Read Chang Naga IBRI 4 Bible Online

IBRI 4 - Chang Naga bible

IBRI 4

¹Hibü sen atan hao yoa haksolaMühghaüei sen la theletkuakei. Hibü kan at ongkei kho haksoshang to üetenko apsi amaibula sen pendou jemtenkho.

²Aishanga shangiedbü mütshuong to lenbü tegü ong sen lakei Ngühlang Maibü kho songlena. Lausikei haoenei ditbü songlen kho haoen shanga ai ku akitei, aishanga haoenei nouei ditasikei haoeneibü maangpona maialem.

³Lausikei sen bouje kho haksoshang to atlabü, aishanga sen mailembü shuong ki. Kaodak pak khangbü ka jaüan Mühghaü kümsilei kho wanasikei, Laishibaei lauda, “Khauangko ngei theletkei, haoen ladangkei kü haksoshang to alotlabü.”

⁴Aieilausi nyetbounyet shangabü Laishibaei kaoen ata hai lenakei, “Mühghaüei nyetbounyet haoeibü kümsilei pendou ka haksokei.”

⁵Lausikei toukei Laishibaei lauda, “Haoen ladangkei kü haksoshang to alotlabü.”

⁶Aoyouei shaangla Ngühlang Maibü ditkei haoenei hao haksoshang to üeten aieilausi haoenei maialem, lausikei

⁷Mühghaüei toukei chalou che pienkuda. “Tat” dogo po juongnyu phaito Dawid nyensang chiaa lauda, hoba Laishibaei lenan kibü tegü, “Tat kanei hao ngüh ditjan; kan maangpon tekaang.”

⁸Joshuaei haoen la hakso kukei tegüje Mühghaüei lubü chalou che shangabü mütshuong shangabü telaukhoulabü.

⁹Hibü Mühghaü mütshuong shanga olinyola nyetbounyet kho toukei ipbuakei.

¹⁰Aishanga müt at Mühghaü haksoshang to atenalongaje, lai Mühghaüei haoeibü kümsilei ka haksoda kho tegü hao haoeibü kümsilei ka haksoda.

¹¹Hibü senei kho haksoshang to atenla aicheküman haujembho. Haoenei tegü ngüha alebü danko sen üetenko akijan.

¹²Aishanga Mühghaü ngüh langkei, hoba kümthen. Ho jiji- ham akbü inlou tokei phambou. Ho langkei ngüh soushou, thenyoshang si lomanghai haabü pendou paithetko jemenbou, hoba maanga dambü si maangphanga huonbü tongde ngebü.

¹³Mühghaüei ühüplabü yaüenbü peisilei ai aki; lausikei ao to senei jongailabü ki, hao thedanga peisilei pendou kongmaimai shimtian ki.

¹⁴Kholongaje thükkabü ungshedbü yaangbü che, ao mütshuong limbo anga, khei Mühghaü Shou Jisu kisije, seneibü theletbü senei kaangkhühtham hatlepakho.

¹⁵Aieilausi sen athükamina onouko dambula athükbü thükkabü ungshedbou senei aki; aishanga sen tegü hao pendoua takteikei, lausikei haoei shabü ashon.

¹⁶Hibü sen khambüa üeisanou hoba onoubü sungletlabü lele onoubü Choba setshang jungto sen haukho.