü to maanglemenbou kikei.

³Aishanga chem toje chem huongbou lai soumo yaangbou ki kho tegütham Mosa toje Jisu bouje aei mubou nyenhanga weeida.

⁴Chem weko atei huongenda, lausikei Mühghaü kho ajanjan pendou kümbou ki.

⁵Sambü che tegü Mosa Mühghaü chem khümboa maanglemenbou kikei, hoba loulabü thua Mühghaüei lenla kibü to aukabü künkei,

⁶lausikei Khrista kho Mühghaü chem thüka maanglemenbü shou che tegü kikei. Hobaje senei ong seneibü maanglem maangkhaiko hoba natenko jungeienalonga sen Mühghaü chem ki.

⁷Soushou Saopobüei laubü tegü, “Tat haoeibü ngüh ditashi.

⁸Kanei hao lamanga takteibü chaloua, kanei che hao khulimjinei tegü, maangpon tekaang.

⁹Khünei kan pisibousi shuongei ngo huonko takteikei, hoba po saonyi sühko küküm külei chühkei. Khoei ong ngo kho jihsiphai kabü mütshuong to maangpokkei hoba laukei: ‘Haoeneibü dambü kho ponpendou shedbü, hoba kü lam shuong aditenda.’

¹¹Khauangko ngei theletkei, ‘Haoen ladangkei kü haksoshang to alotlabü.’ ”

¹²Hibü jaisinasi shuong, mai- alemenbü amaibü danko kan aokei langkeibü Mühghaü ka üatetla maangsangashi.

¹³Laishiba ngühei sen to “Tat” dogo laushongko, shabüei khüpettibü danko aokei Mühghaü khulimbo atuasektila shanga chaangboua cheei che thungeijangeiyoashi.

¹⁴Aishanga senei seneibü khangbü mailem kho ong thonbüa sühko kaangkhühtham hatlepa longaje sen Khrista yoa thujambü shuong ki.

¹⁵Laishibaei sen to lenbü tegü, “Tat haoeibü ngüh ditashi. Kanei che hao khulimjinei tegütham maangpon tekaang.”

¹⁶Aoei hao ngüh ditkei hoba khulimbei? Ijep kaodak ka Mosaei leibabü pendouei.

¹⁷Hobaje po saonyi sühko Mühghaüei aoyou to maangpokkei? Shabü shonbü shuong hoba lamanga mang yepbü shuong to.

¹⁸Aoyou to haoei haoen ladangkei kü haksoshang to alotlabü dogo thekeilankei? Maimaitham kho hao ngüha alebü shuong to laukei.

¹⁹Hobaje maialembü hangshong haoen üeten dogo senei hapda.