Read Chang Naga 1 PETER 1 Bible Online

1 PETER 1 - Chang Naga bible

1 PETER 1

¹Ho le Jisu Khristaeibü youko- ikjai Peter ka ki. Ho Mühghaüei shenshen ngenge pienbü hoba Ponta, Galatia, Kapadokia, Asia hoba Bithinia jembo langsenbü shuong tegü aan kibü shuong shanga. Haoei kan Soushouei saüentikula, Jisu Khrista ngüha letila hoba hao siiei laktila pienkukei. Kan jungto onou hoba hakso apsileko yingshi.

³Seneibü Bunyubou Jisu Khristaeibü Mühghaü hoba Bunyubou sangashi! Haoeibü üeisanou yaangbüa Jisu Khrista haibü ka langngaitibü danko sen la langkei haanbü kukei hoba sen langkeibü maanglem jungto leibakei,

⁴kho ponpen thon akilabü phetphan to atenlabü maanglem ki. Haoei ho leilula athükbü hoba yuila athükbü khuthüka kan shanga phokuda.

⁵Aieilausi ladang haoei haoeibü khümenbü nyekchüh tang khitla lamlelaje kheijinei Mühghaüeibü seiei kan lomatda hoba kho thonbü chaloua haoei kan püetlabü dogo kanei mailemda.

⁶Longche shanga kan khonku hoba shieinangei phang juongei takteiasikei, kan hanei aeibou olinlabü ki.

⁷Khonei nyekchüh che kia. Khoei kaneibü mailem kho maibou dogo lenenda. Yaüshema juokenbü yingasikei hon mauda. Ladang kaneibü mailem takteienlaje kho khütoje namsek ki, aishanga Jisu Khrista tang khitjinei haoei kan la nyensang, soneikangbü hoba soumo sungbalabü.

⁸Kanei hao ühüp lausi dogokei hao sanouda, hoba kanei tou ühüpasikei kanei hao to mailemda hoba ngühei alenenbü soneikangbü olinei kan shenakei,

⁹hoba kaneibü mailem thonbü, khei kaneibü soushou khümenbü kanei hapakei.

¹⁰Ho khümenbü shangabü thuseibü shuong aoyouei kan shanga takletbü onou shangabü tetenkei, haoenei ho khümenbü shieikei hoba haujembo lambei.

¹¹Ladang haoen to kibü Khrista Soushouei, Khrista khonkulabü hoba phaia soneikanglabü shanga shean lenkei, kheijinei kho ao to hoba ai thua haüthüklaje dogo haoenei lamenla haujembei.

¹²Haoenei khangenko kibü kho haoen pailetlabü shanga aying, lausikei kho kan shangabü dogo tang khittikei; hoba tou, kho nyekchüh kan to khuthük ka hautibü Soushou Saopobü danko kan la Ngühlang Maibü künbabü shuongei ngekleda. Khübü to khuthük hangangbü shuongei mangkei chühmang sühkei.

¹³Hibü pialemashi hoba jembü lolo thepetan kishi. Jisu Khrista loujinei kan la sungbalabü onoua kaneibü maanglem khümbo phoashi.

¹⁴Mühghaü to ngüha leashi hoba kan angejinei che pejapelabüa kibü maangdüh la tethükti.

¹⁵Kan ngabou kho saopobü ki hoba kankei kaneibü langkei phejan wekoa saopobü yingjan.

¹⁶Aishanga Laishibaei lauda, “Kan saopobü kishi, aieilausi ngo saopobü ki.”

¹⁷Hobaje aoei the to achühko mütpem weko jembü kümsilei thüng mat jemda, hao to kanei Bou dogo ngada longaje, kan ho kaodaka yenla leko haangbü jihsiphaia hao la soumo kuko kishi.

¹⁸Kaneibü pisibou ka jungeijung loubü lejim akibü langkei hangsilam ka maulabü peisilei hon ayingsi chandinamei kan angthetkei aying.

¹⁹Lausikei kan nali athebü hoba kap anakbü san shoushou tegü lembü Khrista siiei angthetkei.

²⁰Kaodak mo- yaüjinei thama hao kho shanga pienkei, lausikei jihsiphai thonbüa kan shanga tang khitkei.

²¹Aieilausi, hao haibü ka langngaitian phaia ong toukei soneikangbü yaang kubou Mühghaü to kanei hao danko mailemda. Hao danko Mühghaú to kanei mailem hoba maanglem ki.

²²Tou kan ngühmai to ngüha lebü danko kaneibü soushou saüenkusije hoba jenabouei jenabou to sanouda yingsije, kaneibü sanou kho kaangbüsekbü hoba hinseibü maangpon ka yingshi.

²³Kan nyibou buka. Kaneibü bou kho hailabü ayingko ühailabü müt ki. Kan pendou amaulabü langkei Mühghaü ngüh danko bukkei;

²⁴aishanga, “Khunak shousi pendou sang tegü ki, hoba khoeibü soneikangbü pendou sang chipen phatko ki; sang yuida hoba chipen setda;

²⁵lausikei Bunyubou ngüh ponpen kida.” Kho kan to songlenbü Ngühlang Maibü ki.