Read Chang Naga JAKOB 2 Bible Online

JAKOB 2 - Chang Naga bible

JAKOB 2

¹Ngeibü jaisinasi shuong, kan seneibü soneikangbü Bunyubou Jisu Khrista to mailembü mütshuong ki, hoba kanei the to techüh.

²Tetlabüei kan kambü to müt nyi loua. Haosi yoa cheei honeibü ikjikhap lonakei hoba neisimei maibü leakei. Lubü che kho shalebü hoba neikek leakei.

³Kanei maietnyu lamlebü müt kho shenda hoba hao to, “Noje hanei setashi” dogo lauda. Lausikei shalebü khüto kanei, “Noje theinei loashi” ayingsi “Küyou phang shon hanei pakashi,” dogo lauda.

⁴Kanei kan kanglanga janyinbü longtida, ayingsi kaneibü matjem kho shedakei dogo achühenda lo?

⁵Ngei sanoubü jaisinasi shuong, ditashi. Kaodakei shalebü dogo weeibü kho mailema keilayaangla hoba hao sanoubü shuong la thekubü sangle phet- phanla shanga Mühghaüei haoen apien lo?

⁶Lausikei kanei shoujit shale shuong aweasüngda. Keibüei kan shoeinakeida aying lo? Matjemshang to kan senan haubou kho haoen ji lo?

⁷Kan ngaanbou hao nyen maibü thükto nyikubou kho haoen aying lo?

⁸Lausikei kanei maimaitham Laishibaa dobü Yaangenbü Ngühkhüm, “Nyi kalepbou to jembü tegü sanoujan,” dogo laubü ngüh loushadtiko kisije kanei janbü kümda;

⁹lausikei kanei the to chühko kisije kanei shabü shonda hoba Ngühkhümei kan la Ngühkhüm lulimbü shedbü kuda.

¹⁰Aishanga müt cheei Ngühkhüm chenei phaiyeda longa hao Ngühkhüm dubou la yeida.

¹¹Aishanga, “Asangalanbü tejungei,” dogo laubouei toukei, “Müt tühaiti,” dogo laukei. Nyi asangalanbü ajungeida lausikei nyi müt haitialonga, nyi Ngühkhüm lulima.

¹²Hibü, müt do ngetibou ngühkhümei matjemlabü mütshuong phatko lauashi hoba kümashi.

¹³Aishanga aoei üeisanou alen, kho müt to matjembouei üeisanou akilabü. Lausikei aoei üeisanou lena, hao matjembou to aikei hatlabü aki.

¹⁴Ngeibü jaisinasi shuong, müt cheei hao mailem kia dogo lauenalonga, lausikei hao kümsilei akilonga, ai ku? Kho mailemei hao khümenla thüklep lo?

¹⁵Jaisina ayingsi nousina che neisimei hoba chale nyak ühüpshauko kisije,

¹⁶hoba kan yoa cheei, “Maisho ngaishi, lematham kishi hoba maisho shaushi yungshi,” dogoje lauan haoen khambü akulonga, khonei ai ku ki?

¹⁷Mailemkei kümsilei ayolonga, ngühkongje haibü.

¹⁸Lausikei müt atei laulabü, “Müt cheei mailem ki, lubü cheei kümsilei ki.” Kholonga, “Kaibü kümsilei ayoko kaibü mailem kü la lenbü, hoba ngei ngeibü kümsileiei ngeibü mailem ka la lenkho.”

¹⁹Mühghaü che ong ki dogo kanei mailemda lo? Maiakei. Shabü soushou shuongeikei mailemda hoba lühda.

²⁰Kan ngoubü shuong! Kanei maimaitham kümsilei ayoko mailem kho sho dogo ditenmang sühda lo?

²¹Seneibü pi Abraham shangabü damanchühashi. Hao shou Isak lemshona lembü danko, haoeibü kümsileiei hao Mühghaü thedanga janbü hapbei aying lo?

²²Haoeibü mailem si kümsilei chela thambei dogo kanei ühüpda lo? Haoeibü kümsileiei mailem pentisoutikei.

²³Hibü Laishibaei, “Abrahamei Mühghaü to mailembei, hoba haoei mailemsije, Mühghaüei hao saopobü dogo sungletkei,” hoba Mühghaüei hao to hao thangbou dogo ngakei.

²⁴Mailem lansanei aying, lausikei kümsileiei müt che mat maitida dogo kanei hapda.

²⁵Suonlamnyu Rahab daman chühashi. Sao lai sungletenlabü lele aukabü hapbei? Saoeikei denche kümbei. Saoei ngühlang künbü shuong sungletkei hoba haoen lubü lam che to sattikei.

²⁶Ailai soushou ayoko mang haibü, kho tegü kümsilei ayokoje mailemkei haibü.