Read Chang Naga JAKOB 3 Bible Online

JAKOB 3 - Chang Naga bible

JAKOB 3

¹Ngeibü jaisinasi shuong, kan yoa juong thamje lenbou ayeijan; sen lenbou shuong kho lubü to kaangbou mat jemlabü dogo kanei ngejan.

²Sen pendouei juongnyu mashikda. Müt cheei haoeibü ngühanga ladangkei amashik longa haoje penbüsoubü müt. Kho tegübü müt cheeije haoeibü langkei khümbo kho the- petbü phanga phoenlabü.

³Haoen thepetla hoba seneibü ngüha letila shanga senei koli la sembunga janglüh jinkuda, hoba senei sen haumang sühbü to haoen leiyeida.

⁴Longchem shuongkei, yaangasikei hoba sekbülakbü yeiei soulangsikei, longlei-wa hanbüshouei longchem leibouei lae maangangdaje thi sepeida.

⁵Hibü lishangkei kho tegü yingkei. Ho manga küksihuo hanbü che ong ki, lausikei haoei lilisese ngüh yaangbang angda. Yam kho aeibou shangasikei wan hanbüshou cheei laaktila thükkei.

⁶Hobaje lishang kho wan hoba amaibü kaodak ki. seneibü mang küksihuo yoa hao danko asaopobü yaang longtida. Haoeibü wan kho molowan ka longda hoba hoei seneibü mang khümbo wana lontida.

⁷Mütei thepetla athüklabü ayingsi saman achühbü meisiau phang, ayingsi au, shanbü yangsikok, ayingsi ngau, aikei aki;

⁸lausikei aoeikei lishang thepetla athük; ho athepetenbü hoba hailabü komei shenan kibü amaibü peisilei che ki.

⁹Senei ho seneibü Bunyubou si Bou sangla jungeida; senei ho Mühghaü phatbüa kümbü müt to khükla jungeida.

¹⁰Sembung jeteibü ka nyensangbü si khüksiuok angda. Ngeibü jaisinasi shuong, kho khei ayingjan.

¹¹Deikük cheei jeteibü bakshang ka dei teishikbü si khauekbü koutida lao?

¹²Ngeibü jaisinasi shuong, bhuklonga oliv ayingsi semlüh lia bhuk hekda lao? Ladangkei aying. Ayingsi jemdei khün ka deimai bakla athük.

¹³Kan yoa songbüdobü hoba ditenbü müt kia sai? Hao langkei hoba thechüh tükdebü songsihon ka longbü sembüambü tetsida che yingshi.

¹⁴Lausikei kaneibü maangpona khaubü theshou hoba aeilam aeiphop kisije kan lolo yongtelam hoba ngühmai khulimbo amlang telau.

¹⁵Kho thükae ka louyenbü songsihon aying; lausikei ho kaodak kabü, asao- pobü hoba shabü mühghaüei kubü ki.

¹⁶Aishanga ainei theshoubü hoba aeilam aeiphop ki khonei ajiaphai hoba kümsilei amaibü pendou kida.

¹⁷Lausikei thükae ka louyenbü songsihon kho shaangboua hinseibü, kho phaia hakso, eaaoabü; ho üeisanouei shenakei hoba kümsilei maibü lang hektida; ho the achühbü hoba lanbü.

¹⁸Sangmai kümbü shuong aoyouei sangmai wenda haoenei saopobü latlabü.