Read Chang Naga 2 PETER 1 Bible Online

2 PETER 1 - Chang Naga bible

2 PETER 1

¹Ho le Jisu Khristaeibü sambü hoba youkoikjai Simon Peter ka. Küneibü tegü namsek mailem kibü shuong jungto, aishanga seneibü Mühghaü hoba Jisu Khristaei haoeibü ngühmaia ho sen pendou la kukei.

²Mühghaü hoba seneibü Bunyubou Jisu Khrista ngebü danko kan jungto onou hoba hakso apsileko yingshi.

³Aoei sen haoeibü jembü soneikangbü si shanenbü to ngakei, senei hao ngebü danko laobouei Mühghaü ngebü langkei longtida, khübü pendou sen la kula shanga Bunyubouei haoeibü soushou sei jungeia.

⁴Kanei soushou langkeia phejan leoulabü hoba kaodaka amaibü maangdühei longtibü leilubü ka satenlabü lele, haoei sen la thükkabou hoba namsek theletbü shuong kua.

⁵Kho shanga kaneibü mailem to maibü, hoba maibü to ngebü dogo shanyola maibouthamei haujemashi.

⁶Kaneibü ngebü to jembü lolo thepetbü, jembü lolo thepetbü to natenbü, hoba natenbüa Mühghaü to hatbü shomyoashi;

⁷hoba Mühghaü to hatbüa jaisinasi sanouyobü, hoba jaisina sanou- yobü to sanou shomyoashi.

⁸Khübü kho kan to sopbojaiko kitialongaje, khoei no sisikbü hoba lang hekbü la yeitilabü hoba kan seneibü Bunyubou Jisu Khrista ngebü penbüsoubü to leilabü.

⁹Khübü akibü mütje nyek yuibü hoba haoei hapla athük. Haoeibü hangbü shabü shuong kho sakenkua dogo haoei adamenda.

¹⁰Hibü jaisinasi shuong, no ngaana hoba piena dogo ngela aeiche haujemashi. Kanei khei kümalongaje kan ladangkei aphai- yetlabü.

¹¹Kho hangeilamei seneibü Bunyubou hoba khümenbou Jisu Khrista thon akibü sangle to atlabü chongchingbü hapda.

¹²Hibü khübü pendou kanei ngeasikei, hoba kanei tou kibü ngühmaia kaangkhühtham loan kiasikei, ngei habü shangabü kan la damentila damsepakei.

¹³Ngo lang ki shongko kan la habü shangabü haansangla yeiko damenngaitilabü ho kü shanga janbü dogo ngei damda;

¹⁴aishanga ngeibü kaodak mang ho tongde thonlabü dogo ngei ngeakei; seneibü Bunyubou Jisu Khristaei kü la khei lena.

¹⁵Ngo bangan phaia kanei habü pendou damentila shanga ngei maibouthamei haujemlabü.

¹⁶Ladang künei seneibü Bunyubou Jisu Khrista soneikangbü seia loulabü shanga lenkei, künei müt maangli maangsangei lamenbü ngühli to ikphen alam. Lausikei hao yaangenbü kho küneibü nyekei hapbei.

¹⁷Aishanga Yaangenbü soneikangbü ka loukei hoba “Ho ngei sanoubü Jayangshou, aoto ngei maangshikda,” dogo laujinei Bou Mühghaüei hao la nyenhang kukei hoba soneikangtikei.

¹⁸Künkei saopobü shongha hao yoa kikei hoba kho ngüh khuthük ka loubü künei ditkei.

¹⁹Hibü künei thusei ngüha kaangko mailemda. Kanei kho ngüh to maangkula maikei. Lang angeshongko hoba kaneibü maang- pona khanyang ngesakbü ohaushongko, ho nakthühphanga ngesakbü wanthung che tegü ki.

²⁰Lausikei Laishiba tetenbü ngüh aoeikei jembü lolo wanenjan aying, kho shaang ngeashi,

²¹aishanga tetenbü ngüh aijih dangakei mütei maang angbüei alou. Lausikei mütshuongei Soushou Saopobüei thungeiko Mühghaü ka laukei.