Read Chang Naga IBRI 8 Bible Online

IBRI 8 - Chang Naga bible

IBRI 8

¹Künei lenjung loubüa ngüh kongnyubou kho ho yingkei: Maimaitham ho tegübü thükkabü ungshedbou che senei ki. Hao khuthüka Yaangenbou Choba setshang maenei setakei.

²Haoei thükkabou Kaoen, mütei ayingko Bunyubouei dangbü tükdebü hoba saopobü neichema khangenda.

³Thükkabü ungshedbou weko jongsak hoba lembü lemla pienda; hibü seneibü thükkabü ungshedboukei dencheje lemla kijan.

⁴Hao kaodaka ki laubü tegüje hao ungshedbou teyingkhoulabü aishanga Ngühkhüma kibü tegü jongsak lembü ungshedbou shuong kia.

⁵Haoen lemshang khuthük peisilei chühletbü hoba yemekoubü ong ki, khei Mosaei neichem kho huongla kümbo kijinei Mühghaüei hao to laukei, “Shongha ka to chühletla shanga lenbü tegü pendou kümla maangsangshi.”

⁶Lausikei Jisuje, hao autoatbü laobou theyolanyobü maibou ki, kho tegübü thükkabü khangenbü kümsilei hapbei, aishanga ho thebülanbü maiboua younak laman khangkei.

⁷Shaangbou theyolanyobü kho ashedbou tegüje, Mühghaüei nyiboubü che shanga telaueikhoulabou.

⁸Aishanga haoei hao mütshuongeibü shedbü hapda, hoba hai lauda, “Chühashi, ngei Israel phang yoa, hoba Jihuda phang yoa thebülanbü haanbü che kümlabü, kheibü chalou louada.

⁹Lausikei Ijep kaodak ka haoen leiyenla ngei haoeneibü ika jenbü chaloua, ngei haoeneibü nyusibou yoa thebülanbü tagübü thebülanbü haanbü kho akilabü. Aishanga Bunyubouei lauda, ‘Haoenei ngeibü thesilana alo, hoba ngei haoen athounou’.

¹⁰Aishanga Bunyubouei lauda, khübü chalou danan phaia, Israel phang yoa ngei ho thebülanbü kümlabü. haoeneibü maangpona ngei kü ngühkhüm jinkulabü, hoba habü ho haoeneibü maangponlangakei ngei dolabü; hoba ngo haoeneibü Mühghaü yinglabü, hoba haoen kü mütshuong yinglabü.

¹¹Hobaje aoeikei hao lepbou to, ‘Bunyubou ngeashi’ dogo alaulabü, aishanga haoen hanbou ka yaangboua sühko pendouei ngo ngelabü.

¹²Aishanga ngei haoeneibü shedbü shanga onoulabü, hoba haoeneibü shabü ngei touje adamenlabü.”

¹³“Haanbü” dogo laubü ngüh khoei shaangbou thebülanbü khoje hangbüla yeitida; hoba laobou hangda hoba sinda khoje maulabü ong ki.