Read Chang Naga JAKOB 5 Bible Online

JAKOB 5 - Chang Naga bible

JAKOB 5

¹Kan keibü dan, tou kü ngüh ditkai! Kan thükto louko kibü khonku shanga kanei haapashi hoba ngekyoashi.

²Kaneibü nyaksinam shemda hoba kaneibü neisimei phetei künda,

³hoba kaneibü hon si chandinam dühei künda. Kho düh kan khulimbo aukabü yinglabü, aishanga hoei wanui tegü kaneibü phe shaukhümlabü. Kaodak thonshang che to loujinei nyaksinam thanshaiakei.

⁴Lausikei kaneibü seka youshou latkubü mulebü shuong la ladangkei mu akukei. Haoenei kaangbang ngekyoda, hoba youlatbü shuongei ngekyobü langhei Thükenbü Bunyubou Mühghaü noukhüna sühlanga.

⁵Kan kaodaka apsilebü hoba olinkungkhena kikei. Kan masu tegü netyoko shaikei hoba haitilabü chalou kho lousüha.

⁶Kanei saopobü müt khola shedbü kukei hoba haitikei hoba haoei kan to atokngaida.

⁷Jaisinasi shuong, Bunyubou aloushongko natenashi. Sekmoubüei shaangbou si phaibou lang aloushongko natenko sekkabü namsek shusiphon shanga haiteida.

⁸Kaneikei natenjan hoba kaangkhühtham lojan; aieilausi Bunyubou loulabü jihsiphai nyanga.

⁹Jaisinasi shuong, cheei che khulimbo tenyamnyamyo; khei yingsi ong kankei matjembü akilabü. Matjembou kho hanei koukhüma loakei.

¹⁰Jaisinasi shuong, kanei natenbü hoba khonsak ka tetsida mangsühsije, Bunyubou nyena laubü thuseibü shuong shangabü damanchühshi.

¹¹Aoyouei thon sühko natenkei, haoen to senei olinbou dogo lauda. Jobei latetche natenkei kho shangabü kanei dida, hoba Bunyubouei thonla hao shanga ai kümbei kho kanei hapa. Bunyubou kho üeisanou si onouei shenan ki.

¹²Ngeibü jaisinasi shuong, pendou phoyoan, kanei theletlanletbü ajungeijan. Kanei khuthük ayingsi kaodakei, ayingsi lubü ai nyenakei tethetelan. Kanei ladang “haü” laulaje kho “haü” hoba “ji” laulaje kho “ji” yingjan; khei yingsi ong kan Mühghaü matjemshang to aloutilabü.

¹³Kan yoa at khonkua kia sai? Haoei welaujan. At olinko kia sai? Haoei chia laujan.

¹⁴Kan yoa at shatko kia sai? Haoei lashong jaishou shuong ngashi hoba Bunyubou nyena hao la onang naangkuko hao shanga welaukushi.

¹⁵Hobaje mailema welaukubü khoei shatbü kho mailabü; hoba Bunyubouei hao pientilabü; hoba haoei shabü shonan kiasikei, hao la amai apbulabü.

¹⁶Hibü kan maila shanga, jenabouei jenabou thedanga jembü shabü theletashi; hoba jenabouei jenabou shanga welaukuashi. Saopobü mütei welaubü hoba kümbüleibüa hau yaang kia.

¹⁷Elijakei sen tegübü müt kikei, haoei lang aloutila shanga kaangkhühtham welaukei, hoba kaodak to po sem hoba lit lak lang alou.

¹⁸Haoei nyibou welaukei, hoba mühnyuei lang yantikukei hoba kaonyuei mai hekkukei.

¹⁹Ngeibü jaisinasi shuong, kan yoa at ngühmai ka ayinglamto satalonga, hoba müt cheei hao sepeijung longeitia longa,

²⁰aoei shabü müt che haoeibü ayinglam ka leingaibada, haoei kho müteibü soushou haibü ka khümenlabü hoba shabü juongnyu küpletkulabü, dogo haoei ngeashi.