Read Chang Naga 2 PETER 3 Bible Online

2 PETER 3 - Chang Naga bible

2 PETER 3

¹Ngei sanoubü jenabou shuong, kan jungto ho ngeibü le nyiboubü ki. Hama, saopobü thuseibü shuongei shangied laubü ngüh shuong hoba kaneibü youkoikjai shuong danko laubü Bunyubou hoba Khümenbou ngühkhüm kanei damenla shanga ngei kan la damentiko, kaneibü dangshatbü maangpon sinentida.

³Shaangboua, jembü aeilam aeiphop maangdühei ong shenan kibü danshuong longlabü hoba haoenei kan nyikulabü dogo ngeashi.

⁴Haoenei, “Hao nyibou loula thekubü kho lanei ki? Aieilausi küneibü bousi shuong haibü ka jaüan tat sühko ajanjan pendou kaodak pakjinei kibü yama kia,” dogo laulabü.

⁵Shangieda müh shuong kia, hoba Mühghaüei ngühei lausi kaodak kho dei ka yeikei hoba dei kanglanga kikei dogo ngean shenshen haoenei atheletlabü.

⁶Khübü deiei kho jihsiphai kabü kaodak danglepbei hoba shembei.

⁷Lausikei Mühghaüei toukei jeteibü matjembü chalou shanga tou kibü müh shuong si kaodak kho photeiakei dogo lauda. Kheijinei khübü kho lonlabü hoba asaopobü mütshuong pendou shemlabü.

⁸Kü thangbou shuong, kanei ho tema: Bunyubou yoa chalou che kho po hajar che tegü hoba po hajar che kho chalou che tegü ki.

⁹Ho mütshuongei dambü tegü Bunyubouei haoeibü thekubü loushadtila maang yaangkei ji. Haoei kan to haisühda hoba aokei mautimang asühda. Haoei müt pendou maangpon sepeibü to loutimang sühda.

¹⁰Kokbü che tegü Bunyubou Chalou loulabü. Ladang kho loulaje mühshuong kho langh langko mauan aplabü hoba khanshoulitshou shuong aubüei tühnyinlabü. Hobaje kaodak hoba khonei kibü ajanjan pendou joulep lo?

¹¹Mühnyu kaonyu khümbo kho tegütham tühnyinlabü yingalonga, kankei ailaibü müt yingla?

¹²Kanei Mühghaü Chalou loubü haiyeijinei hoba hao tongde lousühtimang sühjinei, kan saopobü hoba khümbo kubü langkei kijan. Kho Chaloua mühshuong wana lontilabü hoba khanshoulitshou shuong aubüei dühlettilabü.

¹³Lausikei Mühghaüei sen la saopobü shuong kishang chem, khuthük haanbü hoba kaodak haanbü che thekuakei. Senei khübü chüheida.

¹⁴Hibü sanoubü jenabou shuong, kanei khübü haüthükbü haiyeijinei hao yoa hinseibü hoba nali atheko haksoa haptila haujemashi.

¹⁵Kan khümentila jihsiphai kuko seneibü Bunyubouei natenbü kho damanchühshi. Seneibü jaisina Pauleikei hao la kubü songsihonei kan to dokei.

¹⁶Maimaitham habü shangabü lauko haoeibü le pendoua haoei dokei. Khünei ngühkung atje ditenla sekakei, hoba angebü hoba tak ashatbü danei jembü maulabü lele, ailai lubü Lai shuong haoenei khüpeilangeitida kho tegü habükei süktinongtida.

¹⁷Lausikei kan, ngeibü jenabou shuongje mudonga maangsangtia. Hibü, kan amaibü mütshuongeibü ngühei leilangan, kan jembü kaangbü younak ka üatetla maangsangashi.

¹⁸Lausikei seneibü Bunyubou hoba Khümenbou Jisu Khrista onou hoba ngebüa chingashi. Hao to tou hoba ponpen soneikangbü yingshi. Amen.