Read Chang Naga IBRI 9 Bible Online

IBRI 9 - Chang Naga bible

IBRI 9

¹Shaangbou thebülanbüa lembüsabü ngühkhüm kiteikei, hoba honei müteibü lemshang che kikei.

²Neichem kho dangan kikei hoba tangkabou thangtet khüto Saopobü Kaoen dogo laukei; khonei wanthung denshang che hoba Mühghaü thedanga Wentek yoa setshang che kikei;

³hoba nyiboubü thangtet aian phaia Saopobü Thükkabou dogo lauan neichem che kikei.

⁴Khonei jen juokshang honeibü lemshon che, hoba pendou kaijembo honei yaübü ngühkhüm busen che kikei. Hobaje busen maanga mana kibü honeibü ilechak che, sem longbü Aron ju, hoba thebülanbü dobü laangkhüh penyi kikei.

⁵Kho thüka Mühghaü soneikangbü tang khittibou kaakyembü kherabim, haoeibü kaakei onou setshang ngühlepan kikei. Khübü shanga tou wanenko laula alongda.

⁶Kho tegü kümsilei wanan phaia ungshedbü shuongei athakko shaangbou thangtet danjung atan lembü kümsilei kümda,

⁷lausikei thükkabou ungshedbouei ong nyiboubü neichem kho danko poa che atda. Haoei ponpendou mütshuongei angeko shonbü shabü shanga hoba hao shanga sii künan atda.

⁸Khoei neichem shaangbou kho ki shongkoje saoposhang to atbü lamnyu kho tang akhit dogo Soushou Saopobüei lenda.

⁹Ho tatngietbü tetsida shean lenbü che ki. Tetlabü kho jongsak si lembüsabü kubüei lembü shuongeibü maang- pon penbüsoubü ayeida.

¹⁰Haoenei shaubü yungbü hoba saken samenbü phang phang shanga ong dambei. Khübü kho haanbüa thu che aloutoua jungeilabü pheeibü ngühkhüm ong kiteikei.

¹¹Lausikei Khrista kho, hanei tou kibü peisilei maibü shuong pendoueibü thükkabou ungshedbou tegü louakei. Hao kho ikei akümbü, khei ho yaübü kaodakeibü aying, lausikei yaangbou hoba penbousoubou neichemeibü ungshedbou ki.

¹²Hao lemshang to pendou shanga che atjinei haoei lon ayingsi masu pongsu shoushou sii aying lausikei haoeibü sii künan atkei, hoba sen la thon akibü khümenbü sungbakei.

¹³Shabütabü shuong thükto lon hoba masu pongsu sii yoa masu saoen juokbü lembü tap phinkubü danko haoen asaopobü ka saüenkuda.

¹⁴Thon akibü Soushou danko Khristaei jembü lolo nali athebü lembü Mühghaü la kukei. Kholonga senei langkeibü Mühghaü khangenla shanga haibü to leibü seneibü sensimaang kümsilei shuong ka hao siiei latetche saüenkula?

¹⁵Hibü, shaangbou thebülanbü phanga shabü shonbü ka khümenla shanga haibü haüthüksije, aoyou ngaan ki, haoenei Mühghaüei thekubü thon akibü phetphan haplabü lele, hao kho haanbü thebülanbüa autoatbou ki.

¹⁶Maang angenbü khünei kho kümbou khoei haibüa aukabü kujan,

¹⁷aishanga maang angenbü kho haibü phaia ong loushatda, aieilausi kho kümbou lang ki shongkoje khonei hau aki.

¹⁸Khoei ong shaangbou thebülanbü kho mangkei sii ayokoje akhangen.

¹⁹Aishanga ladang Mosaei Ngühkhüma kibü sakkubü song khümbo mütshuong pendou to phinthonkei; haoei dei, saklangbü sanwi hoba hisop yoa masu pongsu shoushou hoba loneibü sii sungkei, hoba tulai si mütshuong ham to lakkei,

²⁰hoba laukei, “Ho Mühghaüei kan la sakkubü thebülanbü sii ki.”

²¹Hobaje kho tegü ong haoei neichem hoba lemlabü peisilei pendoua lakkei.

²²Ngühkhüm phanga siiei pendou saüentida, hoba sii akouko shabü apbubü ai aki dogo laula thükkei.

²³Khuthükbü chühletbü kho khübü hangsilam danko saüenjan kiteikei, lausikei khuthükbü peisilei kho saüenkulaje khüto maibou lembüsabü khaman kikei.

²⁴Lausikei Khrista, tükdebü chühletbü, müteibü ikei kümenbü saoposhang to aying, lausikei tou hao sen shanga Mühghaü thedanga longla khuthük to atkei.

²⁵Thükkabou ungshedbouei jembüeibü ayingko müeibü sii lembü jungan po weko saoposhang to atbü tegü Khristaei toukei toukei hao lolo lemla üet.

²⁶Kheinyu kümlabü tegüje kaopakjinei thama khonkuko kikhoulabü. Lausikei tou meten thonbüa hao lolo lemngailangbü danko shabü haman apla hao pendou shanga che tang khitkei.

²⁷Müt che hailabü, hoba kho phaia matjembü loula pienakei;

²⁸kho tegü juongnyueibü shabü künla Khrista kho che lembei. Shabü to totyola aying, lausikei hao haiyeibü shuong la khümenbü künbala hao nyibou longlabü.