Read Chang Naga 1 PETER 2 Bible Online

1 PETER 2 - Chang Naga bible

1 PETER 2

¹Hibü amaibü si khüpbülangbü pendou, hibüyoubü pendou, theshoubü si ngühshed laubü pendou kan lolo apyoashi.

²Bukletbü nasakei nyueibü sen lambü tegü kan khümenbüa chingla shanga kaneikei soushou sendei lanbü khüto maangdakashi.

³Aishanga Laishibaei lauda, “Kanei Bunyubou sanou kho jepan chüha.”

⁴Hibü hao jungto kaiya. Hao langkeibü laangnyu che ki, maimaitham inletkei lausikei Mühghaü thedanga pienbü hoba namsek ki.

⁵Langkeibü laang shuong tegü hao jungto kaiya hoba soushou chem che la yeiko dangenashi. Khünei kan Mühghaüei Jisu Khrista danko sungletenlabü lele soushou lembü kula kan saopobü ungshedbou dan yeilabü.

⁶Aishanga Laishibaei lauda, “Chühashi, ngei Ziona pienbü laang hoba namsekbü chemnyek laang che denda. Hobaje aoei hao to mailemlaje hao ihimoutilabü.”

⁷Kan aoyouei mailemda haoen shanga ho namton laang ki; lausikei aoyouei maialemda haoen shangaje; “Laang laobou chemdangbü shuongei inletkei kho chemnyek laang la yeikei.”

⁸Tokei Laishibaei lauda, “Ho mütshuong phaiyetlabü hoba toket thangetlabü laangkudak che ki.” Haoen phaiyetda aieilausi haoenei ngühlang to ngüha aleda; kho haoen shanga piensapbü kiteikei.

⁹Lausikei, nakthühbü ka maangpanglabü ngesakbü to kan ngaanboueibü soneikangbü kümsilei tang khittilabü lele kan saopoenbü phang, Choba ungshed lilabü, saopobü phang, hoba Mühghaüei lebü kan shuong ki.

¹⁰Cheje kan phang akiteibü; lausikei tou kan Mühghaü phang ki. Cheje kan haoeibü üeisanou ühüpbo kiteikei; lausikei tou kanei üeisanou hapa.

¹¹Sanoubü jenabou shuong, kan ho kaodaka yen che tegü ong kijung danjinei kaneibü soushou khulimbo wapyobü kaodak shabü dühbü ka satenashi dogo ngei kan to sudajada.

¹²Kan kümsilei amaibü kümbü dan dogo yuktiko laujinei mangkei, hao matjemla lounyet kaneibü kümsilei maibü hapan Mühghaü la soneikangbü kulabü lele, küksithang yoa kan kho tegübü langkei maibüa kijan.

¹³Kanei Bunyubou laüa müteibü ngühkhüm hau pendou phanga yeishi; khei Choba to hao pendou to thükkabou dogo,

¹⁴hoba governor to hao kümsilei amaibü kümbü shuong shieinangeilabü hoba kümsilei maibü kümbü dan nyen sangla shanga haoei hautikei dogo ngüha leshi.

¹⁵Aishanga maibü kümbü danko kanei ngoualouabüei asangadobü ngühsidei angbü ngüh üangko aptila Mühghaüei maangangbü ki.

¹⁶Kaneibü dongebü kho amaibü kümsilei yukjin la aleko Mühghaü sambü shuong tegü kila haoei kan dongebü mütshuong yingtimang sühda.

¹⁷Müt pendou la soumo kuashi; Mühghaü to hatashi; Choba to soumo hatashi.

¹⁸Sambü shuong, kanei soumo hatbü pendouei, maibü hoba ea aoabü to ong aying, toktokbü tokei ditkuko jembü bunyu phanga kishi.

¹⁹Aishanga atei ajan ayingbüa khonsaktisikei Mühghaü shanga dambo natenalonga kho Mühghaü junga sungletenlabü ki.

²⁰Kaibü shedbü shanga ngümeibü natenbü ka nyi ai ku ühüpda. Lausikei nyi maibü kümbü shanga khonsak natenalonga kho Mühghaüei sungletenlabü ki.

²¹Kho kümla shanga kan ngakei, aishanga hao youmo phai semtila shanga Khristakei kan shanga khonsakkei hoba kan la tetsida che apyokukei.

²²Haoei shabü ashon hoba ladangkei yepeibü ngüh che ongkei üang.

²³Ladang hao nyikukei haoei sepeian anyiku, ladang hao khonsaktikei haoei ühütlen lausikei ngühmai matjembou la hao lolo nongtian phokukei.

²⁴Sen shabü la haikuan saopobü shanga lang kilabü lele haoei lolo peiseia jembü manga seneibü shabü künngailangkei; hoba haoeibü moukhünei sen maitikukei.

²⁵San shuong tegü kan ayinglam to hauko kiteikei, lausikei tou kan Sanlombou hoba kaneibü soushou Lombou jungto sepeijung longeia.