Read Chang Naga 1 PETER 3 Bible Online

1 PETER 3 - Chang Naga bible

1 PETER 3

¹Kan yaksi shuong, kaneibü laosi shuong phanga kishi. Laosi atei Mühghaü ngüh to maialemsikei kanei kan kibülebü thechühei haoen thükenla haujemjan.

²Kan lanbü hoba Mühghaü to hatbü haptiashi kholonga ngühei laula ai alonglabü.

³Kan saomaibü kho woubü khuthep, chimen yakmen hoba hele tegübü tang chühlabü he shanga ayingjan.

⁴Lausikei müt cheeibü langkei maangkabou tham ka longbü takshatbü hesihang lenjan. Kho soushou aieikei leilutila athük hoba Mühghaü thedanga namsek ki.

⁵Aishanga Mühghaü to maanglemei chühbü shangiedbü yaksa shuong sao khei maikei. Haoenei haoeneibü laosi shuong ngühkhüm phangto atkei.

⁶Tetlabüei, Saraei Abraham to ngüha lekei hoba hao to “Kü bunyu,” dogo ngakei. Kanei maibü kümsije hoba kan aineikei asukatemtilonga kan saoeibü nouyang shuong ki.

⁷Kan laosi shuongkei kaneibü chemdang langkeia jembü yaksi shuong to eaaoa kishi. Haoen hau akibü aedang ki hoba kanei haoen soumo kuko jungeijan, aishanga haoeneikei kan yoa Mühghaüeibü maangmai langkei jongsak janyoda. Kholonga kaneibü welau kho aieikei ashopetlabü.

⁸Thonla, pendou maangpon chela lean, üei dambüa cheei che to jaisinasi tegü sanouyoashi. Ea aoabü maangpon yembü hoba sembüambü yingshi,

⁹amaibü jeila amaibü, ayingsi khüksiuok jeila khüksiuok tengaiti. Khü- peinyu haülabü kungaiashi; aishanga Mühghaüei kan ngabü kho ho haülabü hapla shanga kiteikei.

¹⁰Laishibaei laubü tegü, “Müt cheei langkei sanoualonga hoba olinbü chalou hapmang sühalonga, haoei amaibü ka haoeibü lishang, hoba khüpsilang ka haoeibü sembung senetjan.

¹¹Haoei amaibü ka sepeian maibü kümjan; haoei hakso lamjan hoba kho athakko shieijan.

¹²Aishanga Bunyuboueibü nyek saopobü shuong aenei ki hoba ponpendou haoeibü welau ditkula lamleakei, lausikei amaibü kümbü shuong ka hao thenyek sepeida.”

¹³Kan maibü to maangdakan kialonga, kan khonsaktila ao ki?

¹⁴Lausikei kan janbü kümbü shanga khonsaklabü kialonga kanei haükei. Müt to tehüt, hoba haoenei no mokde tüpyoti.

¹⁵Khrista kho Bunyubou ki dogo ka maang- pona saüenan phoashi. Kan pendouei phejan leko kibü maanglem shangabü pü leko laula kan to atei phealonga jongaila ponpendou lamlean kiashi.

¹⁶Lausikei eaaoa hoba soumo hatko jongaiashi. Kan khulimbo laubü hoba kan nyikubü shuong kaneibü Khristan thechüh maibüei himoutilabü lele kaneibü sensimaang hinseitham phoashi.

¹⁷Mühghaü maang angbü ong yingalonga amaibü kümbo khonsakhoulabü khantoje maibü kümbo khonsakbü maibou.

¹⁸Aishanga Khristakei seneibü shabü shanga hoba pendou shanga che haikei. Hao saopobü yingsikei, khei kan Mühghaü jungto leibamang sühla asaopobü mütshuong shanga hao haikukei. Hao phea haikukei lausikei soushoua langngaitikei.

¹⁹Soushoua hao yankei hoba thüngdang kabü soushou shuong la songlenkei.

²⁰Khübü kho shangied Noa jihsiphaia Mühghaüei lounyu natenko haisühsikei hao ngüha alebü shuong ki. Longchem khünei müt shijo, khei müt set ong dei danko püetkei.

²¹Hanei dei tetlabü baptibü. Baptibü kho mang ka mak sakan apbü aying lausikei sensimaang lanbüei Mühghaü to theletbü ki. Jisu Khrista langngaibü danko kan tou khümenda.

²²Khuthük hangangbü shuong, songdak hau shuong hoba sei shuong pendou hao phangto lotkei; hao khuthük to atkei hoba tou Mühghaü mae aenei kia.