Read Chang Naga 1 PETER 5 Bible Online

1 PETER 5 - Chang Naga bible

1 PETER 5

¹Tou ngei kan jaishou shuong to denche lenlabü kia. Khrista khonsakbü tükde hapbou hoba tang khitla kibou soneikangbüa phejan hapla maanglem kibou thujam-jaishou che tegü ngei ho lauda.

²Kan yoa Mühghaüeibü ai sanshuong ki kho thounouashi. Kan la jangkubü shanga aying lausikei Mühghaüei kan la kümtimang sühbü tegü maangnyu angko lomashi. Mu shanga aying lausikei kaneibü maangdakei khangenashi.

³Ka la nongkubü shuong thüka bunyu teyei lausikei sanshuong shanga tetsida yingshi.

⁴Ladang Kongnyubou Sanlombou tang khitlaje kanei sao asatbü soneikangbü thükbü khun haplabü.

⁵Kan heshou shuongkei jaishou shuong phanga kiashi. Kan pendouei jembü lolo jenabouei jenabou khangenla eaaoabüei shembe homashi; aishanga Laishibaei laubü tegü, “Mühghaüei lilisesebü thangetda, lausikei eaaoabü la haoei onou kuda.”

⁶Hibü, jihaphaia haoei kan tonenlabü lele kan lolo thükenbou Mühghaü ikmanga semetametashi.

⁷Kan maangmaubü pendou hao to phoashi, aishanga haoei kan shanga dambuda.

⁸Damanchühbü yingshi, pianleman kishi. Ngühko kibü molosaonyu tegü, kaneibü labou, shabü mühghaüei, ao suienlaje dogo lambo paida.

⁹Mailema kaangashi hoba hao tokashi, aieilausi kaodak pendoua kaneibü thujam-mailembü shuongeikei jeteibü khonsak künda dogo kanei ngeakei.

¹⁰Onou pendou Mühghaü, aoei kan Khristaa hao thon akibü soneikangbü to ngakei, kan longche khonkuan phaia haoei kan pentisoutilabü, kaangngaitilabü hoba hau kingaitilabü.

¹¹Hao to ponpen thon akiko songdak hau yingshi; Amen.

¹²Ngei maanglemenbü dogo weeibü ngeibü jaisina Silbana thuibü danko ngei ho le tuisho kan jungto ho pendou tükdebü Mühghaü onou ki dogo kan thungeijangeila hoba aukabü künla dokei.

¹³Kan tegü pienbü Babilona kibü lashongei hoba kü shou Markei kan la salem küntida.

¹⁴Khristan sanou sembung shepyobüei cheei che la salem kuyoashi. Kan hao to kibü shuong pendou to Khrista hakso yingshi.