Read Chang Naga 1 PETER 4 Bible Online

1 PETER 4 - Chang Naga bible

1 PETER 4

¹Khrista phea khonkukei dogo hapda. Hibü kan kho jeteibü maangponei lamleashi, aishanga ladang müt che phea khonsakda kheijinei haoei shabü to kümsilei wana.

²Hobaje kaneibü joubü salang shuong müteibü maangdüha tekhonyo lausikei Mühghaü maangangbü kümashi.

³Danbü jiha küksithangei maangdakbü jungeila kanei jih souko lea. Hobaje pejapelabü, nyekdüh maangdüh, ihjakbü, olinkungkhen, shaumang yungmang hoba saüjim heangsho lembü langkeia kan kijung loua.

⁴Ladang kan haoen apsileko haangbü langkei yoa ayanglaje haoen maangpanglabü hoba kan shalabü.

⁵Lausikei langkeibü si haibü ham matjemla lamlean kibou to haoenei ho jongailabü.

⁶Aishanga phea kibü mütshuong tegü haoen maimaitham matjemlabü, lausikei Mühghaüei maangangbü tegü soushoua lang kilabü, ho ngüh shanga haoen haibü shuong tokei Ngühlang Maibü songlenkei.

⁷Lausikei ajanjan pendou thonshang che to louada. Hibü kan welauenlabü lele maangpon tükde hoba jembü lolo thepetbü kishi.

⁸Kongnyuleko kan cheei che to maangpon khümboei sanouyojan; aieilausi sanouei shabü juongnyu küplepkuda.

⁹Jenabouei jenabou to anyamnyambo yensüh maiyoashi.

¹⁰Mühghaüei haoeibü onou hangsilam juongnyua kan la nongkuakei. Kan la nongkubü ikjai haüthüktila shanga kanei jenabou si jenabou khangenyobüa kaneibü mütpem jongsak kho jungeijan.

¹¹Müt cheei songlenlabü denche kialonga haoei laubü kho Mühghaü ngüh yingtijan; müt cheei khangensije, haoei Mühghaüei kubü hau to nongashi. Ajanjan pendoua Jisu Khrista danko Mühghaü soneikangtiashi; soneikangbü hoba sei tou hoba ponpen haoeibü; Amen.

¹²Sanoubü jenabou shuong, kan wanei takteibüa kanei adambü che kühshuokbü tegü maangtepang. Ho kan takteila loushatda.

¹³Lausikei latetche kan Khrista khonku janyobü shuong ki, hao soneikangbü tang khitjinei kan aeibou olinbüei olinenlabü shanga, khütetche kho olinashi.

¹⁴Kan Khrista shanga nyikualongaje kan haübou dogo weeiashi, aishanga kheijinei soneikangbü Soushou, laobou Mühghaü Soushou ki, kho kan thükto lotda.

¹⁵Kan aokei müt haitibou, ayingsi kokbü, ayingsi shedtibou ayingsi aukhen aulepbou che tegü khon asakjan.

¹⁶Lausikei at Khristan yingbü shanga khonsaka longa, kholongaje khünei ai himoulabü aki. Nao! Lausikei kanei kho nyen thongbü shanga olinashi.

¹⁷Matjembü jih süha. Ho Mühghaü chem ka khangda; hoba ho sen ka khangalonga, kholongaje Ngühlang Maibü to ngüha alebü shuong shanga lai thonla?

¹⁸Laishibaei laubü tegü, “Saopobü shuong usheileko khümenalonga, Mühghaü to ühütbü si shabü shuong aila yeila?”

¹⁹Hibü aoyou Mühghaü maang- angbüa khonsakda, haoenei maibü kümbüa maanglemenbou Kümbou la jembü lolo khümbomeiko kuashi.