Read Chang Naga IBRI 7 Bible Online

IBRI 7 - Chang Naga bible

IBRI 7

¹Ho Melkhizedek Salem Choba, Thükkabou Mühghaü ungshedbou kikei. Abraham Choba shuong shemtian lason ka longeijinei haoei haüyokei hoba hao haükukei.

²Hibü Abrahamei haoei aakbabü pendou ka hao la an phejan kukei. Shaangboua, Melkhizedek nyen tetlabü kho “Saopobü Choba,” hoba hao Salem Choba kiteikei, laobou tetlabü, “Sangmai Choba.”

³Haobou, haonyu, ayingsi bakbü thensilen hoba hao bukbü hoba haibü ngühli ai aki. Hao Mühghaü Shou phatko ki; aieilausi hao ponpen shanga ungshedbou ki.

⁴Aola boukim Abrahamei aakbabü nyaksinam ka an phejan kulabü lele longkei kho müt latetche yaangkei damanchü- hashi.

⁵Ngühkhümei sakkubü tegü haoen Abraham thensilen yingasikei, ungshedbü kümsilei hapbü Levi thensilen shuongei, jeteibü Israel shousi shuong ka an phejan hela sakkubü hapbei;

⁶lausikei kho mütje ungshedbü lilabü ayingsikei Abraham ka an phejan sungletkei, hoba thekubü hapan kibü müt mangkei haütikukei.

⁷Ai laula aki, hanbou kho yaangbouei haükuda.

⁸Toukei, hailabü mütei an phejan hapda; lausikei khüneije an phejan kho Laishibaei lenbü tegü lang kibouei sungletkei.

⁹Hibü laulabüei an phejan sungletbou Leviei mangkei Abraham danko an phejan kua;

¹⁰aishanga Melkhizedekei hao haüyojinei Levi kho haopi Abraham manga kiteikei.

¹¹Kholongaje mütshuong la Ngühkhüm kubou Levi ungshedbü phangei mangkei kho nyek- chüh haüthüktia tegüje, “Aron haangae lamaedang ka” dogo alauko “Melkhizedek haangae lamaedang ka” dogo lauko lubü ungshedbü che longla ai khambü kikei?

¹²Hibü ungshedbou kho jeiyosije Ngühkhümkei jeileila khaman apda.

¹³Khübü laukubü seneibü Bunyubou khoje aokei lemshona khangenla lean achühbü phang che ka ki.

¹⁴Aishanga seneibü Bunyubou Jihuda phang ka longbü dogo chongchingkei. Kho phang to ungshedbü shuong shangabü Mosaei ai ajoyo.

¹⁵Ngüh kho ho tegü shangashatda: Melkhizedek phatko lubü ungshedbou phang che longan apa.

¹⁶Hao kho müteibü ngühkhümei sakkubü haangei ungshedbou che ayei; lausikei hao kho thon akibü langkei seiei ungshedbou che yeikei.

¹⁷Aishanga Laishibaei lauda, “Melkhizedek haangae lamaedang ka no ponpen shanga ungshedbou che ki.”

¹⁸Shaangbou ngühkhüm shuong waileda aieilausi kho hau akibü hoba ku akibü che ki

¹⁹(aishanga haoeibü nyekchüh loushadtila shanga Ngühkhümei athükamin hapbei), hoba maanglem maibou, laobouei sen Mühghaü jungto nyangtida, kho sungbakei.

²⁰Khokei theyolanyobü ayokoje aküm. Levi phang kabü ungshedbü shuongje theyolanyobü ayoko yeikei.

²¹Lausikei haoje Che, aoei hao to, “Bunyubouei thedalanda, ‘No ponpen shanga ungshedbou ki,’ dogo laukei, hao danko thebülanbü cheei ungshedbou yeikei, hoba haoei hao ngüh ajaksheilabü.”

²²Hibü Jisu kho thesilan maibou shangabü authebou lakei yeikei.

²³Tou ngüh chenei müt juong ungshedbouei pena, aishanga athakko kümbhoulabü ka haibüei athakko shiletkei;

²⁴lausikei Jisuje lubü to athonlabü ungshedbou ki, aishanga hao ponpen thon akiko kida.

²⁵Hibü hao danko aoyou Mühghaü jungto louda haoen khümenla shanga haoei ponpendou thükakei; aishanga haoen nyena Mühghaü to sukujakulabü lele hao ponpen lang ki.

²⁶Ho tegübü thükkabü ungshedbouei sen khambü kümbuda, aishanga hao kho saopobü, ashedbü, shabü müt ka bangenbü hoba tou thükkabou mühnyua tonenakei.

²⁷Thükkabou ungshedbouei kümbü tegü, chalou weko shaangla haoei jembü shabü shanga hoba kho phaia mütshuong shanga dogo lemla kümsilei alongda; aishanga haoei ladang haoei jembü lolo lembei, kheijinei haoei pendou shanga che ong küman apbei.

²⁸Ngühkhümeije athükamin thonan thükkabü ungshedbou pienda, lausikei Ngühkhüm phaito loubou theletlanletbü ngüheije ponpen shanga penbüsoubü Shou pienda.