Read Chang Naga 2 PETER 2 Bible Online

2 PETER 2 - Chang Naga bible

2 PETER 2

¹Lausikei toukei Mühghaü mütshuong yoa amlangbü thuseibü shuong longkei, kho tegü kan yoakei amlangbü lenbou shuong longlabü. Haoenei huphanga lusaklabü amlangbü lenbü longtikulabü; haoenei haoen angthetbou Bunyubou mangkei atheletlabü hoba haoen thükto leilubü hakde sungbalabü.

²Juongnyuei haoeneibü pejapelabü kümsilei phai semlabü hoba haoen hangshong ngühmai lam kho shalabü.

³Haoen nyekdüh maangdüha haoenei kan la amlangbü songlen kuko kan ka nam pailetlabü. Shangieda Matjembouei haoeneibü kayang takletakei. Haoei haoen chüheida hoba haoeneibü Shemtibou ayepbei.

⁴Aishanga shabü shonbü khuthük hangangbü shuong Mühghaüei aphokai, lausikei matjembü chalou shanga haoen khühan molowan to jinkei.

⁵Ayingsi haoei Mühghaü angebü kaodak to yungsen sungbajinei haoei shangiedbü kaodak to aphokai. Lausikei haoei saopobü song lenbou Noa yoa lubü müt nyet yoan püetkei.

⁶Mühghaüei Sodom si Gomora sangyaang shuong tap la yeitikukei hoba haoei Mühghaü angebü la ai haüthükla kho tetsida phoyokukei.

⁷Lausikei haoei Lot püetkei, aishanga hao müt maibü kikei hoba amaibü mütshuongeibü pejapelabü thechühei hao maangpon aeibou noukei.

⁸Müt maibou kho haoen yoa chalou angbüa kikei. Haoenei kümbüleibü pendou haoei hapbei hoba ditkei, hoba haoeneibü Ngühkhüm lulimbü kümsileiei haoeibü saopobü soushou khonkukei.

⁹Bunyubouei saopobü shuong takteibü ka lai püetla, hoba asaopobü shuong, kongnyuleko aoyouei phe phai sembo asaopobü nyekdüh maangdüha paida, hoba songdak hau pendou nyikuda, haoen la lai kayang kuko matjembü chalou shanga phola, haoei ngekei. Haoenei khausak longan jembüei jungeimang sühbü jungeiko haoenei khuthükbü soneikangbü shuong shala ühütda.

¹¹Lausikei khuthük hangangbü shuong haoen to hau kibou hoba seia khaibou yingasikei haoenei Bunyubou thedanga haoen khulimbo attibü matjem asungbada.

¹²Khübü mütshuong haoen lolo minngailangan hailabü haangei kümbü phangkabou meisiau phatkei. Haoenei haoenei aditenbü shangabü amaibü lauda hoba haangeibü meisiau tegü haoen lolo shemlabü.

¹³Haoenei khü- peian kümbei hoba kho shanga haoen khonsakngailabü. Haoen changea kusembüa olinyoda. Kan dan yoa haoen kho kapnak hoba nali phatko ki. Kan yoa shauyo yungyojinei mangkei haoenei kan huonettida hoba khonei haoen olinyoda.

¹⁴Haoeneibü nyek asangalanbüei shenan shabü kümbü ka anangda. Haoenei maang akaangbü sulangda. Haoen aeilam aeiphopbüa ngütakei, haoen Mühghaü shedsikhau phanga kia.

¹⁵Haoenei tangshaibü lamnyu apyoa hoba amaibü hoba amaibü mu mangsühbou Bosor shou Balaameibü lamnyu phai ayingbü to semlanga.

¹⁶Lausikei Ngühkhüma shedtibü shabü shanga hao hakeikei. Ngüh alaubou gadu cheei müteibü ngühei lauko thuseibou dalabü kho thangetkei.

¹⁷Khübü mütshuong dei adangbü deikhün, yeinakei soulangbü sangmei tegü ki. Haoen shanga nakthühbü haübü lamlekuakei.

¹⁸Haoenei amlangbü yonglam ngüh lauko, shedbüa kibü ka longeiko kibü dan to pejapelabüei phe nyekdüh maangdüha suletda.

¹⁹Haoenei haoen la dongebü thekuda, lausikei haoen bouje leilubüa aao shuong ki, aishanga müt che kho hao thüka bunyu leboueibü aao ki.

²⁰Aishanga Bunyubou hoba Khümenbou Jisu Khrista ngebü danko kaodak ihinseibü ka satenshang to louan phaia, kho sunga ong nyiboula mintiko thüktialonga haoeneibü thonbü thu kho shaangbou thu tokei amaibou yeida.

²¹Saopobü lamnyu ngean phaia sepeijung ngaian haoen la kubü saopobü Ngühkhüm inletkhoulabü haangaje haoen shangaje ladangkei angeenko kibü kho khaibou yingkhoulabü.

²²Tetentanbüei laubü ngüh kho haoen shanga tükde loushatda: “Keiei jembüei ngaitibü to longeida,” tokei “Uk che la mang yukuashi hoba saoei thima khonlabü,” dogo laubü kia.