Read Chang Naga IBRI 5 Bible Online

IBRI 5 - Chang Naga bible

IBRI 5

¹Aieilausi shabü shanga jongsak hoba lembü kutila shanga, mütshuong nyena Mühghaü khangenla müt yoka sungenan thükkabü ungshedbou weko pienakei.

²Haoei angebü hoba mashikbü to eaaoa natena, aieilausi haokei jembü lolo apenasoubü ki,

³hoba kho hau akibü danko, haoei mütshuong shanga lemkubü tegü, haoei jembü shangakei shabü lembü kula khaman yeida.

⁴Aoeikei jembü lolo kho ungshedbou nyenhang aleda, lausikei Aron ngabü tegü, ladang Mühghaüei ngadaje kheijinei ong haoei kho leda.

⁵Kho tegü Khristaeikei thükkabü ungshedbou nyenhang kho haoei lolo asunglet; lausikei Mühghaüei hao thükkabü ungshedbou kümtikei. Mühghaüei hao to laukei, “No Küshou; tat ngo Kabou la yeia.”

⁶Toukei haoei kaoen atakei lenda, “Melkhizedek haangae lamaedang ka, no ponpen shanga ungshedbou ki.”

⁷Jisu kaodak salang chaloua, hao haibü ka aoei püetla thükkei, hao to ngekbü hoba nyeksiei welauko suanjaan phaia, haoei soumo kubü hoba subüjabü shanga ditkukei.

⁸Hao Mühghaü Shou yingasikei, haoei khonsak khonkua ngüha lela ditletkei,

⁹hoba hao ladang penbüsoubü yeikei, hao to ngüha lebü shuong pendou shanga hao thon akibü khümenbü bakshang la yeikei,

¹⁰hoba Melkhizedek haangae lamaedang ka Mühghaüei hao la thükkabü ungshedbou nyenkukei.

¹¹Ho shangabü künei lenlabü juongnyu shangakei, lausikei kan ditletla aeibou kit khaibü ka wanenla sekakei.

¹²Tou sühkokoaje kan lenboukei yeian kibou, lausikei shaangbou Mühghaü tang khitbü shuong kan la ateije nyiboula thenngailabü lele khaman yeida; kanei shausiyung kaangbü ayingko sendei khamda.

¹³Aishanga sendeia lang kibü shuongei saopobü ngühlanga sonenbü ayeikei; hao kho nasak che ki.

¹⁴Lausikei chingbü ao- youei hang hangyepbüei amai maibü janenla jembü songsido thepetda, haoen shanga kaangbü shausiyung ki.