Read Chang Naga IBRI 6 Bible Online

IBRI 6 - Chang Naga bible

IBRI 6

¹Hibü senei Khrista shangabü khangbü ngüh shuong phainei apyokho. Künei kan la shaangla thama kongnyu phai lenjema, künei nyibouje tenopmaikho. Haibü to leibü thechüh apyobü hoba Mühghaü to mailembüa lang kibü shangabü kanei ngeakei.

²Baptibü hangsilam hoba ikei shangetbü shangabü künei kan to lena. Kanei haibü ka langngaibü to si thon akibü matjembü shangabü ngeakei.

³Sen touje thedangto hauakho. Hobaje Mühghaüei sakkualonga senei kümlabü.

⁴Aishanga che Mühghaüeibü ngesakbü sungletan tuongbü shuong shangaje nyibou maangpon sepeila athükda. Haoenei khuthük jongsak jepan chüha hoba Soushou Saopobü phejan sungletda.

⁵Haoenei Mühghaü ngüh maibü hoba loulabü meten soushou sei jepan chühkei,

⁶hoba tuongkei; kheijinei nyibou maangpon sepeila shanga haoen haansang kümetlabü kho athükaminlabü, aieilausi haoenei lolo Mühghaü Shou peiseia thüngda hoba hao pühdaka nyikuda.

⁷Laobouei jih jiha hao thükto lotbü langdei shepda hoba kho moubü shuong la kesiong yembuda kho kao Mühghaüei haükuda.

⁸Lausikei kho kaoei jak si sanglong yembualongaje ai ku aki. Kho Mühghaü shedsikhau phanga lonan aplabü.

⁹Lausikei sanoubü jenabou shuong, künei hainyu lauasikei künei kan shangabü maang amauda. Aieilausi ai maibü ki hoba aiei kaneibü khümenbü to leida kho kanei ngeakei.

¹⁰Aishanga kanei shangied hoba tou hao mütshuong to thuibü hoba kanei hao shanga sanou lenbü shuong maalabü lele Mühghaü maangalanbü ji.

¹¹Lausikei kan mütpem wekoei kaneibü maanglem thonbüa sühko aloushad shongko kaneibü mailem jeteibü maangdaka hautimang sühko künei aeibou chüheida,

¹²hoba kan hauloko akilabü lausikei mailem hoba natenbü danko Mühghaüeibü theletbü phet- phanbü shuong phatko yeitimang sühda.

¹³Ladang Mühghaüei Abra- ham la thekukei, thela lanlabü lele hao to yaangbou ao akisije haoei hao lolo thekeilankei.

¹⁴Haoei laukei, “Ngei maimaitham no haükulabü hoba ka la thensilen juongnyu kulabü.”

¹⁵Hibü Abrahamei natenkei hoba Mühghaüei thekubü kho hapoukei.

¹⁶Mütshuongei haoen to yaangbou che nyena thedalanda hoba haoen kanglanga oyophetyo pendoua theyolanyobüei thontida.

¹⁷Khoei ong Mühghaüei haoeibü thesilan kho leilang leko shangshentikei. Haoei thekubü phet phanlabü shuong to haoei haoeibü nyekchüh üeisheilabü dogo chongchingtimang sühkei.

¹⁸Hibü Mühghaüei haoei thekubü hoba theletlanletbü, laobou jaksheila hoba yepeila athük, kho kümsilei penyi kho kümbei. Aieilausi khübü danko kün hao yoa homatlangbü danshuong, kün thedanga phokubü maanglem to kaangkhühtham hatetla aeibou maang yaangentikei.

¹⁹Ho seneibü maanglem ki. Ho seneibü soushou shanga longthakbou phatko ki. Hao thangtet danko maangkabou lemshon to atda,

²⁰kho lemshang to Jisu sen pendou nyena thedangto atteikei, aishanga Melkhizedek haangae lamaedang ka hao ponpen shanga thükkabü ungshedbou la yeia.