Read Chang Naga JAKOB 4 Bible Online

JAKOB 4 - Chang Naga bible

JAKOB 4

¹Kan yoa wapyo hoba oyongümyo habü pendou ho laka longda? Ho kaneibü maanga athakko wapyoko kibü kaneibü küksihuo nyekdüh maangdüh ka longda ji sai?

²Kanei denche mangsühda hoba kho kanei ühüpda; khoei kanei müt at haitida. Kanei kanei ühüplabü at lamda, kho danko kan oyongüm- yoda hoba wapyoda. Kanei mangsühbü kanei aki aieilausi kanei Mühghaü to ahida;

³ayingsi kanei hia tegükei kanei ühüpda aieilausi kaneibü dambü kho shedakei. Kanei kaneibü nyekdüh maangdüh senyühshemtila shanga ong hida.

⁴Maangalanbü mütshuong! Kanei kaodak sanoualonga kan Mühghaü dangbou shuong dogo kanei aditenda lo? Aoei kaodak sanoula pienlaje haoei hao lolo Mühghaüeibü dangbou la yeida.

⁵Laishibaei “Soushou laobou sen to kitikei, kho soushou to Mühghaüei waangko nyekto shatda” dogo laubü ho kanei amlangbü dogo damda lo?

⁶Lausikei waangko nyekto shatbü toje haoei kubü onou kho yaangbou. Aishanga Laishibaei lauda, “Mühghaüei lilisesebü thangetda, lausikei haoei eaaoabü la onou kuda.”

⁷Hibü Mühghaü phanga kishi. Shabü mühghaü tokashi hoba haoei ka jungka laangjung satkulabü;

⁸Mühghaü jungto nyangko kai, hoba haoei ka jungto nyanglabü. Kan shabü shuong, kaneibü ik sakenashi; kan maangpon nyi yembü dan, kan maangpon saüenashi.

⁹Ngangko mang lamashi hoba haapashi; kan nyibü manghaapbü la yeiashi hoba kan olinbü thekhümbü la yeishi.

¹⁰Bunyubou thedanga kan lolo eaaoa yeiashi, hoba haoei kan tonenlabü.

¹¹Jaisinasi shuong, kan cheei che amaibü telauei. Aoei jaisina amaibü shangabü laueida ayingsi aoei haomat jemda haoei Ngühkhüm khulimda hoba Ngühkhüm mat jemda. No Ngühkhüma matjemshanga setalonga, no Ngühkhüm jungeibou aying lausikei matjembou yeida.

¹²Ngühkhüm kubou hoba matjembou che ong ki, hoba haoei püetla hoba mautila thükakei. Lausikei ka lepbou la matjem kulabü no ao?

¹³Kan ateije, “Tat ayingsi ngiet kho sangnyu to haulabü hoba khünei po che thünglabü; hoba nam seilabü hoba pailetlabü,” dogo lauda. Lausikei chühshima!

¹⁴Ngiet ai haüthüklaje kanei lenla athükkei. Kaneibü langkei ai? Aishanga longche hapda hoba mauan apbü deihak kho kan ki.

¹⁵Aeiko kaneije, “Bunyubouei maang angalonga kün lang kilabü hoba künei ho ayingsi kho kümlabü” dogo ong laujan ki.

¹⁶Lausikei kanei yonglamda hoba yaangenda; kho tegübü yonglam lili shabü.

¹⁷Hibü aoei kümsilei maibü kümla ngeda hoba akümda, hao shabü müt.